Диний экстремизм ва ақидапарастликка қарши тарғибот тадбири ўтказилди

Бугунги глобаллашув даврида тинчлик ва осойишталикни асраш, ёшларни турли ёт ғоялар таъсиридан ҳимоя қилиш ҳар қачонгидан ҳам долзарб масалага айланмоқда. Айниқса, диний ақидапарастлик, экстремизм ва терроризм каби таҳдидлар жамият барқарорлиги, миллатлараро тотувлик ҳамда инсон хавфсизлигига жиддий хавф туғдираётгани боис бу иллатларга қарши маърифат билан курашиш муҳим аҳамият касб этмоқда.

Шу мақсадда Қорақалпоғистон Республикаси Вазирлар Кенгаши томонидан тасдиқланган иш-режага мувофиқ, Амударё туманида “Жаҳолатга қарши маърифат” шиори остида диний ақидапарастлик, экстремизм ва терроризм таҳдидларининг олдини олишга қаратилган кенг қамровли тарғибот тадбири ташкил этилди.

Туман ҳокимлиги мажлислар залида ўтказилган тадбирни туман ҳокими ўринбосари Нодирбек Камолов олиб борди. Унда давлат ва жамоат ташкилотлари вакиллари, маҳалла фаоллари, таълим соҳаси ходимлари, хотин-қизлар фаоллари ҳамда ёшлар иштирок этди.

Тадбирнинг асосий мақсади жамиятда ҳушёрликни кучайтириш, айниқса ёш авлодни турли бузғунчи ғоялар таъсиридан асраш, диний бағрикенглик ва миллатлараро тотувликни мустаҳкамлашдан иборат бўлди.

Тадбир давомида Дин ишлари қўмитасининг Қорақалпоғистон Республикаси ҳудудий бошқармаси бош мутахассиси Нурулла Жамолов диний ақидапарастликнинг асл моҳияти, унинг жамият учун хавфли жиҳатлари ҳақида атрофлича тўхталди. Таъкидланганидек, ақидапарастлик — бу диний тушунчаларни нотўғри талқин қилиш, муросасизликни тарғиб этиш ва жамиятда низоларни келтириб чиқаришга хизмат қилувчи зарарли оқимдир. Бундай ғоялар ёшларнинг онгини заҳарлаб, уларни ота-она, Ватан ва жамият манфаатларига зид йўлларга бошлаши мумкинлиги алоҳида қайд этилди.

Шунингдек, экстремистик оқимлар интернет ва ижтимоий тармоқлар орқали ёшларни ўз домига тортишга уринаётгани, турли ёлғон ваъдалар, диний шиорлар билан уларнинг ишончидан фойдаланаётгани ҳақида огоҳлантирилди. Мутахассислар бугунги кунда ахборот хуружларига қарши энг кучли қурол — бу илм, тафаккур ва мустаҳкам маънавият эканини таъкидлади.

Дин ишлари бўйича қўмитанинг Қорақалпоғистон Республикаси бошқармаси хотин-қизлар масалалари бўйича етакчи мутахассис Хурайим Ибрагимова оиладаги соғлом муҳит, фарзанд тарбияси ва оналарнинг ҳушёрлиги масаласига алоҳида эътибор қаратди. Унинг таъкидлашича, фарзанд тарбиясига бефарқлик, назоратнинг сустлиги ва маънавий бўшлиқ айрим ёшларнинг ёт ғоялар таъсирига тушиб қолишига сабаб бўлиши мумкин. Шу боис оилада китобхонликни ривожлантириш, фарзандлар билан доимий мулоқот қилиш ва уларнинг қизиқишларига эътибор бериш муҳим омил экани қайд этилди.

Қорақалпоғистон Республикаси Ички ишлар вазирлиги масъул вакили Нурабулла Минажов эса терроризм ва экстремизмнинг бугунги хавфли кўринишлари, уларнинг жамият хавфсизлигига салбий таъсири ҳақида таҳлилий маълумотлар берди. Терроризмнинг ҳеч қандай миллат ва дин танламаслиги, у инсониятга қарши жиноят экани таъкидланди. Дунёнинг турли ҳудудларида содир бўлаётган террорчилик ҳаракатлари минглаб бегуноҳ инсонларнинг ҳаётига зомин бўлаётгани, иқтисодий ва ижтимоий барқарорликка катта зарар етказаётгани мисоллар орқали тушунтирилди.

Тадбирда диний бағрикенглик, ўзаро ҳурмат ва ҳамжиҳатлик халқимизнинг азалий қадрияти экани алоҳида эътироф этилди. Ўзбекистонда барча миллат ва дин вакилларининг тинч-тотув яшаши учун яратилган имкониятлар, давлат томонидан олиб борилаётган инсонпарвар сиёсат юртимиздаги осойишталикнинг муҳим омили экани қайд қилинди.

Йиғилишда туман ҳокими ўринбосари, Оила ва хотин-қизлар бўлими бошлиғи Гўзал Сабурова, маҳалла еттилиги ҳамда тегишли ташкилот вакиллари ҳам иштирок этиб, жойларда профилактик тадбирларни кучайтириш, ёшлар билан манзилли ишлаш ва маънавий-маърифий тарғиботни янада фаоллаштириш юзасидан фикр алмашдилар.

Дарҳақиқат, бугунги мураккаб замонда ҳар бир фуқаронинг ҳушёрлиги, фарзанд тарбиясига масъулият билан ёндашуви ҳамда маънавий қадриятларга содиқлиги юрт тинчлиги ва жамият осойишталигининг энг муҳим кафолатидир.

Чарос Арслонова, туман ҳокимлигининг Ахборот хизмати раҳбари.