Oq oltin ovulidagi oʻzini oʻzi band etgan, tomorqasidan unumli foydalanayotgan hamyurtlarimiz hayotidan

Mamlakatimizda davlatimiz rahbari tashabbusi bilan xotin-qizlar banligini taʼminlash, ularning hayotda, jamiyatda oʻz oʻrnini topishlariga koʻmaklashish borasida keng koʻlamli islohotlar amalga oshirilmoqda.

Amudaryo tumanidagi barcha ovul va mahallalarda faoliyat olib borayotgan “yettilik” tomonidan aholining band boʻlmagan qatlamini har tomonlama qoʻllab-quvvatlash boʻyicha tizimli ishlar olib borilmoqda.

Xususan, tumanimizdagi Oq oltin ovulida faoliyat olib borayotgan xotin-qizlar faoli Mohira Yakubova hududdagi ishsiz xotin-qizlarning hayot tarzining oʻzgarishida, oʻzlarining iqtidorlari va qobilayatlarini yuzaga chiqarishi, oʻzini oʻzi band qilishida har tomonlama yordam bermoqda.

Oq oltin ovulida yashovchi yosh oila bekasi, 2 nafar farzandning onasi Muyassar Saparboyevaning tikuvchilik kasbiga qiziqishi juda katta ekanligini bilgan Mohira opa uning hozirgi kunda yaxshi daromad topayotgan qoʻli gul tikuvchi boʻlishiga katta hissa qoʻshgan.

Muyassar Saparboyeva oddiy, eski tikuv mashinasi orqali qoʻni-qoʻshni va qarindoshlarning kiyimlarini tikib berayotganini koʻrgan xotin-qizlar faoli Mohira Yakubova oʻtgan yili unga 22 mln soʻm miqdorida kredit mablagʻi olishiga hamda ushbu mablagʻ hisobiga yangi, zamonaviy koʻp funktsiyali tikuv mashinalari olishiga amaliy yordam berdi.

Shuningdek, Muyassar “Tamara Textil” MChJda oʻqib, kasb-hunar oʻrgandi hamda tikuvchilik sohasi boʻyicha bilimlarini yanada boyitdi. Hozirda Muyassarning 2 nafar shogird qizlari u bilan birgalikda faoliyat yuritib kelmoqdalar. Risolat Davletboyeva, Sevara Rahimbergenova kelgusida ustozi kabi qoʻli gul tikuvchi boʻlish uchun yangi bilim va koʻnikmalarga ega boʻlmoqdalar hamda bandligi taʼminlanib oʻzlarining kundalik ehtiyojlari uchun daromad topmoqdalar.

Ayni paytda Muyassar uyda farzandlari parvarishi hamda uy yumushlarini qilish bilan bir qatorda uy sharoitida tikuvchilik orqali yaxshi daromad topib kelmoqda. Mijozlari soni kundan kunga koʻpaymoqda.

Ana shunday qoʻli gul hunarmadlardan yana biri Gulchehra Oʻtaboyeva ishsiz xotin-qizlardan biri sifatida “Ayollar daftari”ga kiritilgan edi. Gulchehraning toʻquvchilikka boʻlgan qiziqishi bolalik chogʻlarida uygʻongan. U toʻquvchilikning sirlarini ilk bora momosidan oʻrgangan. 3-4-sinf oʻquvchisi boʻlgan paytlaridayoq toʻqishni oʻrganib, oʻziga va oila aʼzolariga turli kiyim-kechaklar toʻqiy boshlagan.

Gulchehra kasb-hunar kollejida oʻqib, oʻz bilimlarini yanada boyitdi hamda hunarmand toʻquvchi sifatida sertifikatga ega boʻldi. Hozirda 3 nafar farzandning onasi Gulchehra uyida ham farzandlar tarbiyasi bilan shugʻullanadi, ham qaynona-qaynotasining xizmatini qiladi hamda qoʻni-qoʻshni, qarindosh urugʻlar, tanish-bilishlar uchun buyurtma asosida turli kiyim-kechaklar, qishki bosh kiyimlar, qoʻlqoplar, paypoqlar, nimchalar hamda turli koʻrinishdagi yumshoq oʻyinchoqlar toʻqib, oilasiga yaxshi daromad olib kelmoqda.

Gilamdoʻzlik ota-bobolarmizdan, avloddan avlodga yetib kelayotgan eng qadimiy hunarlardan biridir. Oq oltinlik yana bir hamyurtimiz Toʻlgʻonoy opa Xudaybergenova gilam toʻqish sirlarini ota-bobolaridan oʻrgangan. Maktab oʻquvchisi boʻlgan paytlaridan buyon gilam toʻqish bilan shugʻullanib keladi.

Maktabni bitirgandan keyin otasi va akasi Toʻlgʻonoy opaga katta gilam toʻqish asbobini yasab berishadi. Ushbu uskunani hozirgi kunga qadar avaylab-asrab foydalanib kelayotgan Toʻlgʻonoy opa katta xonadonidagi barcha gilamlarni oʻz qoʻl mehnati bilan toʻqigan. Bugungi qadar Toʻlgʻonoy opa koʻplab shogirdlar chiqargan.

Hozirgi kunda 3 nafar oʻgʻli, kelinlari, nevaralari bilan katta oila boʻlib birgalikda yashab kelayotgan oilaning hamjihatligi havas qilgulik. Kelinlari va nevaralari ham Toʻlgʻonoy opadan katta qiziqish bilan gilamdoʻzlik sirlarini oʻrganib kelishmoqda.

Oq oltin ovulida yerdan unumli foydalanib kelayotgan hamyurtlarimiz ham juda koʻp. Shulardan biri Karimboy aka Niyatullayev oʻz tomorqasida issiqxona tashkil etib, turli xil savzavotlar yetishtirib kelmoqda.

Karimboy aka oila aʼzolari bilan bundan 4-yil oldin bank krediti hisobiga tomorqasida tashkil etgan 2,5 sotixlik issiqxonasida mehnat qilishadi. Issiqxonada, asosan, Karimboy akaning turmush oʻrtogʻi Xushroʻy Allambergenova va kelini Dildora Sobirova ekilgan pamidor, bodring, rediska, piyoz, kortoshka, karam kabi sabzavotlar nihollarini parvarish qilishadi. Yiliga ikki marta hosil olinadigan issiqxonada suv tejamkorligi uchun tomchilatib sugʻorish yoʻlga qoʻyilgan. Oila oʻzlarining isteʼmolidan ortgan sabzavotlarni Mangʻit dehqon bozoriga olib borib sotadi va yaxshi daromad oladi.

Shuningdek, Oq oltin ovulida yashovchi nuroniy Qurolboy ota Kamolov 15-yildan buyon tomorqasida tashkil etgan issiqxonasida turli mahsulotlarning koʻchatlarini yetishtirib kelmoqda.

Qurolboy ota tomoqasidagi archa nihollarini yoshligida Rossiyadan olib kelgan va koʻpaytirishni yoʻlga qoʻygan. Tomorqadagi 4 sotix yer maydonida tashkil etilgan issiqxonada farzandlari va kelinlari pomidor, bodring, rediska, karam kabi sabzavotlar hamda mevali daraxtlar koʻchatlarini yetishtirishadi. Yetishtirilgan koʻchatlarni ovul aholisiga hamda bozorga olib borib sotadi va bundan kelayotgan daromad evaziga oilaning iqtisodiy ahvoli kun sayin yaxshilanmoqda.

Ovuldagi xotin-qizlarni oila, mahalla va mehnat jamoalarida ijtimoiy-huquqiy jihatdan qoʻllab-quvvatlash, ularning ijtimoiy-siyosiy faolligini oshirish, xotin-qizlarning tadbirkorlik gʻoyalarini amalga oshirish, ular faoliyatiga kredit va subsidiyalarni jalb qilish, oilalarning iqtisodiy sharoitini yaxshilashga hissa qoʻshayotgan Oq oltin ovuli xotin-qizlar faoli Mohira Yakubovaning kelgusidagi faoliyatiga ham rivoj tilaymiz.

Charos Arslonova, tuman hokimligining Axborot xizmati rahbari.