ҚИШЛОҚДАГИ НАМУНАЛИ МАКТАБ
Бугунги давр ҳар бир инсондан юксак билим ва салоҳиятни талаб этади. Ўсиб келаётган ёш авлоднинг тобора ривожланиб бораётган илм-фан асосларини пухта эгаллашга бўлган эҳтиёжини қондириш учун илк қадам умумтаълим мактабларидан бошланади. Ўқувчи-ёшларни иқтидор ва қобилиятларига мувофиқ ўзлари қизиққан фанлар бўйича йўналтириб таълим-тарбия бериш эса ўқитувчининг билим ва маҳоратига, педагогика жамоасининг бирдамлигига боғлиқ. Шу нуқтаи назардан олиб қарайдиган бўлсак, бугунги педагог ўқитишнинг энг илғор услубларини ўзида мужассам этиш билан бирга, мамлакатимизда таълим тизимида амалга оширилаётган ислоҳотларнинг мазмун-моҳиятидан келиб чиқиб, дарсларини намунали тарзда ташкил этиши талаб этилади.
Ўқувчилари турли хил кўрик-танловларда, умумтаълим мактаблари ўқувчилари ўртасида ўтказиладиган фанлар олимпиадаларида ютуқларга эришаётган мактаблар ҳақида кўпчилик: “бу мактаб шаҳарда ёки туман марказида жойлашган, уларда имконият кўп”, қабилида фикр билдиришади. Аслида эса муваффақиятлар сири таълим муассасасининг манзил-маконида эмас, балки педагогика жамоасининг аҳиллигида, бир мақсад йўлида бирдамлик билан иш юритишида. Амударё тумани Мактабгача ва мактаб таълими бўлимига қарашли Сурайё Эшбоева раҳбарлигидаги 18-сонли умумтаълим мактаби фаолияти билан танишиш жараёнида бунга яққол гувоҳ бўлдик.
Туман марказидан 14 чақирим атрофидаги олис масофада, Қипчоқ қишлоғи ҳудудида жойлашган мазкур таълим маскани 1990 йилда бунёд этилган бўлиб, 2022 йилда жорий таъмирланган. 600 ўқувчи-ўрин қувватига эга муассасада айни пайтда 562 нафар ўқувчи-ёшлар таълим-тарбия олишмоқда. Мактабда фаолият олиб борувчи 50 нафар педагог ходимларнинг 5 нафари олий, 15 нафари 1-тоифали ўқитувчилар бўлиб, улардан 6 нафари ўз мутахассислик фанлари бўйича халқаро даражадаги С1 сертификати эгаларидир.
Мактабда фан тўгараклари яхши йўлга қўйилган. Хусусан, олий тоифали инглиз тили фани ўқитувчиси Санъат Жумамуродовнинг ўқувчилари инглиз тилида бемалол мулоқотга киришсалар, Дилафрўз Тўраева ҳамда Дилфуза Ортиқбоевалар раҳбарлигидаги инглиз тили тўгараги аъзолари кичик ҳикоя ва шеърларни ўзбек тилидан инглиз тилига, инглиз тилидан ўзбек ва қорақалпоқ тилларига қийналмасдан таржима қилиб беришади. Халқаро даражадаги С1 сертификати соҳибалари, олий тоифали рус тили фани ўқитувчиси Зебо Холбоева, Холпошша Бидашеваларнинг тўгарак машғулотлари мактаб ўқувчилари учун янада қизиқарли.
Шунингдек, мактабда олий тоифали математика фани ўқитувчилари Эркин Алламберганов, Нодира Отажонова, табиий фанлар ўқитувчилари Азиза Сабурова, Нилуфар Отабоева, жисмоний тарбия фани ўқитувчилари Зафар Матсафоев, Беҳзод Ўрозбоевларнинг ҳар бир дарси ва тўгараклар бўйича машғулотлари мактаб ўқувчилари учун бири-биридан қизиқарли таассуротларга бой тарзда ўтади.
Азиза Холмуродова ўқувчиларга она тили ва адабиёт фанидан дарс беради. Ўз мутахассислик фанининг билимдони бўлган Азиза ўқувчилари билан дарс жараёнида ҳам, дарсдан ташқари тўгарак машғулотларида ҳам соатлаб шуғулланишдан, уларнинг қизиқишлари доирасида қўшимча адабиётлар асосида машғулотлар олиб боришдан асло чарчамайди. Ўқувчиларни қизиқтирган мавзулар юзасидан рефератлар, илмий-назарий ва услубий маърузалар тайёрлаш, уларни амалда қўллаш орқали ўқувчиларнинг билимини бойитиб бориш, иқтидор ва қобилиятларини ривожлантириш Азизанинг доимий масъулиятли ишига айланган.
Табиатан интилувчан ва изланувчан, доимий равишда ўз фани бўйича инновацион услуб ва ғояларни қўллаган ҳолда дарс ўтишга бўлган иштиёқи туфайли унинг ўқувчилари орасида она тили ва адабиёт фанига меҳр қўйган ёшлар талайгина. Жорий ўқув йилида фанлар олимпиадасининг туман босқичида 9-синф ўқувчиси Севинч Каримова фахрли биринчи, 11-синф ўқувчиси Шодиёна Жабборберганова 2-ўринни эгаллаб, мазкур олимпиаданинг Қорақалпоғистон Республикаси босқичига йўлланма олдилар.
Аниқ фанларни ўқитиш бўйича ўзига хос малака ва тажрибага эга педагогларнинг ҳамкорликдаги саъй-ҳаракатлари туфайли мактабнинг “THE BEST” заковатли болалар жамоаси туманда ўтказиладиган билимдонлар баҳсларида доимий равишда фахрли ўринларни эгаллаб келишмоқда. 2023-2024 ўқув йилида эса 23 нафар битирувчиларнинг 17 нафари мамлакатимиздаги нуфузли ОТМларнинг талабалари бўлишди.
– Эришилаётган ютуқларнинг барчаси бошланғич синфларда болаларга яхши таълим-тарбия берилганининг самараси, – дейди мактаб директори Сурайё Эшбоева. – Чунки боланинг қизиқиш ва иқтидори қўлига илк қалам тутган кунидан бошланади. Бу борада биз бошланғич синфлар ўқитувчилари Нодира Холимбетова, Дилшода Юсуфова, Холида Ҳайдаровалардан миннатдормиз. Улар 4 йил давомида болаларни умумтаълим фанларига муваффақиятли тайёрлашмоқда.
Биз юқорида таълим соҳасида муваффақиятларга эришиш таълим муассасаси жойлашган манзил ва маконга боғлиқ эмаслиги ҳақида сўз юритган эдик ва буни туман марказидан салкам 14 чақирим олис масофада жойлашган 18-сонли қишлоқ мактаби педагогика жамоаси фаолияти билан танишиш асносида яққол ҳис этдик.
Шундай бўлса-да муассасада ўз ечимини кутаётган муаммолар ҳам йўқ эмас. Мактаб ошхонаси учун айни пайтда 60 ўринли ошхона жиҳозлари зарур. Жиҳозлар етишмовчилиги туфайли, айниқса, бошланғич синфлар ўқувчиларини вақтида овқатлантириш борасида қийинчиликларга дуч келишади. Бундан ташқари, 3та бошланғич ва 4та юқори синфларнинг синф хоналари яхши жиҳозланмаганидан дарс-машғулотларини амалга оширишда ўқитувчилар ҳам, ўқувчилар ҳам баъзан ноқулай вазиятларга тушиб қолишади.
Умид қиламизки, Амударё туман Мактабгача ва мактаб таълими бўлими масъуллари ушбу муаммога эътибор беришади ва бирдамлик, ҳамжиҳатлик билан иш юритиш орқали ўқувчи-ёшларга замон талаблари даражасида сифатли таълим бераётган мактаб педагогика жамоасини қийнаб келаётган мазкур муаммога албатта ечим топишади. Зотан, сифатли ва намунали таълимга фақат ва фақат намунали иш шароитидагина эришилади.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
