Қорақалпоғистон Республикаси Солиқ бошқармаси бошлиғи тадбиркорлар билан учрашди

Кичик ва ўрта бизнес ҳар қандай мамлакатнинг иқтисодий тараққиётида муҳим ўрин тутади. Бугунги кунда мамлакатимиз иқтисодиёти ҳажмининг ярмидан кўпи, саноат ва экспортнинг учдан бир қисми айнан кичик ва ўрта бизнес вакиллари ҳиссасига тўғри келмоқда.

Бу борада фаолият юритаётган тадбиркорлар сафини янада кенгайтириш, ишбилармонларнинг ўз салоҳиятини тўлиқ ишга солишлари учун зарур шароитлар яратиш мақсадида республикамиз бўйлаб кичик ва ўрта бизнес вакиллари иштирокида очиқ мулоқотлар ўтказилмоқда.

Қорақалпоғистон Республикаси солиқ бошқармаси бошлиғи Халмурза Бекчановнинг тахиятошлик тадбиркорлар билан учрашувида ҳам хусусий сектор вакилларига берилаётган имкониятлар, мавжуд муаммолар ҳақида фикр алмашилди.

Иштирокчиларга Ўзбекистон Республикаси Президентининг “Кичик ва ўрта бизнеснинг иқтисодиётдаги ўрнини ошириш чора-тадбирлари тўғрисида”ги фармонига мувофиқ берилаётган имкониятлар ҳақида батафсил маълумотлар берилди.

Айтиш жоизки, Қорақалпоғистон Республикасида 2024 йил якуни билан кичик тадбиркорлик субъектлари сони 34 минг 215 та, ўрта тадбиркорлик субъектлари сони 359 та, йирик тадбиркорлик субъектлари сони эса 30 тани ташкил этади.

Шунингдек, кичик ва ўрта бизнес вакиллари томонидан 2024 йилда 1 трлн. 298 млрд. сўм солиқлар тўланиб, бюджетга жами тушумдаги улуши 43 фоизни ташкил этган. Шу билан бир қаторда Ўзбекистон Республикаси Солиқ Кодекси, Ўзбекистон Республикаси Президенти қарор ва фармонларига ҳамда бошқа солиқ қонунчилигига асосан 2023 йил давомида 13 минг 714 та кичик ва ўрта бизнес вакилларига 447,8 млрд. сўм солиқ имтиёзлари қўлланилган бўлса, 2024 йил давомида 16 минг 597 та кичик ва ўрта бизнес вакилларига 622,3 млрд.сўм солиқ имтиёзлари қўлланилиб, бу кўрсаткич 39 фоизга ёки 174,5 млрд. сўмга ошган. Ушбу маблағлар тадбиркорлик фаолиятининг янада кенгайиб, янги иш ўринлари яратилишига асос бўлган.

Қорақалпоғистон Республикаси бўйича 2024 йилда жами бюджет тушумлари 3 триллион 29 млрд 217,8 млн сўмни ташкил этиб шундан, 1 трлн. 298 млрд 616,7 млн сўми, ёки жами бюджет тушумининг 42,9 фоиз кичик бизнес субъектлари ҳиссасига тўғри келади.

Шунингдек учрашувда тадбиркорларнинг солиқ имтиёзларидан фойдаланиш, солиқ ҳисоботлари, маъмурий ҳуқуқбузарлик, кредит ва солиқ ставкалари билан боғлиқ муаммо ва таклифлари ҳам тингланиб, уларни ижобий ҳал этиш чоралари кўрилди.

Солиқ органлари масъуллари ва тадбиркорлар ўртасидаги бу каби учрашувлар ўзаро ҳамкорликни мустаҳкамлашда муҳим ўрин тутади. Бундай мулоқотлар орқали тадбиркорлар солиқ қонунчилигидаги янгиликлар, имтиёзлар ва ҳисоб-китоб тартиблари ҳақида батафсил маълумот оладилар. Бу эса уларнинг фаолиятини қонуний асосда юритишларига кўмаклашади.

Шу билан бирга, бундай учрашувлар давомида тадбиркорлар ўзларини қийнаётган масалаларни очиқчасига баён қилиш имконига эга бўладилар. Солиқ органлари эса бу муаммоларни ўрганиб, уларни бартараф этиш бўйича аниқ чоралар кўрадилар. Бу нафақат тадбиркорлик муҳитини яхшилайди, балки ишбилармонлар ва солиқ органлари ўртасида ишонч муҳитини ҳам мустаҳкамлайди.