Favqulodda vaziyatlar vaziri kubogi musobaqalari oʻtkazildi

Prezidentimiz Shavkat Mirziyoyev mamlakatimiz mustaqilligining 33 yilligiga bagʻishlangan tantanali bayram tadbirida “Bugun butun dunyoda har bir davlatni oʻylantirib turgan yagona narsa bu tinchlikdir”, – deya taʼkidlagan edilar. Darhaqiqat, tinchlikni saqlash uchun har bir davlat qurolli kuchlarini mustahkamlashi muhimdir. Prezidentimiz oʻz nutqida bu haqida alohida toʻxtalib, “Qurolli Kuchlarimizni zamonaviy qurol-yarogʻ va texnika bilan taʼminlash, ularning jangovar va maʼnaviy salohiyatini oshirishga bundan buyon ham ulkan eʼtibor qaratamiz. Lekin tinchlikni saqlash faqat harbiylarimizning ishi boʻlib qolmasligi kerak. Bu barchamizning, har bir Oʻzbekiston fuqarosining muqaddas burchi boʻlishi shart. Yurtning kuchi – birlikda, qadri esa tinchlikdadir!” – degan daʼvatlari har bir yurtdoshimizni Vatan taqdiriga nisbatan daxldor boʻlishga chaqirdilar.

Shu maqsadda “Yurtning kuchi – birlikda, qadri esa tinchlikdadir!” – degan shior ostida Amudaryo tumanining 2-sektori hududida istiqomat qiluvchi uyushmagan yoshlar oʻrtasida 24-sentyabr kuni tuman Favqulodda vaziyatlar boʻlimi tomonidan Favqulodda vaziyatlar vaziri kubogi musobaqalari oʻtkazildi. Ushbu musobaqa ham yoshlarimizni vatanparvarlikka chorlab, ularni yurt taqdiriga daxldor boʻlishga daʼvat qilgani bilan ahamiyatli boʻldi.

2-sektor hududidagi 8ta mahallalarda istiqomat qiluvchi otaliqqa olingan ishsiz, mehnat migratsiyasidan qaytgan, uyushmagan yoshlardan iborat jamoalar olimpiya sport turlari boʻyicha gʻoliblik uchun qizgʻin bahslar olib bordilar.

Musobaqalar asosiy toʻrtta shart boʻyicha oʻtkazilib, jamoalar ishtiroki hakamlar tomonidan odillik va shaffoflik tamoyillariga muvofiq kuzatib borildi.

Yakuniy natijalarga koʻra, 3-oʻrinni Mangʻit shahrining Farovon mahallasi jamoasi aʼzolari, 2-oʻrinni esa Qoramon mahallasi sportchilari egalladilar. Musobaqada faxrli 1-oʻrin Xizr eli yoshlari jamoasiga nasib etdi. Gʻoliblikni qoʻlga kiritgan Xizr eli mahallasi yoshlar jamoasi Favqulodda vaziyatlar Vaziri kubogi musobaqalarining Qoraqalpogʻiston Respublikasi bosqichida ishtirok etish huquqini qoʻlga kiritdilir.

Ravshan Bahromov.