TAʼLIM-TARBIYa MUASSASALARIDA BILIMDON YoShLAR VOYaGA YeTMOQDA

Amudaryo tumani Maktabgacha va maktab taʼlimi boʻlimi tasarrufidagi 85ta umumtaʼlim maktabi, 52ta davlat maktabgacha taʼlim tashkiloti, 78ta oilaviy va 4ta davlat xususiy sheriklik asosidagi MTTlarda oʻquvchi-yoshlarning bilim olishlari, sport bilan shugʻullanib, oʻz iqtidorlarini rivojlantirishlari hamda MTTlarda bolajonlarning yayrab oʻsishlari uchun barcha zarur shart-sharoitlar yaratilgan.

Ayni paytda tuman MMTB tasarrufidagi umumtaʼlim maktablarida 38813 nafar oʻquvchi taʼlim-tarbiya olishmoqda. 2022-2023 oʻquv yilida 78ta umumtaʼlim maktablari va ixtisoslashtirilgan maktabni 2750 nafar yoshlar muvaffaqiyatli bitirishdi. Bitiruvchilardan 790 nafari davlat OTMlariga, 499 nafar bitiruvchi belgilangan kvotalar boʻyicha, 151 nafar yoshlar esa nodavlat OTMlarga oʻqishga qabul qilindilar. 2022-2023 oʻquv yili yakunlariga koʻra, turli toifadagi OTMlarga oʻqishga qabul qilingan bitiruvchilar 1440 nafar boʻlib, 52 foizni tashkil etdi.

Amudaryolik bitiruvchi-yoshlar orasida 2022-2023 oʻquv yilini alohida yutuqlar bilan yakunlaganlar koʻp boʻldi. 2022-2023 oʻquv yilida V2, S1 sertifikatlarini qoʻlga kiritgan 36 nafar oʻquvchi maktabni oltin, 11 nafar oʻquvchi kumush medal bilan muvaffaqiyatli tamomladilar. 50 nafar bitiruvchi V2 darajali, 5 nafar oʻquvchi S1 darajali sertifikatlar sohiblari boʻlishdi.

Oʻquvchilarga jahon andozalari darajasida taʼlim-tarbiya berishda yuksak bilim va salohiyatga, sohada oʻziga xos uslubga ega oʻqituvchilar safi oshib borayotgani quvonarli. Bugungi kunda xalqaro va milliy sertifikatga ega oʻqituvchilar 343 nafarni tashkil etadi. Vazirlar Mahkamasining 2022-yil 2-avgustdagi “Xalq taʼlimi vaziri jamgʻarmasi faoliyatini tashkil etish chora-tadbirlari toʻgʻrisida”gi Qaroriga muvofiq vazir jamgʻarmasi hisobidan har oylik ustama toʻlanadigan pedagoglarni aniqlash maqsadida oʻtkazilgan ikki bosqichli tanlovda 7 nafar oʻqituvchi muvaffaqiyatli ishtirok etib, 80 balldan yuqori natijalarga erishdilar. Yuqoridagi Qarorga koʻra, 7 nafar oʻqituvchilarga har oyda vazir jamgʻarmasi hisobidan 5,5 mln. soʻm miqdorida ustama toʻlash belgilandi.

MMTB tomonidan 2022-2023 oʻquv yilida bitiruvchilar bandligini taʼminlashga ham alohida eʼtibor qaratildi. 1440 nafar bitiruvchi OTMlar talabasi boʻlib, taʼlimning keyingi bosqichida oʻqishni davom ettirmoqda.

Joriy yilda 45-sonli, 1-sonli 31-, 44-sonli va 86-sonli maktablarida mukammal va joriy qurilish-taʼmirlash ishlari amalga oshirilib, oʻqituvchi va oʻquvchi-yoshlar uchun zarur sharoit va imkoniyatlar yaratildi.

Fanlar olimpiadasining Qoraqalpogʻiston Respublikasi bosqichida 7 nafar oʻquvchilar 1-, 2-, 3-oʻrinlarni qoʻlga kiritishdi. 3-sonli maktab kutubxonasi mudirasi Tazaxan Qidirniyazova esa “Scientific Publication” milliy matbuot markazi, “Best Publication” ilmiy tadqiqotlar markazi va “Scientific Academy” tomonidan tashkil etilgan “MDH yetakchilari” xalqaro ilmiy-amaliy koʻrik-tanlovida muvaffaqiyatli ishtirok etib, esdalik koʻkrak nishoni va maxsus guvohnoma bilan taqdirlandi. 40-sonli va 36-sonli maktablarning fizika fani oʻqituvchilari Sarvar Yaxshimurodov va Xushnud Chorshamov, 59-sonli maktabning kimyo fani oʻqituvchisi Umar Boltaboyev, 32-maktabning tarix fani oʻqituvchisi Nabijon Matnazarov, 52-maktabning ona tili va adabiyot fani oʻqituvchisi Umida Xudoyberganova, 1-maktabning ingliz  tili fani oʻqituvchi Muhabbat Xudoyberganova, 55-sonli maktabning geografiya fani oʻqituvchisi Bahodir Oʻtaboyevlarning oʻquvchilari fanlar olimpiadasining tuman va Respublika bosqichlarida gʻoliblikni qoʻlga kiritdilar.

Oʻzbekiston Respublikasi MMTB tomonidan amalga oshirilayotgan “Zamonaviy maktab” loyihasi doirasida 2022-2023 oʻquv yili davomida 40-sonli maktabga 2-darajali, 32-, 33-, 22-, 48-sonli maktablarga 3-darajali “Zamonaviy maktab” maqomi berildi.

Ayni paytda Amudaryo tumani MMTB tasarrufidagi barcha taʼlim-tarbiya muassasalarida sohaga tatbiq etilayotgan innovatsion loyihalarni amalga oshirish, oʻsib kelayotgan yosh avlodni Uchinchi Renessansning ilgʻor fikrli, salohiyatli, yuksak maʼnaviyatli insonlari qilib tarbiyalashdek sharafli va maʼsuliyatli vazifani ado etish, 2023-2024 oʻquv yilining ikkinchi choragi muvaffaqiyatli yakunlanib, oʻquv yilining hal qiluvchi uchinchi choragi uchun belgilangan ulugʻvor rejalarni ado etishga qaratilgan saʼy-harakatlar jipslik asosida, yuqori saviyada olib borilmoqda.

Robiya YOʻLDOShEVA.