2009-2012-YILLARDA TUGʻILGAN OʻSMIRLAR OʻRTASIDA OChIQ BIRINChILIK MUSOBAQALARI OʻTKAZILDI

Yoshlarni harbiy sohaga qiziqtirishda, ularning jismonan sogʻlom, aqlan yetuk boʻlib ulgʻayishida vatanparvarlik oyligi doirasida oʻtkaziladigan tadbirlarning oʻrni alohidadir.

11-yanvar kuni Amudaryo tumani sport maktabida tuman hokimligi, yoshlar ishlari agentligi, tuman Mudofaa ishlari boʻyicha boʻlimi, sport maktab hamkorligida sportning shaxmat, dzyudo, suzish va stol tennisi turlari boʻyicha tuman ochiq birinchiligi oʻtkazildi.

14-yanvar – Vatan himoyachilari kuni va Oʻzbekiston Qurolli Kuchlari tashkil topganligining 32 yilligi munosabati bilan “Milliy armiyamiz – Yangi Oʻzbekistonning mustahkam qalqonidir” shiori ostida oʻtkazilgan musobaqada 2009-2012-yillarda tugʻilgan oʻsmir-bolalar, qizlar ishtirok etdilar.

Musobaqalarning boshlanishi bayram tusini oldi. Saf tortib turgan oʻsmir-yoshlarni tuman Mudofaa ishlari boʻlimi boshligʻi Sherzod Murodov 14-yanvar – Vatan himoyachilari kuni bilan qizgʻin muborakbod etdi va musobaqada muvaffaqiyatli ishtirok etishini tiladi.

Musobaqalarga start berilishini barcha ishtirokchilar quvonib olqishladilar.

Bellashuvlarning dzyudo turi boʻyicha oʻtkazilgan musobaqalarida 32 kilogramm vaznda Dilshodbek Ismoilov, 35 kilogramm vaznda Suhrob Rustamov, 38 kilogramm vaznda Alixon Sobirov, 42 kilogramm vaznda Javohir Jumamurodov, 46 kilogramm vaznda Oybek Ollomberganov, 50 kilogramm vaznda Nurbolat Yestoyev, 55 kilogramm vaznda Botirjon Xudoyberganov, 60 kilogramm vaznda Farrux Ahmadov, 60 kilogrammdan ziyod vaznda Gʻulomjon Yangiboyevlar tengdoshlaridan kuchliligini namoyish qilib, birinchi oʻrinlarni yengib oldilar.

Shuningdek, shaxmat boʻyicha bellashuvlar ham qizgʻin kechdi. Uch tur bahslaridan soʻng  qizlar oʻrtasida Dilnoza Toʻrayeva, Xolida Otajonova,  Diyora Maxsudova, Lola Koʻklanboyeva, oʻgʻil bolalar orasida esa Kamronbek Karimboyev, Asadbek Shomurodov, Abdulaziz Yusupov va Sultonbek Toʻliboyevlar musobaqa gʻolib va sovrindorlari boʻldilar. Stol tennisida esa oʻgʻil bolalar orasida Zafarbek Yunusov, Elyor Baxtiyorov, Otabek Tirkashev, Jahongir Bozorboyev, qiz bolalar orasida Umida Baxtiyorova, Dinora Sadaddinova, Lolaxon Baxtiyorova, Munisa Sultonovalar eng yaxshi natijalarni koʻrsatdilar.

Suzish sport maktabda yoʻlga qoʻyilgan eng kenja turlardan hisoblansa-da, oʻsmirlar, yoshlar orasida ommaviy tus olmoqda. Shugʻullanuvchilar orasidan nufuzli musobaqalar gʻoliblari yetishib chiqqanligi fikrimiz dalilidir.

Mazkur musobaqada ham suzish boʻyicha eng mahoratlilar aniqlandi. Oʻgʻil bolalar oʻrtasida Arslon Xolboyev, qizlar orasida Aygerim Marksovalar barcha tengdoshlaridan kuchli ekanligini namoyish etib, birinchi oʻrinni yengib olishdi.

Gʻolib va sovrindorlarni taqdirlash marosimi juda hayajonli va taassurotlarga boy boʻldi.

Gʻolib va sovrindor boʻlgan yosh sportchilarni tuman hokimi Sobir Xoʻjametov qizgʻin tabriklab, diplom, qimmatbaho sovgʻalar topshirdi hamda kelgusida tumanimiz sport sharafini yuksak koʻtaradigan nomdor sportchilar boʻlib yetishishini tiladi.

Vatan himoyachilari kuniga bagʻishlab sportning 4ta turi boʻyicha oʻtkazilgan musobaqalar sport maktabda shugʻullanayotgan oʻgʻil-qizlarga ulkan motivatsiyalar berdi.

Oygul RAJABOVA.