Амударёлик ёш китобхон мамлакат миқёсидаги танловда 2-ўринни эгаллади
Китоблар инсонни маънан юксалтиради, жамиятда обрў-эътиборини оширади. Шу сабабли ҳам аҳоли, айниқса ёшларни китобхонликка жалб қилиш мақсадида қатор тадбирлар, танловлар ўтказилмоқда. Яқинда мамлакат миқёсида ўтказилган шундай танловларнинг бирида амударёлик қиз фахрли 2-ўрин соҳибаси бўлди. “Маҳалладаги китобхон” онлайн танловида муносиб иштирок этиб, ғолиблар сафидан жой олган Моҳина Жуманиёзованинг хонадонига Ўзбекистон Маҳаллари уюшмаси Қорақалпоғистон Республикаси бошқармаси бошлиғи Сағиндик Турманов ташриф буюриб, Моҳинанинг онаси Саида Жуманиёзовага шундай китобхон қизни тарбиялаб, вояга етгазгани учун ўз миннатдорчилигини билдирди. Шунингдек, ёш китобхонга қимматбаҳо совғалар топширди.
Ўзбекистон Маҳаллалари уюшмаси Амударё тумани бўлими бошлиғи Алишер Юлдашев ҳамда туман прокурори вазифасини вақтинча бажарувчи Абат Жумамуратовлар ҳам Моҳина Жуманиёзова каби китобхон ёшлар амударёликларнинг фахри эканлигини алоҳида таъкидладилар.
Саида Жуманиязовани ҳам фарзандини билим ва маънавият томон йўлловчи, китобнинг қадрини билгувчи маърифатли она, десак муболаға бўлмайди. Чунки бу аёл, болалигидан китобларни дўст билиб улғайган. Шу сабабли, Моҳинанинг мактабда яхши ўқиши, шунингдек, фарзандида санъат ва китобхонликка қизиқиш уйғотиш учун хонодонида зарур шароитларни яратди.
Маълумот ўрнида, “Маҳалладаги китобхон” танлови Ўзбекистон Маҳаллалари уюшмаси томонидан китобхонлар сафини янада кенгайтириш мақсадида республика миқёсида маҳаллалар ўртасида, жорий йилнинг июнь ойидан эътиборан ташкил қилинган эди. Танлов низомга кўра белгиланган бадиий асарлардан тузилган 25 тестдан иборат бўлиб, онлайн шаклда, ёшидан қатъий назар барча китобхонлар ўртасида ўтказилди. Иштирокчиларга танловнинг июнь ойи учун Ўткир Ҳошимов қаламига мансуб “Дунёнинг ишлари” ва Абдулҳамид Чўлпоннинг “Кеча ва кундуз” асарларини мутолаа қилиш тавсия қилинган эди.
Моҳина Жуманиёзова китоб мутолаасидан ташқари фортепиано чалишга ҳам жуда қизиқади. Соҳа билимларини яхши ўзлаштириш мақсадида 9-сонли болалар мусиқа ва санъат мактабида фортепиано йўналишида 7 йилдан буён таҳсил оляпти. Бугунги кунга қадар устози Дилфуза Раҳимовадан кўплаб куйларни маромига етказиб ижро қилишни ўрганди. Фортепианодаги оқ ва қора клавишлар узра нозик бармоқлар оҳиста ҳаракатланар экан, қалбимизни гўзал куйлар мафтун этди. Хона ичра янграган оҳанглар ёшликнинг беғубор орзулари ҳақида ҳикоя қилаётгандек гўё.
Лавҳамиз қаҳрамони бугунги кунда етук мутахассис бўлиш учун хорижий тилларни ўрганиш лозимлигини яхши билади. Шу сабабли мактаб таълимидан ташқари инглиз тилини юқори даражада ўрганиш мақсадида туманимизда фаолият юритаётган хорижий тилларга ихтисослашган ўқув марказларида жонкуяр устозларидан сифатли билим оляпти.
Моҳина Жуманиязованинг китоб жавонидаги адабиётларни кузатиб, ўқиган асарлари ҳақида суҳбатлашар эканмиз, унинг бу танловда шунчаки қатнашиб, тасодифан ғолиб бўлмаганига, балки бу ютуқ йиллар давомида ўрганилган билимларнинг амалий натижаси эканига амин бўлдик.
Лавҳамиз якунида ёш китобхонни ушбу муваффақияти билан яна бир бор муборакбод этиб, бу каби танловларда янада баланд марраларини забт этишига тилакдошлик билдирамиз. Овул-маҳаллаларимизда Моҳина Жуманиёзова каби китобхон ёшлар сафи кўпаяр экан, Амударё тумани номи юқори давраларда эътироф этилаверади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
