“Ё сиз келинг, ё биз борамиз”: “китоблар карвони” навбатдаги таълим масканига ташриф буюрди

“Илм излаб бормайди, илмни излаб келадилар” деган эди донолардан бири. Ушбу қисқа жумлаларда не маъно яширин? Агарда инсон етукликка, илм олишга ва маънавий оламини бойитишга бел боғласа ўқисин, излансин, шахсан ўзи ҳаракат қилсин ва кўзлаган мақсадига эришсин, деган мазмун бор унда. Аммо бугунги тараққий топган замонда илм-у маърифат, маънавият инсонни ўзи “излаб” келиши ҳам мумкин. Қандай дейсизми?! Айтайлик, маънавий камолот воситаси бўлган “китоблар карвони” сиз таълим олаётган масканга ёки сиз истиқомат қилаётган маҳаллага бориши мумкин.

“Тараққиёт кўзгуси” газетаси таҳририятининг “Билимли ва маънавиятли ёшлар билан – Учинчи Ренессанс сари!” номли грант лойиҳаси ана шундай имкониятни тақдим этмоқда.

Яқиндагина газета таҳририяти ходимлари, лойиҳа ижрочилари ушбу грант лойиҳаси доирасида Амударё туманининг 2-сектори ҳудудида жойлашган 64-сонли мактабга ташриф буюришди. Турли хил жанрдаги адабиётларни ўз ичига олган китоблар жамланган “китоблар карвони” мактабга ва китобсевар ўқувчилар қалбига зиё таратиб кириб келди.

Тадбирда “Тараққиёт кўзгуси” газетаси мухбири Маҳмуджон Шомуродов, Амударё телевидениеси суҳандони Азиза Мадраҳимова, газета мухбири Шаҳзод Қурбонбоев, мактаб директорининг маънавий-маърифий ишлар бўйича ўринбосари Акбар Холниёзов ҳамда мактабнинг илмга чанқоқ 9-10-синф ўқувчилари иштирок этишди.

Тадбирни мактаб директорининг ўринбосари Акбар Холниёзов очиб берди. У ўз сўзида ўқувчиларнинг ҳаётида китобнинг тутган ўрни ҳақида айтиб ўтди. Китоб ўқиган инсон саломидан маълум экани, кенг дунёқарашга эга бўлиш учун ҳам китоблар ўқувчининг дўсти эканлигига алоҳида урғу берилди. Шундан сўнг лойиҳа координатори, журналист Азиза Мадраҳимова ўқувчиларни таҳририят қошидаги кутубхонадан келтирилган “китоблар карвони” билан қисқача таништириб ўтди. Мазкур китоблар жамланмасида бадиий, илмий, мотивацион йўналишда ёзилган тўпламлар борлигини айтиб, ҳар бир киши ўз қизиқишидан келиб чиққан ҳолда мутолаа қилиши мумкинлигини билдирди. Шунингдек, китоб ўқиш нафақат маънавий озуқа олиш учун кераклигини, балки, ҳаётда ўз ўрнингни топиш, карьера қилиш, ҳаттоки нозик оилавий муносабатларни мустаҳкамлаш учун ҳам зарурлигини таъкидлаб ўтди. Дарҳақиқат, китоб ўқийдиган, маънавияти бой, ўзаро ҳурмат, меҳр-оқибат кучли бўлган оила ҳеч қачон ажрим ёқасига келиб қолмайди.

Журналист Шаҳзод Қурбонбоевнинг китобхонлик ҳақидаги ҳаётий кузатувлари билан йўғрилган фикрлари эса даврани жонлантирди. Шунингдек, у ўқувчиларнинг келажакдаги режалари билан қизиқди.

Тадбирда айниқса, 9-синф ўқувчилари бўлган Дилшода Султанова ҳамда Олтиной Ҳайдароваларнинг бугунги глобаллашув даврида китобларнинг аҳамияти тўғрисидаги фикрлари тенгдошларини мушоҳадага чорлади.

Тадбир сўнгида ўқувчилар “китоблар карвони”дан жой олган адабиётлар билан яқиндан танишдилар. Аксарият ўқувчилар таҳририят қошида ташкил қилинган кутубхонага аъзо бўлишга қизиқиш билдирди ҳамда грант лойиҳаси доирасида ташриф буюрган ижодий гуруҳга ташаккур айтиб, ўқувчи маънавиятини бойитадиган бундай тадбирларни тез-тез ўтказиб туриш кераклигини таклиф қилдилар.

Азиза Мадраҳимова