Дорихоналар фaoлиятини тартибга солиш юзасидан йиғилиш бўлиб ўтди

Республикамизда сўнгги йилларда дори воситалари, тиббий буюмлар ва тиббий техника муомаласини такомиллаштириш бўйича комплекс чора-тадбирлар амалга оширилиб келинмоқда. Аҳолини сифатли, хавфсизлиги ва самарадорлиги кафолатланган дори воситалари, тиббий буюмлар ва тиббий техника билан таъминлашни янада яхшилаш ҳамда фармацевтика маҳсулотлари муомаласини тартибга солиш жараёнлари такомиллаштирилмоқда.

Шу билан бирга, фармацевтика соҳасини ислоҳ қилиш, фармацевтика маҳсулотлари хавфсизлигини таъминлаш, уларни давлат рўйхатидан ўтказишни такомиллаштириш ва дорихоналар фаолиятини тартибга солишга масалаларига ҳам алоҳида эътибор қаратилмоқда.

Амударё тумани ҳокимлигининг мажлислар залида ушбу масалаларга бағишланган йиғилиш бўлиб ўтди. Йиғилишда Иқтисодий жиноятларга қарши курашиш департаментининг Амударё тумани бўлими бошлиғи Мақсет Утепбергенов, туман Солиқ инспекцияси бошлиғи ўринбосари Ислом Юсупов ҳамда тумандаги дорихона фаолияти билан шуғулланувчи тадбиркорлар иштирок этдилар.

Унда департаментнинг туман бўлими бошлиғи Мақсет Утепбергенов томонидан дорихоналар фаолиятини қўллаб-қувватлаш ва янада ривожлантириш борасида амалга оширилаётган ислоҳотлар, уларнинг мазмун-моҳияти хусусида, ушбу йўналишда келиб чиқиши мумкин бўлган ҳуқуқбузарликларнинг олдини олиш борасида тушунчалар берилди.

Таъкидланганидек, дорихоналар фаолиятини ривожлантириш мақсадида қатор фармон ва қарорлар қабул қилиниб, халқимизнинг соғлом ва узоқ умр кечиришини таъминлашга алоҳида эътибор қаратилмоқда, тизимдаги тўсиқлар бартараф этилмоқда.

Айтиш жоизки, тиббий хизматлар кўлами ва сифатини ошириш, фуқароларни сифатли ҳамда арзон дори воситалари билан таъминлаш мақсадида амалга оширилаётган ислоҳотлар ушбу соҳага долзарб масала сифатида қаралаётганидан далолат беради.

Хусусан, Ўзбекистон Республикаси Вазирлар Маҳкамасининг дори воситалари ва тиббий буюмларни ишлаб чиқариш, олиб кириш ва айланмасини ҳисобга олиш механизмларини тубдан такомиллаштириш ҳамда қонуний айланишини таъминлаш, шунингдек, ушбу маҳсулотларни мажбурий рақамли маркировкалаш тизимини жорий қилиш мақсадида имзоланган “Дори воситалари ва тиббий буюмларни мажбурий рақамли маркировкалаш тизимини жорий этиш тўғрисида”ги қарори бу борада муҳим дастуруламал бўлмоқда.

Мазкур қарор билан Давлат солиқ қўмитаси, Молия вазирлиги ҳамда Соғлиқни сақлаш вазирлигининг дори воситалари ва тиббий буюмларни гуруҳларга бўлинишини назарга тутган ҳолда идентификация воситалари орқали мажбурий рақамли маркировкалаш тизимини 2022-2025 йиллар давомида босқичма-босқич жорий қилиш тўғрисидаги таклифига розилик берилган ҳамда мажбурий рақамли маркировкалашни бошлаш муддатлари ҳамда дори воситалари ва тиббий буюмлар турлари кўрсатилган.

Шунингдек, йиғилишда Вазирлар Маҳкамасининг “Махсус электрон тизим орқали айрим фаолият турларини лицензиялаш тартиби тўғрисидаги ягона низомни тасдиқлаш ҳақида”ги қарори билан белгиланган дори воситалари ва тиббий буюмларини чакана реализация қилиш фаолиятини лицензиялаш талаблари ва шартлари асосида лицензия талабларига риоя қилиш зарурлиги хусусида сўз юритилди.

Чарос Арслонова, туман ҳокимлигининг Ахборот хизмати раҳбари.