Qishloq xoʻjaligi texnikalari majburiy texnik koʻrikdan oʻtkazilmoqda

Mamlakatimizda qishloq xoʻjaligida foydalaniladigan barcha turdagi texnika vositalari va ularning tirkamalarini majburiy texnik koʻrikdan oʻtkazish tadbirlariga alohida eʼtibor qaratiladi. Chunki bahorgi ekish mavsumidan to kech kuzda yetishtirilgan hosilni yigʻib-terib olgunga qadar boʻlgan mavsumiy yumushlarning barchasida texnika dehqonga qoʻl-qanot.

Ayni kunlarda qishloq xoʻjaligi korxonalari tasarrufidagi mavjud texnika vositalarining bahorgi ekish mavsumiga qay darajada shayligi Qoraqalpogʻiston Respublikasi Agroinspektsiyasining Amudaryo tuman boʻlimi xodimlari tomonidan maxsus koʻrikdan oʻtkazilmoqda.

Tumandagi fermer xoʻjaliklari ixtiyoridagi qishloq xoʻjalik texnikalariga xizmat koʻrsatuvchi muqobil mashina-traktor parklarida amalga oshirilayotgan tiklash-taʼmirlash jarayoni Agroinspektsiyaning tuman boʻlimi xodimlari tomonidan qatʼiy nazoratga olingan boʻlib, ishning sifatli bajarilishiga jiddiy eʼtibor qaratilmoqda.

Joriy 2024-yil bahorgi ekish mavsumida qatnashadigan texnikalarni taʼmirlash ishlariga masʼul boʻlgan joylardagi 18ta muqobil mashina-traktor parklaridagi barcha qishloq xoʻjalik texnikalari va ularning tirkamalarining ekishga tayyorlik holati Agroinspektsiya mutaxassislari tomoindan sinchiklab koʻzdan kechirildi. Oʻrganishlar jarayonida 18ta muqobil mashina-traktor parklariga taʼmirlash uchun keltirilgan 150 dona seyalka, 325ta kultivator, 1700ta tishli borona, 293ta molani taʼmirlash ishlari yakunlangani va ekish ishlariga shay qilib qoʻyilgani aniqlandi.

Dehqonning asosiy ish quroli boʻlgan texnika vositalarining sozligi, albatta, boshlanayotgan yangi dehqonchilik yilining muvaffaqiyatli oʻtishi uchun mustahkam zamin hisoblanadi. Shu bois, amudaryolik fermerlarning dalalarida ekish ishlarida qatnashadigan texnikalarning mavsumga sifatli tayyorlanganligi alohida eʼtirof etilib, texnik koʻrikdan oʻtkazilganligi haqida sertifikatlar berildi.

Oʻzbekiston Respublikasi Qishloq xoʻjaligi vazirligi huzuridagi Agrosanoat majmui ustidan nazorat qilish inspektsiyasining Amudaryo tuman boʻlimi xodimlari Turkmaniston muqobil mashina-traktor parkida boʻlishib, mazkur korxonaga keltirilgan paxta va boshqa qishloq xoʻjalik texnikalarining texnik sozlik holatini koʻrikdan oʻtkazdilar.

Mazkur muqobil mashina-traktor parklarida yigʻilib, taʼmirlangan 7ta chigit ekish seyalkasi, 19ta kultivator, 108dona tishli borona, 19ta temir mola ekish mavsumiga soz holatga keltirilib, ekish ishlariga 100 foiz tayyorligi boʻyicha 27 nafar mexanizatorlarga sertifikatlar berildi.

Shuningdek, Agroinspektsiyaning Amudaryo tuman boʻlimi boshligʻi Sarvar Matyoqubov rahbarligidagi mutaxassislar Oq oltin muqobil mashina-traktor parkida ham boʻlishib, bu yerga yigʻilgan texnika vositalarining 2024-yil ekish mavsumiga tayyorligi holati bilan tanishdilar.

Ushbu muqobil mashina-traktor parklarida 9dona chigit ekish seyalkasi, 15ta kultivator agregati, 130 dona tishli borona, 14ta temir mola sifatli taʼmirlangan va ekish mavsumiga soz holatga keltirilgan. Agroinspektsiyaning tuman boʻlimi mutaxassislari xulosasiga koʻra, mazkur muqobil mashina-traktor parklari tomonidan xizmat koʻrsatilayotgan fermer xoʻjaliklarining mexanizatorlariga texnika vositalarining texnik koʻrikdan oʻtkazilganligi haqida sertifikatlar topshirildi.

Qishloq xoʻjaligi sohasidagi ishlarning asosiy qismini texnikalar bajaradi. Shu tufayli bahorgi dala ishlarining oʻz vaqtida va qulay muddatlarda oʻtkazilishini taʼminlash esa texnika vositalarining sifatli taʼmirlanishiga bogʻliq. Bu borada Agroinspektsiyaning tuman boʻlimi mutaxassislari taʼmirlash jarayoni qatʼiy nazorat asosida olib borilishiga hamisha masʼuldirlar.

Robiya YOʻLDOShEVA.