Шоҳжаҳон Маматсолиев: Ўзбекистон шахмат оламида амударёлик янги юлдуз

Ҳар бир инсон бу дунёда ўз йўли ва мақсади билан яшайди. Кимдир илм-фанда кашфиётлар қилади, кимдир санъат дунёсида бетак­рор асар яратади, яна кимдир спортда юксак ғалабаларга эришади. Қаҳрамонимиз – умидли ёш шахматчи Шоҳжаҳон Маматсолиев ҳам ана шундай иқтидорли спортчилардан бири.  

Шахмат – бу интеллектуал санъат, стратегик фикрлаш ва тезкор қарор қабул қилиш майдонидир. Шахмат тахтасида ақл-заковат, аниқ ҳисоб-китоб ва мукаммал таҳлил устунлик қилади. Болаликдан шахматга қизиққан инсонлар ҳаётда ҳам бир неча қадам олдинда бўлишади.  

Шоҳжаҳон 2011 йилнинг 9 ок­­­тя­­брь куни Амударё туманида туғилган. Қуш уясида кўрганини қилади, деганларидек ундаги спортга бўлган меҳр ота-онасининг тарбияси ва оила муҳитида шаклланди. Отаси Исломбек Абдуллаев “Amudaryotex” МЧЖ хорижий корхонасида кадрлар бўлими бош­лиғи бўлиб ишлайди, онаси Гулноза Мадаминова эса уй бекаси. Оилада шахматга бўлган қизиқиш юқори бўлиб, Абдуллаевлар хонадони “Оилавий спортчи мусобақаси”да қатнашиб, мамлакат миқёсида 1-ўринни қўлга киритишган.  

Шоҳжаҳон 5 ёшида бобоси Маматсолий Абдуллаевдан шахмат билимларини ўргана бошлайди. 2017 йилдан эса мураббий Раҳматжон Раҳимов қўл остида Амударё спорт мактабида профессионал машғулотларга киришди. Ёш спортчининг меҳнатсеварлиги ўз самарасини бериб, тез орада турли мусобақаларда совринли ўринларни қўлга киритди.  

Шоҳжаҳон ҳозирда туманимиздаги 40-сонли мактабнинг 7-синф ўқувчиси. У таълимда ҳам ўзини на­моён этмоқда. Айниқса, математика ва инглиз тили фанларига қизиқиши юқори. Унинг рақамлар, ҳисоб-китоб ва стратегия­га бўлган қизиқиши шахматга бўлган меҳри билан чамбарчас боғлиқ.  

Қаҳрамонимиз 2022 йилда Ўзбекистон чемпионатида ўз ёш тоифасида 3-ўринни эгаллади, шунингдек, Қорақалпоғистон чемпиони мақомига бир неча бор сазовор бўлди. Бу ғалабалар унга янги имкон эшикларини очди.  

2023 йилда Бирлашган Араб Амирликларининг пойтахти Абу-Дабида 14 ёшгача бўлган ўғил болалар ўртасида ўтказилган Осиё чемпионатида кучли ўнликдан жой олиб, 6-ўринни қўлга киритди. Натижада халқаро шахмат аренасида ҳам ўз ўрнига эга эканини кўрсатди.  

Жорий йилнинг 13-20 январь кунлари 14-15 ёшли шахматчилар ўртасида Андижон вилоятида ўтказилган Ўзбекистон чемпионатида шахматнинг блиц турида 1-ўринни эгаллаб, мамлакат миқёсида етакчи ёш шахматчилардан бирига айланди ва спорт усталигига номзод кўрсаткичини қайд этди.

Шоҳжаҳон ўз услубида мустаҳкам ҳимоя ва ҳужумкорликни уйғунлаш­тир­ган. Ўйин вақтида рақиб­ларининг хатоларини кутиш ва улардан устамонлик билан фойдаланишнинг уддасидан чиқади. Севимли шахмат фигураси – ҳаракатчан ва стратегик имкониятлар яратувчи қўшинбоши фарзин саналади.  

Шоҳжаҳон мураббийи Азимжон Раҳимов билан 20 февраль – 3 март кунлари Бухоро шаҳрида бўлиб ўтган Ўзбекистон чемпионатида ҳам муваффақиятли иштирок этиб, кучли ўнликдан жой олди.

Қаҳрамонимиз машҳур гроссмейстерлар – Нодир­бек Абдусатторов ва Маг­нус Карлсенларнинг партияларини таҳлил қилиб, уларнинг услубларини ўрганишга ҳаракат қилади.  

Шоҳжаҳон Маматсолиев – тиришқоқлиги, интизоми ва шахматга бўлган иштиёқи билан юқори марраларни забт этяпти. Келгусида у халқаро гроссмейстер мақомини қўлга киритишни ва юртимиз байроғини жаҳон шахмат мусобақаларида баланд кўтаришни ният қилган. Шубҳасиз, бугунги шижоати ва меҳнати мақсадларини амалга оширишда мустаҳкам пойдевор бўлиб хизмат қилади.  

Шоҳжаҳонга келгуси мусобақаларда ҳам катта муваффақиятлар тилаймиз!

Шоҳзод Қурбонбоев.