Mardlik saboqlari va unutilmas xotiralar
Tarixning shunday sahifalari borki, ularni eslash ogʻir, unutish esa mumkin emas. Afgʻon urushi ana shunday fojiali davrlardan biri boʻlib, minglab insonlarning taqdirida oʻzining ayanchli izini qoldirdi. Oʻtgan asrning oxirlarida kechgan bu harbiy mojarolar koʻplab oʻzbekistonlik yoshlarni ham urush domiga tortgan edi. Ularning aksariyati oʻsha mashʼum yillarning guvohi boʻldi, jang maydonida mardlik va jasorat koʻrsatib, Vatanga sharaf bilan qaytdilar. Bugun faxriyning xotiralari hayotiy saboq, tajribalari esa kelajak avlod uchun bebaho merosdir.
8-yanvar kuni Amudaryo tumanining Toʻlqin ovulida istiqomat qiluvchi ana shunday mard insonlardan biri – Afgʻon urushi faxriysi Koʻklan Xudoyberganov xonadoniga Oʻzbekiston “Veteran” jangchi-faxriy va nogironlar birlashmasining tumandagi vakili Bahodir Jumaniyozov hamda uyushma aʼzolari tashrif buyurishdi. Quroldosh doʻstlarning bu uchrashuvi xotiralar jonlangan, minnatdorlik tuygʻusi va insoniy qadriyatlar mujassam boʻlgan samimiy muloqotga aylandi.
Koʻklan Xudoyberganov 1986-1988-yillarda Afgʻonistonda harbiy xizmatni oʻtagan. U dastlab Turkmanistonning Chorjoʻy shahrida uch oy davomida dastlabki harbiy tayyorgarlikdan oʻtdi. Shundan soʻng, Afgʻonistonning Kobul yaqinidagi Bagram qishlogʻida joylashgan harbiy aviatsiya qismlaridan birida xizmat qildi. Ogʻir sharoitlar, tinimsiz janglar va mudhish voqealar uning hayotida chuqur iz qoldirdi.
1988-yilda harbiy xizmatni tamomlab, Vatanga qaytgan Koʻklan Xudoyberganov oʻqishni davom ettirib, Paxtachilik texnikumida tahsil oldi. Keyinchalik qishloq xoʻjaligi sohasida fidokorona mehnat qildi. Urushning ogʻir asoratlariga qaramay, hayotga boʻlgan ishonchini yoʻqotmadi, oilasi va farzandlarining tarbiyasiga alohida eʼtibor qaratdi. Bugungi kunda u mehribon otaxon, bir nafar nabiraning suyukli bobosi.
Koʻklan Xudoyberganov yosh avlodni vatanparvarlik ruhida tarbiyalash borasida faol ish olib bormoqda. U oʻzining jang maydonidagi safdoshlarini, urush maydonida qolgan doʻstlarini doimo yodga olib, ularning xotirasini hurmat bilan eʼzozlaydi.
Unutilmas jasorati, fidokorona xizmatlari uchun Koʻklan Xudoyberganov Oʻzbekiston “Veteran” jangchi-faxriy va nogironlar birlashmasi tomonidan “Yoshlarni vatanparvarlik ruhida tarbiyalash uchun” medali bilan taqdirlandi. Bu yuksak eʼtirof uning sermashaqqat hayotiy yoʻli, jasorati va yosh avlodga oʻrnak boʻlayotgani uchun bildirilgan yuksak hurmat ifodasidir.
Faxriylar oʻzaro muloqot qilib, yurtdagi tinchlik va osoyishtalikning qadriga yetish muhimligini yana bir bor taʼkidladilar. Koʻklan Xudoyberganov davlat va jamiyat tomonidan koʻrsatilayotgan eʼtibordan minnatdor ekanligini bildirdi.
Tinchlik – eng katta neʼmat. Bu neʼmat yoʻlida fidokorona xizmat qilgan insonlar bor ekan, ularning hikoyalari unutilmaydi. Faxriylarning saboqlari kelajak avlodga jasorat, sabr-toqat va Vatanga sadoqat ramzi boʻlib qoladi. Qahramonlik abadiy, mardlik esa unutilmasdir!
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
