ЧУҚУРЛАШТИРИЛГАН ТИББИЙ КЎРИК АҲОЛИНИНГ ТИББИЙ МАДАНИЯТИНИ ОШИРИШ ИМКОНИНИ БЕРМОҚДА

Саломатликдан улуғ давлат йўқ, дейишади. Чунки инсон ҳам жисмонан, жам ақлан соғлом бўлсагина ўз олдига эзгу режалар қўяди, ширин орзулар оғушида яшайди. Ўзига, соғлигига эътиборли бўлган одамлар учун янги-янги режалар, орзулар оғушида яшаш жуда мароқли. Лекин кўпчилик ҳолларда инсон ўзининг бепарволиги, вужудидаги хасталикни писанд қилмай, “шунчаки шамолладим, ўтиб кетади”, қабилида иш тутиши натижасида ўз соғлигига жиддий зарар етказаётганини, оқибатда танасида шамоллашнинг оғир оқибатлари билан курашиб яшашга мажбур бўлиб қолажагини жуда кеч англаб етади. Англаганида эса хасталикни анча ўтказиб юборган бўлишади. Бекорга улуғ бобокалонимиз Абу Али Ибн Сино ҳазратлари: “Агар шамоллаш касаллиги ва чангли, ифлос ҳаво бўлмаганида инсон минг йил умр кўрарди”, демаганлар. Шунинг учун ҳамиша соғлом, бақувват, жисмонан ва ақлан фаол бўлишни хоҳлаган одам, энг аввало жисм-у жони, яъни танаси тарбияси билан мунтазам шуғулланиши, соғлом турмуш тарзига қатъий амал қилиши жоиз.

Амударё туман Тиббиёт бирлашмаси шифокорлари томонидан туман овул ва маҳаллалари аҳолисини чуқурлаштирилган тиббий кўрикдан ўтказиш, оналар ва болалар репродуктив саломатлигини мустаҳкамлаш, тиббий кўрик жараёнида аниқланган касалликларга тўғри ташхис қўйиш, беморларга стационар ва амбулатор даво чораларини қўллаш орқали уларни соғломлаштириш чоралари кўрилаётгани боис, сўнгги йилларда аҳолининг ўртача умр кўриш кўрсаткичи сезиларли даражада ошди. Бунга биз жорий йилнинг 28 январь санасида туманнинг Қиличбой мавзесидаги Тошқалъа маҳалла фуқаролар йиғини аҳолисини чуқурлаштирилган тиббий кўрикдан ўтказиш бўйича амалга оширилган ишлар билан танишиш асносида яққол гувоҳ бўлдик.

Нукус шаҳридаги Илмий-амалий марказдан ташриф буюрган тор доирадаги малакали мутахассислар ва Амударё туман Тиббиёт бирлашмаси шифокорлари ҳамкорлигида ўтказилган тиббий кўрик жараёнида мобиль поликлиника, мобиль рақамли замонавий рентген ускуналаридан самарали фойдаланилгани боис, касалликни аниқлаш, тўғри ташхис қўйиш ҳамда даво чораларини белгилаш муваффақиятли тарзда амалга оширилмоқда.

Чуқурлаштирилган тиббий кўрик жараёнига 3 минг 59 нафар аҳоли жалб қилинди. Тиббий кўрикнинг илк кунида 468 нафар фуқаронинг соғлиги қатъий текширувдан ўтказилиб, улардан 76 нафарида турли хил касалликлар борлиги аниқланди ва 1 нафар беморга стационар, 75 нафарига эса амбулатор даво чоралари белгиланди.

Тадбир бошланганидан бери ҳудуд аҳолисининг 1787 нафари чуқурлаштирилган тиббий кўрикдан ўтказилди. Улардан 270 нафарида турли тоифадаги касалликлар аниқланиб, соғломлаштириш чоралари кўрилди. 61 нафар шахсга эса мутахассис шифокорларнинг тиббий кўрсатмаларига асосан бепул дори воситалари тақдим этилди.

Айни кунларда маҳалла аҳолисини чуқурлаштирилган тиббий кўрикдан ўтказиш тадбирлари давом этмоқда. Амалга оширилаётган чора-тадбирлардан кўзланган мақсад эса халқимизнинг ҳар томонлама соғлом ва ўз ҳаётидан рози яшашларига, аҳоли ўртасида соғлом турмуш тарзини қарор топтиришга ҳисса қўшишдир. Бундан ҳам муҳими, аҳолининг ўз соғлиги учун эътиборли бўлиши борасидаги зарур тушунчаларни, соғлом турмуш тарзига амал қилиш билан боғлиқ маълумотларни тақдим этиш орқали уларнинг тиббий маданиятини оширишга яқиндан ёрдам бериш. Зеро, халқ соғлом ва ўтаётган ҳар бир кунидан рози бўлсагина мамлакатимиз юксак тараққиёт сари юз тутади.

РОБИЯ ЙЎЛДОШЕВА.