2009-2012 ЙИЛЛАРДА ТУҒИЛГАН ЎСМИРЛАР ЎРТАСИДА ОЧИҚ БИРИНЧИЛИК МУСОБАҚАЛАРИ ЎТКАЗИЛДИ

Ёшларни ҳарбий соҳага қизиқтиришда, уларнинг жисмонан соғлом, ақлан етук бўлиб улғайишида ватанпарварлик ойлиги доирасида ўтказиладиган тадбирларнинг ўрни алоҳидадир.

11 январь куни Амударё тумани спорт мактабида туман ҳокимлиги, ёшлар ишлари агентлиги, туман Мудофаа ишлари бўйича бўлими, спорт мактаб ҳамкорлигида спортнинг шахмат, дзюдо, сузиш ва стол тенниси турлари бўйича туман очиқ биринчилиги ўтказилди.

14 январь – Ватан ҳимоячилари куни ва Ўзбекистон Қуролли Кучлари ташкил топганлигининг 32 йиллиги муносабати билан “Миллий армиямиз – Янги Ўзбекистоннинг мустаҳкам қалқонидир” шиори остида ўтказилган мусобақада 2009-2012 йилларда туғилган ўсмир-болалар, қизлар иштирок этдилар.

Мусобақаларнинг бошланиши байрам тусини олди. Саф тортиб турган ўсмир-ёшларни туман Мудофаа ишлари бўлими бошлиғи Шерзод Муродов 14 январь – Ватан ҳимоячилари куни билан қизғин муборакбод этди ва мусобақада муваффақиятли иштирок этишини тилади.

Мусобақаларга старт берилишини барча иштирокчилар қувониб олқишладилар.

Беллашувларнинг дзюдо тури бўйича ўтказилган мусобақаларида 32 килограмм вазнда Дилшодбек Исмоилов, 35 килограмм вазнда Суҳроб Рустамов, 38 килограмм вазнда Алихон Собиров, 42 килограмм вазнда Жавоҳир Жумамуродов, 46 килограмм вазнда Ойбек Олломберганов, 50 килограмм вазнда Нурболат Естоев, 55 килограмм вазнда Ботиржон Худойберганов, 60 килограмм вазнда Фаррух Аҳмадов, 60 килограммдан зиёд вазнда Ғуломжон Янгибоевлар тенгдошларидан кучлилигини намойиш қилиб, биринчи ўринларни енгиб олдилар.

Шунингдек, шахмат бўйича беллашувлар ҳам қизғин кечди. Уч тур баҳсларидан сўнг  қизлар ўртасида Дилноза Тўраева, Холида Отажонова,  Диёра Махсудова, Лола Кўкланбоева, ўғил болалар орасида эса Камронбек Каримбоев, Асадбек Шомуродов, Абдулазиз Юсупов ва Султонбек Тўлибоевлар мусобақа ғолиб ва совриндорлари бўлдилар. Стол теннисида эса ўғил болалар орасида Зафарбек Юнусов, Элёр Бахтиёров, Отабек Тиркашев, Жаҳонгир Бозорбоев, қиз болалар орасида Умида Бахтиёрова, Динора Сададдинова, Лолахон Бахтиёрова, Муниса Султоновалар энг яхши натижаларни кўрсатдилар.

Сузиш спорт мактабда йўлга қўйилган энг кенжа турлардан ҳисобланса-да, ўсмирлар, ёшлар орасида оммавий тус олмоқда. Шуғулланувчилар орасидан нуфузли мусобақалар ғолиблари етишиб чиққанлиги фикримиз далилидир.

Мазкур мусобақада ҳам сузиш бўйича энг маҳоратлилар аниқланди. Ўғил болалар ўртасида Арслон Холбоев, қизлар орасида Айгерим Марксовалар барча тенгдошларидан кучли эканлигини намойиш этиб, биринчи ўринни енгиб олишди.

Ғолиб ва совриндорларни тақдирлаш маросими жуда ҳаяжонли ва таассуротларга бой бўлди.

Ғолиб ва совриндор бўлган ёш спортчиларни туман ҳокими Собир Хўжаметов қизғин табриклаб, диплом, қимматбаҳо совғалар топширди ҳамда келгусида туманимиз спорт шарафини юксак кўтарадиган номдор спортчилар бўлиб етишишини тилади.

Ватан ҳимоячилари кунига бағишлаб спортнинг 4та тури бўйича ўтказилган мусобақалар спорт мактабда шуғулланаётган ўғил-қизларга улкан мотивациялар берди.

Ойгул РАЖАБОВА.