Афғон уруши фахрийларига юбилей медаллари топширилди

Инсоният тарихида шундай воқеалар борки, уларнинг сурони йиллар ўтса-да, қалбларда акс садо бераверади. Тинчликнинг қадрини ва мусаффо осмонимизнинг бебаҳо неъмат эканини теран англашда ўтмишнинг ана шундай саҳифаларини ёдга олиш, уруш даҳшатларини ўз кўзи билан кўрган инсонларнинг ҳаёт йўлига назар ташлаш муҳим аҳамият касб этади. Мустақиллик байрами арафасида Амударё тумани тарихи музейида ана шундай тадбир ўтказилди.

1979–1989 йиллар давомида собиқ иттифоқ қўшинлари таркибида Афғонистон заминида ҳарбий хизмат вазифасини ўтаган афғон уруши иштирокчилари ва собиқ қуролдошлар иштирокида ўтказилган тантанали йиғилиш “Ветеран” жангчи фахрийлар бирлашмасининг Қорақалпоғистон Республикаси бўлими Амударё тумани вакили томонидан ташкил этилди.

Йиғилишда Беларус Республикасидаги Афғон уруши фахрийлари уюшмаси вакиллари, хусусан, нафақадаги подполковник Олег Бекниязов ва Анатолий Сущицкийлар меҳмон сифатида иштирок этишди.

Тантанали маросим давомида жасорати ва садоқати учун 4 нафар ватандошимиз “Хизматлари учун” медали билан тақдирланди. Улар сафида 1980–1982 йилларда Афғонистонда хизмат қилган Бозорбой Матқурбанов, 1982–1984 йилларда ҳарбий хизмат бурчини ўтаган Озодбой Хўжаниёзов, 1985–1987 йилларда афғон заминида хизмат қилган Комилжон Собиров ҳамда Икром Ражабовлар бор. Бундан ташқари, Афғонистондан совет қўшинлари олиб чиқилганига 20 йил тўлиши муносабати билан таъсис этилган юбилей медали 5 нафар фахрийга тантанали равишда топширилди. Ушбу юксак эътирофга 1979–1981 йилларда хизмат қилган Шавкат Шомуратов, 1986–1988 йилларда йигитлик бурчини бажарган Раҳматулло Хайитбоев, 1985–1987 йилларда армия сафида Афғонистонда хизмат қилган Анвар Балтабоев, шунингдек, 1981–1983 йилларда афғон урушида иштирок этган Умирбек Нуримбетов ва 1984–1986 йилларда бу қонли тўқнашувларда қатнашган Абдулло Авезовлар сазовор бўлдилар.

Шу билан бирга, собиқ иттифоқ қўшинларининг Афғонистондан олиб чиқилганига 25 йил тўлганлиги муносабати билан таъсис этилган медаль 1984–1986 йилларда хизмат қилган Қадамбой Эримбетовга топширилди. Тадбирнинг мукофотлаш қисмида Фарҳод Атожонов ва Бозорбой Шамуродовлар ҳам эсдалик юбилей медаллари билан тақдирланиб, уларнинг ҳам узоқ йиллик хизматлари муносиб эътироф этилди.

Тадбир ташкилотчилари томонидан меҳмондорчилик ва юксак ҳурмат рамзи сифатида беларусиялик меҳмонларга ҳам “Ветеран” жангчи фахрийлар уюшмасининг эсдалик медали ҳамда махсус кўкрак нишони топширилди. Учрашувнинг тантанали қисми якунига етгач, меҳмонлар Амударё тумани музейига ташриф буюриб, у ердаги ноёб экспозициялар, туманнинг бой тарихи ва ўзига хос маданияти билан яқиндан танишдилар.

Собиқ ҳарбий хизмат фахрийлари билан мунтазам равишда ўтказиб келинаётган бу каби жонли учрашувлар жамиятимизда ғоят муҳим тарбиявий аҳамият касб этади. Бундай тадбирлар ўсиб келаётган ёш авлод қалбида юксак ватанпарварлик туйғусини шакллантиришга, уларни мардлик ва фидойилик руҳида тарбиялашга, энг асосийси, бугунги кундаги осойишта ҳаётимиз ва тинчликнинг ҳақиқий қадрини чуқур англатишга беминнат хизмат қилади.