Эл саломатлиги йўлида

Мамлакатимизда аҳоли саломатлигини таъминлаш борасида олиб борилаётган изчил ва кенг кўламли ишлар самарасида бугун қишлоқда ҳам шаҳардаги тиббиёт масканларидан қолишмайдиган замонавий тиббий шароитларга эга, моддий-техник негизи мустаҳкам бирламчи шифо масканлари фаолият кўрсатмоқда. Туманимиздаги "Маданият” қишлоқ врачлик пункти ҳам шу каби тиббиёт муассасалари сафига киради.

Айтиш жоизки, мустақиллик йилларида барча соҳаларда бўлгани каби соғликни сақлаш тизимида ҳам туб ислоҳотлар амалга оширилиб, бугун соғликни сақлаш муассасалари жаҳон андозалар талаблари даражада фаолият кўрсатмоқда.

Айниқса қишлоқ аҳолиси тиббий хизмат кўрсатиш тубдан яхшилаш мачсадида қишлоқ врачлик пунктлари фаолияти йўлга қўйилиб, аҳолини соғлигини сақлашга хизмат қилмоқда. Тиббиёт мутахассислари маҳаллалар ва таълим муассасаларида соғлом турмуш тарзини шакллантириш, эрта ва қариндошлар ўртасидаги никоҳларнинг олдини олиш бўйича тарғибот тадбирларини мунтазам ўтказиб келмоқдалар. Қишлоқ врачлик пунктларидаги умумий амалиёт, кундузги шифохона, физио, лаборатория, аёллар кўриги, эмлаш, муолажа, стерилизация хоналари ҳамда дорихоналар замон талаблари даражасида фаолият юритмоқда. Замонавий тиббиёт таҳлил-ташҳис аппаратлари репродуктив ёшдаги аёллар, болалар ва ўсмирлар тиббий кўригини юқори савияда ташкил этишда муҳим аҳамият касб этмоқда. Натижада аҳолининг саломатлиги кун сайин яхшиланиб, касаллик кўрсаткичлари камайиб бормоқда. Туманимиздаги "Маданият” қишлоқ врачлик пункти ходимлари ҳам шу каби мақсад ва вазифаларни олдига қўйган ҳолда иш олиб бормоқдалар. Мазкур тиббиёт муассасаси 2001 йилда иш бошлаган ва туманимизнинг Тўлқин ва Чойкўл овули аҳолиси сифатли тиббий хизмат кўрсатиб келмоқда.

Қишлоқ врачлик пункти хизмат кўрсатадиган ушбу ҳудудларда жами 5552 нафар аҳоли истиқомат қилади. Шундан туғиш ёшидаги аёллар сони 1573 нафар, бир ёшгача бўлган болалар 96 нафар, ўсмирлар 290 нафар, 14 ёшгача бўлган болалар 1539 нафар, катталар эса 3501 нафарни ташкил этади. "Маданият” қишлоқ врачлик пунктида 3 та умумий амалиёт шифокорлари, 10 нафар ҳамширалар хизмат қилади. Қишлоқ врачлик пункти Саломатлик-1 лойиҳаси доирасида тиббий асбоб-ускуналар билан тўлиқ жиҳозланган.

Айтиш жоизки, мунтазам равишда ўтказиб келинаётган "Саломатлик ҳафталиги" тадбирлари бугун ўз самарасини бериб, аҳолининг тиббий билим даражаси ошишига хизмат қилмоқда. Аҳоли саломатлигини мустаҳкамлашга йўналтирилган бундай профилактика тадбирлари доирасида туманимизда ҳам республика тиббиёт муассасаларининг малакали шифокорлари, "Она ва бола" скрининг маркази, Республика саломатлик ва тиббий статистика институти ҳудудий бўлими мутахассисларидан иборат гуруҳлар жойларда бўлиб, хотин-қизлар, болалар ва ўсмирларни чуқурлаштирилган тиббий кўрикдан ўтказмоқда.

Бу каби хайрли ишларда "Маданият” қишлоқ врачлик пункти ходимлари ҳам фаол иштирок қилиб, чуқурлаштирилган тиббий кўрикка аҳолини жалб қилиш ва текширув ўтказиш ишларида яқиндан ёрдам бериб келмоқда.

Бугунги кунда бирламчи тиббиёт муассасалари нафақат тиббий хизмат кўрсатиш ўрни, балки ҳудудда соғлом турмушни тарғиб этиш масканига ҳам айланмоқда. Аҳоли саломатлигини муҳофаза қилиш, қишлоқларда тиббий-санитария хизматини янги сифат босқичига кўтариш бўйича белгиланган дастурларни амалга оширишда "Маданият” қишлоқ врачлик пункти ходимлари ҳам фидойилик билан иш олиб бормоқдалар.