45-sonli maktabda oʻquvchilar ishtirokida voleybol musobaqasi tashkil etildi

Sport – sogʻlik garovi. Sogʻlom inson teran aql egasi va jamiyatning faol aʼzosi sanaladi. Xalqimiz qadimdan jismoniy harakatni qoʻllab-quvvatlab, sportga oshno boʻlib kelgan. Milliy sport turlari va oʻyin qoidalarida xalqimiz ruhiyati mujassamdir. Donolar bejizga sogʻlom tanda – sogʻlom aql, deyishmagan.

Shu maʼnado mamlakatimizda yoshlarning maʼnan yetuk, jismonan sogʻlom ulgʻayishlari uchun, aholi, ayniqsa uyushmagan yoshlar orasida ommaviy sportni keng targʻib qilish maqsadida joylarda tegishli tashkilotlar va sektor rahbarlari tamonidan sport musobaqalarini tashkil etish yaxshi anʼanaga aylangan. Jumladan, “Hokim kubogi”, “Davlat xavfsizlik xizmati kubogi”, “Prokuror kubogi”, “Ichki ishlar vazirligi kubogi” hamda “Besh muhim tashabbus olimpiadasi” doirasidagi sport musobaqalari ham ommaviy sport targʻibotida, shuningdek, uyushmagan yoshlarni sport bilan qamrab olish va ularning vaqtini mazmunli oʻtkazishlarida muhim vosita boʻlmoqda.

Amudaryo tumani Jumurovul mahallasidagi 45-sonli maktabda uyushmagan yoshlarning vaqtini mazmunli oʻtkazish maqsadida sportning voleybol va shaxmat-shashka turlari boʻyicha tashkil qilingan musoqa ham yoshlarning gʻoliblik uchun murosasiz kurashlariga boy boʻldi. Voleybol boʻyicha oʻtkazilgan musobaqa davomida yigitlar va qizlar jamoasi oʻz tajriba va chaqqonliklarini yana bir bor sinab koʻrishdi.

Mazkur sport tadbirida Qoraqalpogʻiston Respublikasi Ichki ishlar vazrirligining Migratsiya va fuqarolikni rasmiylashtirish boshqarmasi boshligʻi, mayor Shavkat Turayev, Amudaryo tumani Migratsiya va fuqarolikni rasmiylashtirish boʻlinmasi boshligʻi, kapiatan Abdurahmon Umarov hamda maktab rahbariyati ishtirok etdi.

Musobaqaga maktabning maʼnaviy-maʼrifiy ishlar boʻyicha direktor oʻrinbosari Soatboy Matkarimov va jismoniy tarbiya fani oʻqituvchisi Bekzod Karimovlar hakamlik qilib, baholab borishdi.

Sport tadbiri avvalida tashkilotchilar muntazam sport bilan shugʻullanish salomatlik uchun bebaho foyda ekanligi, sport – bu harakat, doimiy harakatdagi insondan har xil mavsumiy kasalliklar yiroq boʻlishi, mamlakatimizda ommaviy sportni rivojlantirish maqsadida amalga oshirilayotgan ishlar haqida gapirib, yoshlar bilan samimiy muloqot qilishdi.

Har bir yigit vatan uchun harbiy xizmat burchini oʻtashni orzu qiladi. Sport bilan doimiy shugʻullanib jismoniy chiniqqan yoshlar askarlik davomida maxsus mashqlarni bajarishdan qiynalmaydi. Shuningdek, kun kelib har bir yigit oila boshligʻiga aylanadi. Oila rahbari farzandlariga har tomonlama namuna boʻlishi lozim. Sogʻlom onadan esa, sogʻlom farzandlar dunyoga keladi.

Aql gimnastikasi boʻlmish shaxmat-shashka esa insonning intellektual rivojlanishida muhim vosita hisoblanadi. Sohibqiron bobomiz Amir Temur ham shaxmat oʻyiniga alohida mexr qoʻygan. Oʻyinchi gʻolib boʻlish uchun maxsus hujum uusullarini oʻylaydi. Bu jarayon yoshlarda teran fikrlash koʻnikmalarini shakkllantiradi. Katta tajribaga ega xodimlar tomonidan tadbirda bildirilgan fikrlar yoshlarga sport bilan doimiy shugʻillanishlari uchun kuchli motivatsiya bergan boʻlsa, ajab emas.

Musobaqa davomida yigitlar va qizlar jamoalari oʻzaro gʻoliblik uchun astoydil kurashdilar. Yigʻilganlar yoshlarning epchil va chaqqonliklarini kuzatib, qarsaklar bilan olqishlab turishdi. Bunday samimiy eʼtirof oʻyinchalarga yanada kuch bagʻishladi.

Sport tadbiri yakunida gʻolib jamoalar va faol ishtirokchilar tashkilotchilar tomonidan diplom va esdalik sovgʻalari bilan taqdirlandi. Yoshlar oʻtkazilgan musobaqa uchun tashkilotchilarga minnatdorchilik bildirishdi.

Yoshlikning har dami gʻanimat. Umrning kuch-gʻayratga toʻla bu oltin davrini mazmunli oʻtkazishda har birimiz oʻzimizning munosib hissamizni qoʻshib, namuna boʻlishimiz lozim. Zero, bugungi beparvolik, ertangi pushaymonliklarga sabab boʻlishini unutmaylik.

Abdurahmon Umarov, tuman Migratsiya va fuqarolikni rasmiylashtirish boʻlinmasi boshligʻi, kapitan