Ғалладан бўшаган далаларга такрорий экин экиш бўйича семинар бўлиб ўтди

Амударё туманидаги Қангли овулида ғалладан бўшаган экин майдонларига такрорий экинларни экиш юзасидан семинар бўлиб ўтди. Семинарда туман ҳокими Собир Хўжаметов, секторлар раҳбарлари, ҳоким ўринбосарлари, қишлоқ хўжалиги бўлими масъуллари, фермерлар иштирок этдилар.

Семинарда туман ҳокими Собир Хўжаметов сўзга чиқиб, бу йилги ғалла ҳосилининг мўл бўлганини, ғалладан бўшаган далаларга такрорий экинларни ўз вақтида экиш, агротехник тадбирларни сифатли амалга ошириш орқали экин майдонлардан самарали фойдаланиш ҳамда қишлоқ хўжалиги маҳсулотларидан яхши ҳосил олиш борасида олиб борилиши лозим бўлган ишлар хусусида тўхталди. Семинарда қишлоқ хўжалиги соҳаси масъуллари туманда жорий йилги эртаки экинлардан ва ғалладан бўшайдиган экин майдонларни ишсиз фуқароларга ажратиб бериш борасида қилинаётган ишлар тўғрисида маълумот берди.

Маълумотларда келтирилишича, 4 та сектор ҳудудида жами 183та фермер хўжаликларининг умумий майдони 632 гектар бўлган экин майдонлари такрорий экинлар учун ажратилиши режалаштирилган. Ушбу экин майдонлари туман бўйича жами 1154 нафар ишсиз фуқароларга қишлоқ хўжалиги маҳсулотларини экиб фойдаланишлари ҳамда даромад олишлари учун ажратиб берилмоқда.

Шундан, 1-сектор ҳудудидан 62та фермер хўжалигининг ғалладан бўшаган 195,4 га экин ер майдонлари 355 нафар ишсиз фуқароларга ажратилмоқда. 2-сектор ҳудудидаги 29та фермер хўжаликларининг 102,1 га экин ер майдонлари эса 427 нафар ишсиз фуқароларга бўлиб берилмоқда. Бундан ташқари, 3-сектор ҳудудида 65та фермер хўжаликларининг салкам 100 га ер майдони 245 нафар, 4-сектор ҳудудудаги 27та фермер хўжаликларининг 30,3 га экин ер майдонлари 127 нафар ишсиз фуқароларга такрорий экинлар экиб, даромад олишлари учун ажратилмоқда.

Таъкидлаш керакки, бугунги кунда республика бўйича эртаки экинлардан ва ғалладан бўшаган майдонларга такрорий экинларни экиш ишлари жадал суръатларда олиб борилмоқда. Мамлакатимизда ушбу-чора тадбирлар асосан июнь-июль ойларида амалга оширилади. Такрорий экинларни экишнинг афзаллиги шундан иборатки, мавжуд ер ресурсларидан самарали фойдаланиб, йил давомида халқимиз дастурхонига қишлоқ хўжалиги маҳсулотларини узлуксиз етказиб бериш имконияти яратилади.

Такрорий экинларни экиш мавсуми ёз фаслига, республикамизда ҳаво ҳароратининг максимал даражада ошган кезларига тўғри келмоқда. Бу эса, уруғларнинг униб чиқиши учун тегишли намлик заҳирасини тўплаш заруриятини пайдо қилади. Шунинг учун такрорий экин сифатида дуккакли дон, мойли ва ем-хашак экинлари уруғларини экишга эътибор қаратилмоқда.

Айтиш жоизки, ғалладан бўшаган ер майдонларига такрорий экин экиш тупроқдаги озуқа моддалар миқдорининг ўсимликлар томонидан ўзлаштирилишига ва унинг унумдорлиги сақланишига, экилаётган ва ундан кейин экиладиган экинларнинг ҳосилдорлиги ошишига замин яратади.

Чарос Арслонова, туман ҳокимлигининг Ахборот хизмати раҳбари.