Ўзбекистон Республикаси Соғлиқни сақлаш вазирининг ўринбосари Эльмира Баситхонова иштирокида йиғилиш ўтказилди

Мамлакатимизда оналик ва болаликни муҳофаза қилиш, перинатал ва неонатал хизматларни такомиллаштириш бўйича изчил чора-тадбирлар амалга оширилмоқда. Соҳада замонавий тиббий технологияларни жорий этиш, оналар ва чақалоқларга кўрсатилаётган ёрдам сифатини ошириш ҳамда тизим самарадорлигини таъминлашга алоҳида эътибор қаратилмоқда.

Шу мақсадда, 4 март куни Амударё тумани Тиббиёт бирлашмаси мажлислар залида Ўзбекистон Республикаси Соғлиқни сақлаш вазирининг ўринбосари Эльмира Баситхонова иштирокида йиғилиш ўтказилди.

Унда Амударё, Беруний, Элликқалъа ва Тўрткўл туманлари тиббиёт бирлашмалари масъул ходимлари иштирок этишди. Тадбирда оналик ва болаликни муҳофаза қилиш борасида амалга оширилаётган ишлар таҳлил қилиниб, тиббий хизмат кўрсатиш тизимини янада яхшилаш юзасидан таклифлар билдирилди.

Жорий йилнинг 25 февраль куни Соғлиқни сақлаш вазири томонидан янги туғилган чақалоқларга, жумладан, муддатидан олдин чала туғилган ҳамда бемор чақалоқларга тиббий ёрдам кўрсатиш тизимини яхшилашга қаратилган янги қарор қабул қилинди. Қарорга кўра, Республика перинатал маркази мамлакат бўйлаб барча туғруқ муассасалари, жумладан, 46 та туманлараро перинатал марказ учун бош муассаса сифатида белгиланди.

Мазкур марказнинг асосий вазифалари перинатал ўлим ҳолатларини камайтириш учун барча туғруқ муассасаларида замонавий технологиялар ва тасдиқланган стандартларга асосланган неонатал ёрдам тизимини шакллантириш, ҳар ой, чорак ва йил давомида неонатал хизматлар самарадорлигини баҳолаш ва таклифлар киритиш, мамлакат бўйлаб неонатологларнинг малакасини ошириш ва уларга услубий ёрдам кўрсатиш ҳамда ҳудудлар билан ишловчи махсус мутахассисларни белгилашдан иборатдир. Шунингдек, ҳар бир ҳудудда неонатологик консультатив-реанимацион транспорт хизматини ташкил этиш ҳам режалаштирилган.

Соғлиқни сақлаш вазирининг 2025 йил 28 февралдаги қарорига мувофиқ, туғиш ёшидаги аёллар ва ҳомиладорларга тиббий хизмат самарадорлигини ошириш, сифатли антенатал парвариш тизимини жорий этиш назарда тутилган. Қарорга мувофиқ, ҳомиладорлик даврида антенатал парваришни сифатли ташкил қилиш, ҳомиладорликка қарши кўрсатмалар рўйхатини шакллантириш ва уларни амалиётда қўллаш, ҳомиладорликни тиббий ва ижтимоий асослар бўйича тўхтатиш жараёнини аниқ регламентлаш, оғир ҳомиладорлик асоратлари бўйича шошилинч тиббий ёрдам кўрсатиш тартибларини ишлаб чиқиш ҳамда оналик ва болалик бўйича махсус штаблар фаолиятини тартибга солиш белгиланди.

Оналар ва чақалоқлар ўлим ҳолатларининг олдини олиш мақсадида соғлиқни сақлаш тизимида муҳим чора-тадбирлар амалга оширилмоқда. Хусусан, оналар ва чақалоқлар ўлими билан боғлиқ клиник ва патологоанатомик текширувлар тартибини ишлаб чиқиш, барча туғруқ муассасаларида перинатал ва неонатал ўлимни расмий қайд этиш ва таҳлил қилиш тизимини жорий этиш, оналар ва чақалоқлар саломатлиги билан боғлиқ фавқулодда ҳолатларда шошилинч тиббий ёрдамни такомиллаштириш каби йўналишлар устида иш олиб борилмоқда. Барча туғруқ муассасалари, хусусан, “Аёллар маслаҳатхоналари бўлимлари” билан туғруқ стационарлари ўртасида мувофиқлаштирилган алоқа тизими йўлга қўйилиши ҳам белгиланди.

Соғлиқни сақлаш тизимидаги муаммолардан бири бўлган коррупцияга қарши курашиш ҳам давлат эътиборида. Барча тиббиёт муассасаларида таъмагирлик ва коррупция ҳолатларини бутунлай йўқ қилиш, шунингдек, соғлом ахлоқий муҳитни шакллантириш мақсадида ходимларнинг касбий мажбуриятлари қайта кўриб чиқилиши белгиланган. Туғруқ муассасалари ва “Аёллар маслаҳатхоналари бўлимларида” хизмат сифатини ошириш мақсадида раҳбарият томонидан ходимларнинг лавозимларини ротация қилиш ҳам назарда тутилмоқда.

Юқоридаги вазифалар билан Ўзбекистонда оналар ва чақалоқларга кўрсатиладиган тиббий ёрдам сифатини сезиларли даражада ошириш мақсад қилинган. Йиғилишда республика перинатал марказининг ташкил этилиши, ҳомиладорлар ва чақалоқлар учун янги тизимларнинг жорий қилиниши, шошилинч ёрдам хизматларининг такомиллаштирилиши ҳамда коррупцияга қарши қатъий чоралар кўрилиши ушбу соҳадаги туб ўзгаришларнинг муҳим қисми ҳисобланиши қайд қилинди.

Шоҳзод Қурбонбоев.