Қорақалпоғистон деҳқончилик илмий-тадқиқот институтига пресс-тур ташкил қилинди

Қорақалпоғистон Республикаси Қишлоқ хўжалиги вазирлиги матбуот хизмати ташаббуси билан оммавий ахборот воситалари вакиллари учун Чимбой туманида жойлашган Қорақалпоғистон деҳқончилик илмий-тадқиқот институтига пресс-тур ташкил этилди. Тадбирдан кўзланган асосий мақсад – журналистларни Оролбўйи минтақаси қишлоқ хўжалиги ривожининг илмий асосларини яратаётган маскан фаолияти, эришаётган ютуқлари ва истиқболдаги режалари билан яқиндан таништиришдан иборат бўлди.

1958 йилда ташкил этилган ушбу илмий маскан нафақат Қорақалпоғистон, балки бутун мамлакатимиз аграр соҳаси учун муҳим аҳамиятга эга. Институт олимлари мураккаб тупроқ-иқлим шароитида қишлоқ хўжалик экинларининг янги навларини яратиш, уларнинг бирламчи уруғчилигини ташкил этиш ва ресурстежамкор агротехнологияларни ишлаб чиқишдек масъулиятли вазифани шараф билан адо этиб келмоқда. Институт тасарруфидаги 1022 гектардан ортиқ ер майдони, жумладан, қарийб 600 гектар суғориладиган майдонлар илмий изланишлар ва янги навларни синовдан ўтказиш учун хизмат қилмоқда.

Пресс-тур давомида журналистлар институтнинг илмий лабораториялари, тажриба далаларида бўлиб, бу ерда олимлар учун яратилган шароитлар, янги навларни синаш жараёнлари ва эришилган ютуқлар билан бевосита танишдилар. Институт раҳбарияти ва етакчи олимлари ОАВ вакилларига пахта, ғалла, мойли ва ем-хашак экинлари бўйича олиб борилаётган селекция ишлари, уларнинг натижалари ҳақида батафсил маълумот бердилар.

Қишлоқ хўжалигининг ривожида илмий-тадқиқот муассасаларининг, олимлар ва ихтирочиларнинг ўрни беқиёсдир. Айнан уларнинг машаққатли меҳнати туфайли маҳаллий тупроқ-иқлим шароитига мос, касаллик ва зараркунандаларга чидамли, серҳосил навлар яратилади. Бу эса ўз навбатида, фермер ва деҳқонларнинг меҳнатини енгиллаштириб, даромадини оширишга, мамлакат озиқ-овқат хавфсизлигини мустаҳкамлашга хизмат қилади. Қорақалпоғистон деҳқончилик илмий-тадқиқот институти ана шундай муҳим вазифани муваффақиятли амалга ошириб келаётган етакчи илмий марказлардан биридир.

Институтнинг илмий салоҳияти унинг энг катта бойлигидир. Бугунги кунда бу ерда 51 нафар ходим фаолият юритса, шундан 19 нафари илмий ходимлардир. Улар орасида 2 нафар фан доктори ва 7 нафар фан номзодининг борлиги илмий салоҳиятнинг 57,8 фоизга тенг эканлигидан далолат беради. Тажрибали ва ёш авлод олимларининг ҳамкорликдаги фаолияти институтнинг илмий ютуқлари гарови бўлмоқда.

Сўнгги йилларда институт олимлари томонидан яратилган ғўзанинг “Чимбой-5018” ва “КК-3535”, буғдойнинг “Шымбай” ва “Арал” каби серҳосил навлари Давлат реестрига киритилиб, ишлаб чиқаришга муваффақиятли жорий этилмоқда.

Институтда яратилган илмий натижалар нафақат селекция йўналишида, балки ем-хашак экинлари бўйича ҳам амалий самара бермоқда. Жумладан, беданинг бир неча навлари давлат реестрига киритилиб, Қорақалпоғистон, Хоразм ва Бухоро вилоятларида экиш учун тавсия этилди. Шунингдек, судан ўти ва Африка тариғининг янги навлари яратилиб, синовдан ўтказилмоқда. Бундан ташқари, институтда ғўза, буғдой, арпа, жўхори каби экинларнинг бирламчи уруғчилиги йўлга қўйилган.

Қорақалпоғистон деҳқончилик илмий-тадқиқот институтига уюштирилган пресс-тур жуда самарали ва мазмунли ўтди. Журналистлар Оролбўйи олимларининг машаққатли, аммо шарафли меҳнати, уларнинг мамлакат қишлоқ хўжалиги ривожига қўшаётган улкан ҳиссасига яна бир бор гувоҳ бўлдилар. Бу каби тадбирлар илм-фан ютуқларини кенг оммалаштириш, илмий ходимлар меҳнатини рағбатлантириш ва ёшларни илм-фанга жалб этишда муҳим аҳамият касб этади.