1-DEKABR – BUTUNJAHON OITSGA QARShI KURASh KUNI MUNOSABATI BILAN DXX ChEGARA QOʻShINLARIGA QARAShLI 92-02 HARBIY QISM XIZMATChILARI IShTIROKIDA TADBIR BOʻLIB OʻTDI

Jahon Sogʻlikni saqlash tashkiloti hamda Birlashgan millatlar tashkiloti Bosh Assambleyasining 1988-yilgi Qarori bilan 1-dekabr – Butunjahon OITSga qarshi kurash kuni sifatida belgilangan.

Jahon Sogʻlikni saqlash tashkilotining 2024-yilgi maʼlumotlariga koʻra, dunyoda OIV infektsiyasini yuqtirgan 40 milliondan ortiq bemor bor. Ularning soni yiliga 1, 5 million kishiga ortib bormoqda. Eng yomoni, mazkur kasallik har yili 600 ming kishini hayotdan olib ketmoqda.

Aytish joizki, mamlakatimizda OITSga qarshi kurash tizimi boʻyicha keyingi yillarda barcha yoʻnalishlarda sezilarli yutuqlarga erishildi. Xususan, joriy yilning III choragi yakuniga koʻra, mamlakatimizda OIV infektsiyasiga chalingan bemorlarning 84 foizi davolashning butun dunyoda tan olingan usuli – antiretrovirus muolajalari bilan qamrab olingan. Ular uchun zarur preparat xarajatlarining qariyb 80 foizi davlat byudjeti mablagʻlari, qolgan 20 foizi xalqaro jamgʻarmalar hisobidan qoplanmoqda.

Bu haqda Amudaryo tuman Tibbiyot birlashmasi shifokorlari tomonidan 1-dekabr – Butunjahon OITSga qarshi kurash kuni munosabati bilan Davlat xavfsizlik xizmati Chegara qoʻshinlariga qarashli 92-02 harbiy qism zobit va askarlari ishtirokida oʻtkazilgan uchrashuvda batafsil soʻz yuritildi.

Tadbirda 92-02 harbiy qism zobit va askarlari uchun Amudaryo tuman Tibbiyot birlashmasi shifokorlari Tamara Saidova, Dilbar Allabergenova hamda Raʼno Saidovalar OITS kasalligining oldini olish, kasallikning dastlabki belgilari, sogʻlom turmush tarziga amal qilishning ahamiyati, shuningdek, jismoniy faollik va kundalik hayotda amal qilinishi zarur boʻlgan sanitariya-gigiyena qoidalari mavzularida batafsil va keng tushunchalar, zarur tavsiyalar berdilar.

Shu bilan birga, ushbu kasallikka chalingan bemorlar haqidagi barcha maʼlumotlar mutlaqo sir saqlangan holda muolaja choralari koʻrilishi, ularning oila aʼzolari ham mazkur kasallikni yuqtirib olishlarining oldini olish boʻyicha zarur profilaktik ishlar amalga oshirilishi haqida soʻz yuritishdi va tadbir ishtirokchilariga OITSdan saqlanish boʻyicha targʻibot varaqalari tarqatdilar.

Uchrashuv davomida 92-02 harbiy qism xizmatchilari OITSdan saqlanish, davolanish bosqichlari, muntazam ravishda sogʻlom turmush tarzi qoidalariga amal qilgan bemorlarning mazkur kasallikdan butunlay sogʻayib ketish imkoniyatlari bor yoki yoʻqligi yuzasidan savollar bilan murojaat qildilar. Ishtirokchilar tomonidan tushgan shu va shu kabi boshqa savollarga shifokorlar Jahon Sogʻlikni saqlash tashkiloti tomonidan taqdim etilgan soʻnggi maʼlumotlar asosida batafsil javoblar berdilar.

Robiya Yoʻldosheva.