ҚОРАҚАЛПОҚ АДАБИЁТИНИНГ ЙИРИК НОМАЁНДАЛАРИ ХОТИРАСИГА ҲУРМАТ-ЭҲТИРОМ КЎРСАТИЛДИ

Умумтаълим мактабларида ўқувчиларнинг билими, одоби ва ахлоқий сифатларини баҳолаб бориш орқали уларнинг фаоллигини оширишга алоҳида эътибор қаратилади. Чунки синфдошлари ва мактабдошлари даврасида ўзи эришаётган ютуқлари ҳақида алоҳида эътироф этилиб, маънавий рағбатлантирилган ўқувчи ўз устида янада самаралироқ ишлашга, янги ютуқларга эришишга интилади.

Амударё туманидаги 1-сонли умумтаълим мактаби педагогика жамоаси томонидан ўқувчиларнинг ижтимоий фаоллигини оширишнинг ўзига хос ва самарали услубидан фойдаланилади. Мактабда ҳар душанба ва жума кунлари эрталабки сафланиш ўтказилади. Бу сафланиш вақтида ўқувчиларнинг ҳафта давомида олган билимлари, ютуқ ва камчиликлари таҳлил қилинади. Алоҳида муваффақиятга эришган ўқувчи-ёшлар мактабдошларига намуна қилиб кўрсатилади ҳамда уларнинг ютуқларини мактаб миқёсида оммалаштиришга қаратилган тарғибот тадбирлари ҳам ўтказилади. Душанба кунлари эса янги ўқув ҳафтаси учун режалар белгилаб олинади.

Жорий йилнинг 5 май санасидаги сафланиш ҳафта якунига бағишланди. Унда анъанага кўра, аълочи, жамоатчи ва изланувчан ўқувчилар бошқаларга ибрат қилиб кўрсатилди. Сафланиш тадбири давомида Ўзбекистон Қаҳрамонлари, Ўзбекистон ва Қорақалпоғистон халқ шоири Ибройим Юсупов ҳамда Ўзбекистон ва Қорақалпоғистон халқ ёзувчиси Тўлепберген Қаипберганов таваллудининг 94 йиллигига бағишланган адабий хотира кечаси, шунингдек, фаол ўқувчи-ёшларни тақдирлаш маросими ўтказилди.

Қорақалпоқ ва ўзбек адабиётининг забардаст намоёндалари, халқимизнинг азиз фарзандлари Ибройим Юсупов қаламига мансуб шеърларни ўқувчилар маҳорат билан ёддан ўқиб бердилар. Шунингдек, Қорақалпоқ ва ўзбек адабиётига ўзининг бетакрор ижодий фаолияти, бири-биридан қизиқарли нодир асарлари билан муносиб ҳисса қўшган Тўлерберген Қаипберганов асарлари ҳақида тўлқинланиб сўз юритдилар.

Тадбир давомида “Ёш гвардиячилар” мусобақасининг Амударё тумани босқичида фахрли 3-ўринни эгаллаган “Қалқон” жамоаси томонидан Хотира ва қадрлаш куни муносабати билан жанговор машқлар намойиш этилди.

Шундан сўнг, “Ёш гвардиячилар” мусобақасининг туман босқичида фахрли 3-ўринни эгаллаган “Қалқон” жамоаси аъзолари, спорт мусобақалари ҳамда фанлар олимпиадаси, турли хил кўрик-танловларда иштирок этиб, ғолиб ва совриндор бўлган ўқувчилар мактаб маъмурияти томонидан муносиб тақдирландилар.

Сафланиш тадбиридан сўнг, мактабнинг қорақалпоқ тили ўқитувчиси Аптабида Абдумуратова томонидан қорақапоқ адабиёти йирик намоёндалари Ибройим Юсупов ҳамда Тўлерберген Қаипбергеновлар ижодига бағишланган давра суҳбати ҳам ташкил этилиб, унда қорақалпоқ тили фани услуббирлашмаси ва “Зийвар” тўгараги аъзолари иштирок этишди.

Қизиқарли савол-жавоблар Ибройим Юсупов шеърияти ва Тўлепберген Қаипбергенов асарларининг бадиий қиммати, тили ва услуби, улар яратган замонамиз қаҳрамонларининг ёшлар таълим-тарбиясида тутган ўрни ҳақида сўз юритилди. Шу билан бирга Ибройим Юсуопв шеърияти ҳамда Тўлепберген Қаипбергенов асарларининг билимдонлари ҳам аниқланиб, алоҳида эътироф этилди. Қорақалпоқ тили ўқитувчиси Аптабида Абдумуратова “Зийвар” тўгараги аъзолари учун Қорақалпоқ тили ва адабиётининг халқимиз маънавиятини юксалтиришдаги жуда катта аҳамияти хусусида сермазмун маъруза қилди ҳамда тўгарак аъзоларининг бу борадаги билимларини синовдан ўтказиш мақсадида қорақалпоқ фольклор адабиёти хазинаси дурдоналаридан парчалар ўқиб бериб, заковат ўйинлари ўтказди. Ўз навбатида тўгарак аъзолари қорақалпоқ фольклор адабиёти юзасидан ўзларини қизиқтирган саволлар билан мурожаат қилдилар. Барча саволларга Аптабида Абдумуратова бири-биридан қизиқарли халқ оғзаки ижоди намуналари орқали жавоблар берди.

Мактабда ўтказилган Сафланиш тадбири доирасидаги Хотира ва қадрлаш кунига бағишланган адабий кеча, шунингдек “Зийвар” тўгараги аъзолари иштирокидаги давра суҳбати қизиқарли таассуротларга бой тарзда ўтди.

Робия ЙЎЛДОШЕВА.