Қорақалпоғистон Республикаси Прокурори ўринбосари Ерполат Қаипбергенов иштирокида сайёр қабул бўлиб ўтди

Бугун “Халқ давлат идораларига эмас, давлат идоралари халқимизга хизмат қилиши керак” деган чақириқ турмушимизнинг барча соҳаларида ўз ифодасини топмоқда. Барча даражадаги давлат идоралари халқимизнинг оғирини енгил қилишга баҳоли қудрат ҳисса қўшаётир. Айниқса Президентимизнинг “Аҳоли муаммолари билан ишлаш тизимини янада такомиллаштириш чора-тадбирлари тўғрисида”ги Фармонига мувофиқ аҳоли ва давлат органлари ўртасида очиқ мулоқот йўлга қўйилиб, долзарб муаммолар тилга олинмоқда ва бу муаммолар ижобий ҳал этилмоқда.

12 июль куни Манғит шаҳрининг Фаровон маҳалласида Қорақалпоғистон Республикаси Прокурори ўринбосари Ерполат Қаипбергенов томонидан ўтказилган сайёр қабулда ҳам аҳоли турмушидаги кўпгина муаммолар ечим топди.

Сайёр қабулда 2-сектор ҳудудидаги маҳалла тизими ходимлари, тегишли корхона ва ташкилот раҳбарлари ҳамда ўз муаммолари билан ташриф буюрган фуқаролар иштирок этишди.

Қабулда дастлаб иштирокчиларга ҳукуматимизнинг аҳоли турмуши фаровонлигини, сифатини ошириш борасида олиб борилаётган ишлар, бу борада қабул қилинаётган қарорлар ҳақида қисқача тушунтириш берилди. 2-сектор ҳудудига кирувчи маҳаллаларда ижтимоий ҳимояга муҳтож, кам таъминланган оилаларни қўллаб-қувватлаш, аҳолига муносиб турмуш шароити яратиш, ёшларнинг тадбиркорлик ташаббусларини қўллаб-қувватлаш сектор масъулларининг доимий эътиборида эканлиги таъкидланди.

Шундан сўнг, аҳоли мурожаатлари тингланди. Қабул давомида 33 нафар фуқаро томонидан турли мазмундаги мурожаатлар келиб тушди. Шулардан 2 та мурожаат тергов ва суриштирув фаолиятига оид бўлса, 31 таси ижтимоий соҳага оид мурожаатлар бўлди.

Ушбу мурожаатларнинг айримлари сектор масъуллари томонидан ижобий ҳал этилди, айримларига аниқ ва муддат белгиланиб, баъзиларига батафсил тушунтиришлар берилди. Ҳал қилиниши лозим бўлган мурожаатлар юзасидан тегишли масъул ходимларга топшириқлар берилиб, ижроси учун муддат белгиланди.

Шу ўринда қайд этиш лозимки, бугун ҳар бир фуқаро учун барча давлат органлари ва ташкилотларининг эшиклари очиқ. Давлат идоралари раҳбарлари фуқароларнинг мурожаатларини иш хоналарида эмас, балки жойига бориб, ҳақиқий ҳолатни кўрган ва ўрганган ҳолда кўриб чиқмоқдалар.       

Бу борада муҳим восита бўлаётган сайёр қабуллар аҳоли муаммоларини жойида, тез ва самарали ҳал этиш имконини бераётгани билан аҳамиятлидир. Сайёр қабулларда иштирок этиб, мурожаат қилаётган юртдошларимиз эса давлат органлари ва ташкилотлари олдига вазифалар қўяётгани сабабли ҳудудларда йиғилиб қолган муаммоларни аниқлаш ва уларни бартараф этиш ишлари қисқа фурсатларда амалга оширилмоқда. Бу эса ҳудудларимизнинг янада ривожланиб, аҳоли турмушининг кун сайин фаровон бўлиб бораётганининг бош омили бўлмоқда.

Туман ҳокимлигининг Ахборот хизмати.