Amudaryolik yosh kitobxon mamlakat miqyosidagi tanlovda 2-oʻrinni egalladi

Kitoblar insonni maʼnan yuksaltiradi, jamiyatda obroʻ-eʼtiborini oshiradi. Shu sababli ham aholi, ayniqsa yoshlarni kitobxonlikka jalb qilish maqsadida qator tadbirlar, tanlovlar oʻtkazilmoqda. Yaqinda mamlakat miqyosida oʻtkazilgan shunday tanlovlarning birida amudaryolik qiz faxrli 2-oʻrin sohibasi boʻldi. “Mahalladagi kitobxon” onlayn tanlovida munosib ishtirok etib, gʻoliblar safidan joy olgan Mohina Jumaniyozovaning xonadoniga Oʻzbekiston Mahallari uyushmasi Qoraqalpogʻiston Respublikasi boshqarmasi boshligʻi Sagʻindik Turmanov tashrif buyurib, Mohinaning onasi Saida Jumaniyozovaga shunday kitobxon qizni tarbiyalab, voyaga yetgazgani uchun oʻz minnatdorchiligini bildirdi. Shuningdek, yosh kitobxonga qimmatbaho sovgʻalar topshirdi.

Oʻzbekiston Mahallalari uyushmasi Amudaryo tumani boʻlimi boshligʻi Alisher Yuldashev hamda tuman prokurori vazifasini vaqtincha bajaruvchi Abat Jumamuratovlar ham Mohina Jumaniyozova kabi kitobxon yoshlar amudaryoliklarning faxri ekanligini alohida taʼkidladilar.

Saida Jumaniyazovani ham farzandini bilim va maʼnaviyat tomon yoʻllovchi, kitobning qadrini bilguvchi maʼrifatli ona, desak mubolagʻa boʻlmaydi. Chunki bu ayol, bolaligidan kitoblarni doʻst bilib ulgʻaygan. Shu sababli, Mohinaning maktabda yaxshi oʻqishi, shuningdek, farzandida sanʼat va kitobxonlikka qiziqish uygʻotish uchun xonodonida zarur sharoitlarni yaratdi.

Maʼlumot oʻrnida, “Mahalladagi kitobxon” tanlovi Oʻzbekiston Mahallalari uyushmasi tomonidan kitobxonlar safini yanada kengaytirish maqsadida respublika miqyosida mahallalar oʻrtasida, joriy yilning iyun oyidan eʼtiboran tashkil qilingan edi. Tanlov nizomga koʻra belgilangan badiiy asarlardan tuzilgan 25 testdan iborat boʻlib, onlayn shaklda, yoshidan qatʼiy nazar barcha kitobxonlar oʻrtasida oʻtkazildi. Ishtirokchilarga tanlovning iyun oyi uchun Oʻtkir Hoshimov qalamiga mansub “Dunyoning ishlari” va Abdulhamid Choʻlponning “Kecha va kunduz” asarlarini mutolaa qilish tavsiya qilingan edi.

Mohina Jumaniyozova kitob mutolaasidan tashqari fortepiano chalishga ham juda qiziqadi. Soha bilimlarini yaxshi oʻzlashtirish maqsadida 9-sonli bolalar musiqa va sanʼat maktabida fortepiano yoʻnalishida 7-yildan buyon tahsil olyapti. Bugungi kunga qadar ustozi Dilfuza Rahimovadan koʻplab kuylarni maromiga yetkazib ijro qilishni oʻrgandi. Fortepianodagi oq va qora klavishlar uzra nozik barmoqlar ohista harakatlanar ekan, qalbimizni goʻzal kuylar maftun etdi. Xona ichra yangragan ohanglar yoshlikning begʻubor orzulari haqida hikoya qilayotgandek goʻyo.

Lavhamiz qahramoni bugungi kunda yetuk mutaxassis boʻlish uchun xorijiy tillarni oʻrganish lozimligini yaxshi biladi. Shu sababli maktab taʼlimidan tashqari ingliz tilini yuqori darajada oʻrganish maqsadida tumanimizda faoliyat yuritayotgan xorijiy tillarga ixtisoslashgan oʻquv markazlarida jonkuyar ustozlaridan sifatli bilim olyapti.

Mohina Jumaniyazovaning kitob javonidagi adabiyotlarni kuzatib, oʻqigan asarlari haqida suhbatlashar ekanmiz, uning bu tanlovda shunchaki qatnashib, tasodifan gʻolib boʻlmaganiga, balki bu yutuq yillar davomida oʻrganilgan bilimlarning amaliy natijasi ekaniga amin boʻldik.

Lavhamiz yakunida yosh kitobxonni ushbu muvaffaqiyati bilan yana bir bor muborakbod etib, bu kabi tanlovlarda yanada baland marralarini zabt etishiga tilakdoshlik bildiramiz. Ovul-mahallalarimizda Mohina Jumaniyozova kabi kitobxon yoshlar safi koʻpayar ekan, Amudaryo tumani nomi yuqori davralarda eʼtirof etilaveradi.

Shohzod Qurbonboyev