Amudaryo tumani hokimi kubogi uchun kurash boʻyicha tuman ochiq birinchiligi oʻtkazildi

Kurash – bu oʻzbek xalqining qadimiy milliy sport turi boʻlib, uning ildizlari kamida uch yarim ming yillik tarixga ega. Bu sport turi adolatli va halol yoʻl bilan maqsadga erishishni targʻib qiladi.

Mamlakatimiz mustaqillikka erishganidan soʻng kurash milliy sport turi maqomini olib, uning rivojlanishi va xalqaro maydonga chiqishiga katta eʼtibor qaratila boshlandi. 1998-yilda Xalqaro Kurash Assotsiatsiyasi tashkil etilgan boʻlib, ushbu sport turining qoidalari standartlashtirildi hamda global miqyosda targʻib qilina boshlandi.

Kurashning texnikalari, anʼanalari, qoidalari va falsafasi avloddan-avlodga oʻtib kelmoqda. Mana shu ming yillik anʼanalarni saqlash va rivojlantirish maqsadida kurash boʻyicha turli sport musobaqalari, ochiq birinchiliklar, turnirlar oʻtkazib kelinmoqda. Amudaryo tumani hokimi Sobir Xoʻjametov tashabbusi bilan tuman hokimi kubogi uchun Bolalar va oʻsmirlar sport maktabida oʻtkazilgan ochiq birinchilik ham shular jumlasidandir.

Tumanning Chordara mahallasi hududidagi sport maktabi filiali imoratida oʻtkazilgan tuman ochiq birinchiligi musobaqalari koʻplab yangi nomlarni kashf qilishda vosita boʻldi. Ikki kun davomida oʻtkazilgan musobaqalarda sportchilar turli vazn toifasida gʻoliblik uchun kurashdilar.

Hokim kubogi uchun oʻtkazilgan tuman ochiq birinchiligida amudaryolik polvonlardan tashqari Qoraqalpogʻiston Respublikasi va Xorazm viloyatining turli hududlaridan kelgan sportchilar ham ishtirok etdi.

Musobaqalarning ochilish marosimida soʻzga chiqqanlar taʼkidlaganlaridek, sport yoshlarning jismoniy va maʼnaviy rivojlanishida muhim rol oʻynaydi, ularning boʻsh vaqtlarini mazmunli tashkil etish va yot gʻoyalardan asrashda asosiy omil hisoblanadi. Sport orqali yoshlar oʻzlarining jismoniy kuchlarini oshirish bilan birga, jamoaviy ishlash, maqsad sari intilish va oʻz-oʻzini nazorat qilish kabi muhim koʻnikmalarni ham rivojlantiradilar. Shuningdek, sport yoshlarga oʻzlarining energiyalarini ijobiy yoʻnalishda sarflashga ham yordam beradi. Shu sababli ham mamlakatimizda yoshlarni sportga jalb qilish va ularning boʻsh vaqtlarini mazmunli oʻtkazishlari uchun davlat tomonidan turli dasturlar amalga oshirilmoqda.

Aytish joizki, sportning yoshlar hayotidagi ahamiyati faqatgina ularning shaxsiy rivojlanishi bilan cheklanmay, balki ularning ijtimoiy munosabatlarini ham yaxshilashga xizmat qiladi. Sport musobaqalari va mashgʻulotlari orqali yoshlar boshqa tengdoshlari bilan tanishib, doʻstlashish va oʻzaro hamkorlik qilish imkoniyatlariga ega boʻladilar. Bu esa ularning ijtimoiy aloqalarini kengaytirish va jamiyatda oʻz oʻrinlarini topishlariga yordam beradi.

Bundan tashqari, sport yoshlarning jismoniy salomatligini mustahkamlash va ularni turli kasalliklardan himoya qilishda ham katta ahamiyatga ega. Jismoniy faollik yoshlarning immun tizimini kuchaytiradi va ularni stress va depressiya kabi ruhiy muammolardan saqlaydi. Eng muhimi, sport yoshlarga oʻzlarining maqsadlariga erishishda sabr-toqat va mehnatsevarlik kabi fazilatlarni rivojlantirishga yordam beradi. Sportdagi muvaffaqiyatlari va magʻlubiyatlari orqali yoshlar hayotdagi muhim darslarni oʻrganadilar va bu tajribalar ularning kelajakdagi hayotlarida muhim rol oʻynaydi.

Tuman hokimi kubogi uchun oʻtkazilgan ochiq birinchilik ham mana shunday maqsadning roʻyobga chiqishini koʻzlab amalga oshirilgan ijtimoiy tadbirdir.

Ochiq birinchilik yakunlariga koʻra yoshlar oʻrtasidagi barcha vazn toifalarida Amudaryo tumani BOʻSM sportchilari gʻolib boʻldi. Jumladan, 55 kilogramm vazn toifasida Azamat Sobirov, 60 kilogramm vazn toifasida Javohir Bozorboyev, 71 kilogramm vazn toifasida Karomaddin Yoʻldoshevlarga teng keladigan polvon topilmadi. Kattalar oʻrtasida 60 kilogramm vazn toifasida nukuslik Paraxat Yerejepov, 66 kilogramm vazn toifasida amudaryolik Sardor Ogʻaboyev, 73 kilogramm vazn toifasida gurlanlik Siroj Saparimbetov, 81 kilogramm vazn toifasida ham gurlanlik Izzat Rahimboyev, 81 kilogrammdan ortiq vazndagi kurashchilar oʻrtasida esa amudaryolik Samir Nazarboyevlar gʻoliblikni qoʻlga kiritdi. Umumjamoa hisobida amudaryolik polvonlar birinchi oʻrinni egallashdi. 2-oʻrin Nukus shahri jamoasiga, 3-oʻrin esa Gurlan tumani polvonlariga nasib etdi. Musobaqa gʻoliblari va faol ishtirokchilarga tuman hokimligi tomonidan diplom va esdalik sovgʻalari topshirildi.

Chorsham Tajimurodov, tuman BOʻSM direktori