“Targʻibot poyezdi”ning targʻibot guruhi aʼzolari 40-maktabga tashrif buyurdi

Har qanday zamon va makonda inson qadri ulugʻ, uning haq-huquqlari har nedan ustun. Odamzod dunyoga kelar ekan, u bilan birgalikda huquqlari ham tugʻiladi, oʻzi bilan hamnafas yashaydi. Shubhasiz, Oʻzbekiston Respublikasining yangi tahrirdagi Konstitutsiyasining haqiqiy muallifi xalqning oʻzidir. Fuqarolarning xohish-irodasi esa islohotlarning manbai va harakatlantiruvchi kuchi hisoblanadi. Mamlakatimizda 2023-yil 30-aprel kuni oʻtkazilgan umumxalq referendumida oʻzi va yurt taqdiriga befarq boʻlmagan, shu yurtning buguni va ertasiga daxldorlik hissi bilan yashaydigan har bir yurtdoshimiz faol ishtirok etib, ularning 90,21 foizi yangi tahrirdagi Konstitutsiyamizni yoqlab ovoz bergani ham fikrimiz dalilidir.

Sir emaski, Bosh qomusimizda xalqimizning Yangi Oʻzbekistonni barpo etish boʻyicha orzu-umidlari va intilishlari oʻz aksini topgan. Konstitutsiya mamlakatning butun hududida oliy yuridik kuchga ega va toʻgʻridan-toʻgʻri amal qiladi. Yangi tahrirdagi Konstitutsiyamiz 6 boʻlim, 27 bob va 155 ta moddadan iborat. Joriy yilda bosh qomusimiz 32 yoshga toʻladi. Shu munosabat bilan yurtimizning deyarli barcha hududlarida, mahallalarda, idora va tashkilotlarda, taʼlim maskanlarida bayram kechalari, turli xil zakovat oʻyinlari, targʻibot tadbirlari oʻtkaziladi.

Oʻzbekiston Respublikasi Konstitutsiyasi qabul qilinganligining 32 yilligi munosabati bilan “Konstitutsiya – xalqchil davlat, barqaror taraqqiyot va farovon hayot asosi!” shiori ostida tashkil etilgan “Targʻibot poyezdi” loyihasining targʻibot guruhi aʼzolari Amudaryo tumanidagi 40-sonli maktabga tashrif buyurdi.

Tadbirda Toshkent davlat yuridik universiteti Jinoyat-protsessual huquqi kafedrasi mudiri oʻrinbosari, guruh rahbari Baxram Xudaybergenov, universitetning jinoiy odil sudlov fakulteti talabalari Allanazar Janabayev, Kobeysin Zaripbayev, Sabrina Shamuratova hamda Xalqaro huquq va qiyosiy huquqshunoslik fakulteti talabasi Aysulu Muratbayeva, tuman Adliya boʻlimi boshligʻi Mansur Sadikov, Qoraqalpogʻiston Respublikasi Joʻqorgʻi Kengesi deputati, 40-sonli maktab direktori Sanobar Xoʻjamuratova va oʻquvchi yoshlar ishtirok etdi.

“Targʻibot poyezdi” loyihasining maqsadi yangi tahrirdagi Konstitutsiyamizning mazmun-mohiyatini yoshlarga anglatish, fuqarolarning huquqiy savodxonligini oshirishdan iborat.

Tadbirda targʻibot guruhi aʼzolari oʻquvchilarga yangi tahrirdagi Konstitutsiyaning mazmuni, unga kiritilgan yangi moddalar, huquqiy normalar mohiyati, inson oʻz haq-huquqlarini bilishi va amalda qoʻllay olishining ahamiyati haqida toʻxtaldilar. Konstitutsiya, qonun, inson huquq va erkinligi, qonun ustuvorligi kabi tushunchalarga alohida urgʻu berildi.

Shundan soʻng, oʻquvchilarning huquqiy savodxonligini sinovdan oʻtkazish maqsadida “Zakovat” oʻyini oʻtkazildi. Unda oʻquvchilar guruhlarga boʻlinib, oʻz bilim va salohiyatini namoyon qildilar. Oʻyin soʻngida faol ishtirok etgan oʻquvchilarga Toshkent davlat yuridik universiteti tomonidan tayyorlangan esdalik sovgʻalari topshirildi. Bu kabi tadbirlar targʻibot guruhi tomonidan Qoraqalpogʻistonning boshqa tumanlarida ham oʻtkazilmoqda.

 Soʻzimiz avvalida huquqini bilgan va amalda qoʻllay olgan inson xor boʻlmaydi, degan edik. Darhaqiqat, bizga hayotda toʻgʻri yozish, raqamlarni toʻgʻri hisob-kitob qilish, odam va uning salomatligi kabi yoʻnalishlar qanchalik zarur boʻlsa, huquqiy savodxonlikka ham shunchalar ehtiyojimiz bor. Zero, u toʻgʻri yozish yoki toʻgʻri hisoblashni oʻrgatmasa-da, fuqarolarga toʻgʻri yashashni oʻrgatadi.

Aziza Madrahimova