КИТОБХОН ЁШЛАР ИШТИРОКИДА КУТУБХОНАГА САЁҲАТ ТАШКИЛ ЭТИЛДИ
Ёшларнинг комил инсонлар бўлиб вояга етишларида китоб ва китобхонликнинг аҳамияти ниҳоятда каттадир. Китобхонлик ёшларнинг маънавий дунёсини бойитади, уларни ҳалол яшаш ва тўғри йўлга бошлайди. Китоб ҳаётни чуқур англаб етишга, инсоннинг ўз танлаган орзуларига эришишга ёрдам беради.
Амударё телевидениесида Олий мажлис ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш Жамоат фонди томонидан молиялаштирилган “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ёшлар ўртасида китобхонликни кенг тарғиб қилиш мақсадида тумандаги Ахборот-ресурс марказига мактаб ўқувчилари иштирокида экскурсия ташкил қилинди.
Шу йил 16 март куни ёшларни китобларга ошно қилиш, ўқувчиларни кутубхонага жалб этиш каби мақсадларда ташкил этилган ушбу тадбирга 36-сонли мактаб ўқувчилари, “Тараққиёт кўзгуси” газетаси, Амударё телевидениеси таҳририяти ходимлари ташриф буюришди.
Кутубхонада ёшларни туман Aхборот-кутубхона марказининг ахборот-библиография хизмати раҳбари Роҳатой Романова бой китоб фонди билан таништирди. Марказда турли мавзулардаги адабиётлар, Ўзбекистон ва Қорақалпоғистон миқёсидаги даврий нашрлар ҳам жамланган.
Ҳозирги кунда туман Aхборот-кутубхона маркази Ойбек номли маҳалладаги янги бинода фаолият кўрсатмоқда. Аввал ўз биносига эга бўлмаган ушбу масканда эндиликда фойдаланувчиларга ахборот-кутубхона хизмати кўрсатиш янги даражага кўтарилди. Кутубхона хизмати талабларига жавоб берадиган барча шароитлар, қулайликлар яратилиб, замонавий жиҳозлар билан таъминланди. Энг муҳими – китоб фонди янада бойитилди. Марказ аҳолини зарурий адабиётлар ва ахборот билан тўла-тўкис таъминлаш имкониятига эга бўлган замонавий зиё масканига айланди. Замонавий шароитлар яратилган хоналарга турли мавзулардаги китоблар чиройли жавонларга жойлаштирилиб, китобхонлар учун ҳам қулай шароитлар яратилди. Шунингдек, ходимлар учун, китоб мутолааси учун ва электрон китоблардан фойдаланиш учун ҳам алоҳида хоналар ажратилди.
Ахборот-кутубхона фонди турли йўналишдаги кўплаб адабиётлар билан тўлдирилиб, айни кунда унинг китоблар жамғармаси 64 минг нусхага яқин, электрон ресурслари эса 175 номга етди. Фойдаланувчилар сони эса мазкур йилда 14 минг нафардан ортди. Кутубхона бой меросга эга бўлиб, турли даврларга тааллуқли китоблар, ўтган йиллардаги газета ва журналлар сақланиб, муштарийларга ҳавола этиб борилмоқда. Ундан ташқари, кутубхона фойдаланувчилари, ташриф буюрувчиларни фондда сақланиб келинаётган манбалар билан таништириш, тарғиб қилиш мақсадида мавзули кўргазмалар, тадбирлар ва ижод аҳли билан учрашувлар ташкил этиб келинмоқда.
Экскурсия давомида мактаб ўқувчиларига кутубхонага аъзо бўлиш, китобларни танлаш ва уйга олиб кетиб ўқиш тартиблари тушунтирилди. Шунингдек уларга ўқиш залида фан китобларига қўшимча бўлган китоблардан фойдаланиш мумкинлиги, электрон китобларни мутолаа қилишларига шароит мавжудлиги ҳам айтиб ўтилди.
Ёшлар кутубхонадаги турли адабиётлар, газета ва журналлар билан танишиб чиқишди. Шу ернинг ўзида кутубхонага аъзо бўлиб, бой китоб фондидан, севимли адабиётларини қийналмасдан топишда кутубхона хизматидан фойдаланиш имкониятига эга бўлишди.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
