“Mangʻit savdo kompleksi” MChJda taktik-amaliy oʻquv mashgʻulotlari oʻtkazildi

Maʼlumki, shu kunlarda respublikamizning barcha hududlarida, jumladan, Amudaryo tumanida ham 1-iyuldan 1-avgustga qadar “Yongʻin xavfsizligini taʼminlash boʻyicha dolzarb 30 kunlik” doirasida turli tadbirlar tashkil etilmoqda. Tuman Favqulodda vaziyatlar boʻlimi va tegishli tashkilotlar bilan hamkorlikda joylarda oʻtkazilayotgan taktik-amaliy oʻquv mashgʻulotlari natijasida xodimlar va fuqarolarning favqulodda vaziyatlar sodir boʻlganda toʻgʻri harakatlanishga doir bilim-tajribalari yanada mustahkamlanayapti.

Oylik doirasida “Mangʻit savdo kompleksi” MChJga qarashli savdo doʻkonlarida yongʻin xavfsizligini taʼminlash, fuqarolarning hayoti va mol-mulkinining daxlsizligini saqlash maqsadida taktik-amaliy oʻquv mashgʻulotlari oʻtkazildi. Bunda tumandagi Favqulodda vaziyatlar boʻlimi, Elektr taʼminoti korxonasi, tez tibbiy yordam boʻlimi xodimlari va boshqalar ishtirok etishdi.

Dastlab masʼullar tomonidan tadbir ishtirokchilariga “Yongʻin xavfsizligini taʼminlash boʻyicha “Dolzarb 30 kunlik” doirasida oʻtkazilayotgan taktik-amaliy oʻquv mashgʻulotlarining ahamiyati toʻgrisida maʼlumotlar berildi. Shuningdek, yoz mavsumida mintaqamizdagi yuqori havo harorati sababli obʼektlardagi kutilmagan yongʻin holatlariga shay turish lozimligi taʼkidlandi va bunday vaziyatlarning oldini olish hamda favqulotda holatlarni kam talafot bilan oʻtkazishga doir zarur tavsiyalar berildi.

Shundan soʻng favqulodda holat haqida barcha tezkor xizmatlarga xabar berish va ogohlantirish signali chalindi. Keyingi bosqichda esa “Mangʻit savdo kompleksi” MChJ hududidagi savdo doʻkonlaridan birida tuman Favqulodda vaziyatlar boʻlimi xodimlari tegishli tashkilotlar bilan hamkorlikda shartli ravishda sodir boʻlgan yongʻinni zudlik bilan bartaraf etish, yongʻin oʻchogʻidan jabrlanganlarni tashqariga xavfsiz olib chiqish va birinchi tibbiy yordam koʻrsatish, hududdan fuqarolarni evakuatsiya qilish kabi taktik-amaliy oʻquv mashgʻulotlarni bajarishdi.

Shuningdek, doʻkonlarda mehnat muhofazasi, xavfsizlik texnikasi, yongʻin xavfsizligi talablariga rioya etilishi, obʼektlarning birlamchi yongʻin oʻchirish vositalari bilan taʼminlanishi, avtomatik yongʻin oʻchirish va yongʻindan avtomatik darak berish tizimi va shu kabi boshqa moslamalar sozligi tekshiruvdan oʻtkazildi.

Bundan tashqari, mazkur tadbir doirasida tabiiy va texnogen tusdagi yuzaga kelishi mumkin boʻlgan favqulodda vaziyatlarni bartaraf etish, inson hayotiga xavf tugʻdirishi mumkin boʻlgan holatlarni va boshqa shoshilinch ishlarni aniqlash maqsadida profilaktik tadbirlar oʻtkazildi.

Maʼlumot oʻrnida, bugungi kunda joylarda taktik-amaliy oʻquv mashgʻulotlarini tashkil etish bilan bir qatorda tuman Favqulodda vaziyatlar boʻlimi xodimlari tomonidan tuman hududida joylashgan obʼektlarda qonunda belgilangan tartibda tekshiruvlar oʻtkazish, jamoat joylarida yongʻin xavfsizligiga doir targʻibot bannerlarini oʻrnatish va shu kabi bir qator chora-tadbirlar ish rejasiga muvofiq amalga oshirilmoqda.

Darhaqiqat, yongʻin holatlari qisqa fursatlarda sodir boʻlib, fuqarolar hayoti va mol-mulkiga jiddiy ziyon yetkazadi. Ayniqsa, yozning issiq kunlarida obʼektlarni va mahsulotlarni salqin qilish maqsadida elektr energiyasi bilan ishlovchi qurilmalardan muntazam foydalanamiz. Agar obʼektlarni elektr energiyasi bilan taʼminlash maqsadida tortilgan simlar va qurilmalar talabga javob bermasa, yuqori kuchlanish sabab yongʻin sodir boʻlishi mumkin. Shunday ekan, yongʻin xavfsizligini taʼminlashga qaratilgan “Dolzarb 30 kunlik” tadbirlari favqulodda vaziyatlarning oldini olishda muhim ahamiyatga ega. Bu jarayonlarda har birimiz faol ishtirok etishimiz lozim.

Shohzod Qurbonboyev