JISMONIY VA AQLIY FAOLLIK OʻTA MUHIM

Isonning yetuk va barkamol shaxs sifatida shakllanishi uchun qanday omillar bor va bu omillardan biz oʻz hayotimizda foydalanayotirmizmi?

Jamiyatimizda sogʻlom turmush tarzini qaror toptirish, jismonan va aqlan yetuklikka erishish uchun kundalik hayotimizda qanday qoida va meʼyorlarga amal qilayotirmiz?

Bizning bugungi suhbatdoshlarimiz sport sohasi murabbiylari, suhbatimiz mavzusi esa aynan yuqoridagi savollar doirasida boʻldi.

Bahrom SOATOV, 1-sonli BOʻSMning katta tennis boʻyicha murabbiysi:

- Avvalo shuni aytish kerakki, sport - goʻzallik, epchillik, kuch-qudrat, bulardan ham eng muhimi, mustahkam sogʻlik manbai. Eʼtibor bergan boʻlsangiz, sport bilan shugʻullanadigan yoshlarning dunyoqarashi keng, fikrda sobit, yuzida tiniqlik, harakatlarida dadillik boʻladi. Bunday yoshlar oʻziga ishonadi, atrofidagilarning hurmatini qozona oladi. Vaqtini qanday rejalashtirishni yaxshi bilgani uchun bunday yoshlarimiz turmushimizga yot boʻlgan zararli illatlarga, ayniqsa, kashandalik, giyohvandlik, alkogolizmga ruju qoʻymaydilar. Sport bilan shugʻullangan yoshlarning eslab qolish qobiliyati yaxshi boʻladi, agar ular talaba boʻlishsa, fanlarni oʻzlashtirishda, oʻzi tanlagan kasb boʻyicha koʻnikmalarga ega boʻlishda aslo qiynalmaydi.

Xurshid ISMOILOV, 3-sonli BOʻSMning stol tennisi boʻyicha murabbiysi:

- Koʻpchilik sportga shunchaki bir soha sifatida qaraydi. Aksincha, sport – har bir inson hayotining ajralmas qismi boʻlib qolishi kerak. Muhtaram Prezidentimiz bekorga mamlakatimizning sport salohiyatini yuksaltirishga jiddiy eʼtibor bilan qarayotganlari yoʻq. Chunki eng avvalo sport - millatimiz obroʻ-eʼtiborining oshishida muhim omil boʻlibgina qolmay, xalqimizning, ayniqsa, oʻsib kelayotgan yosh avlodning ham aqlan, ham jismonan yetuklikka yetishuvida eng muhim omil hisoblanadi. Shuning uchun ham mamlakatimiz mustaqillikka erishgach, sport-sogʻlomlashtirish ishlariga eʼtibor ham, ehtiyoj ham kuchaydi.

Bahrom SOATOV:

-Toʻgʻri aytasiz, shuning uchun ham sobiq Ittifoq davrida Mangʻitdan nariga oʻtmagan sportchilarimiz dunyoning nufuzli sport arenalarida yurtimiz sharafini himoya qilishayapti. AQSh, Xitoy, Janubiy Koreya, Ispaniya, Turkiya, Rossiya, Angliya, Germaniya kabi davlatlarning sportchilari bilan bemalol bellasha oladigan amudaryolik sportchilar - dzyu-do kurashi boʻyicha Yevropa kubogi gʻolibi Elyor Masharipov, boks boʻyicha Oʻzbekiston kubogi gʻolibi Jaloliddin Aminov, Jasur Poʻlatovlarning nomini bugun sport muxlislari juda yaxshi biladi. Bunday yutuqlarga erishish uchun sportchi-yoshlarimiz oʻsib-ulgʻaygan oila muhiti ham muhim rol oʻynaydi.

Shahodat RAJABOVA, 3-sonli BOʻSMning badiiy gimnastika boʻyicha murabbiysi:

- Insonning ham aqlan, ham jismonan shakllanishida faqat sport bilan muntazam shugʻullanishning oʻzi kifoya qilmaydi. Sportchi nafaqat oʻzining kuch-qudrati, balki, maʼnan barkamolligi bilan ham gʻalabalarga zamin hozirlaydi. Maʼnaviy yetuklikka esa ilk qadam oilada qoʻyiladi. Oilada sogʻlom muhit qaror topgan boʻlsa, sportchining gʻalaba tomon imkoniyatlari ham kengayib boraveradi. Shu bois, oilalarimizda sogʻlom turmush tarzi hukmron boʻlsa, yaʼni, ota-ona tarbiyali, samimiy va xushmuomala boʻlishsa, ularning farzandlari ham yoqimli xulq-atvorga ega, xushfeʼl boʻlishadi. Agar u mohir sportchi boʻlsa, albatta raqibi ustidan gʻalaba qozonish unga oson kechadi. Chunki bunday sportchi vujudida jismoniy yetuklik bilan maʼnaviy yetuklik uygʻun tarzda rivojlanib boradi.

Xurshid ISMOILOV:

- Bu fikringizga toʻliq qoʻshilaman. Bola sportning oʻzi yoqtirgan turi bilan qanchalik jiddiy shugʻullanmasin, u kamol topayotgan oila muhiti nosogʻlom boʻlsa, uning urinishlari befoyda. Shuning uchun men oʻz hayotini sport sohasi bilan bogʻlashga ahd qilgan yoshlarning ota-onalariga, oila aʼzolariga bir gapni qayta-qayta aytgim keladi: farzandingiz el-yurt, qolaversa, oilangiz shaʼnini yuksaltiruvchi yetuk shaxs sifatida shakllanishini istasangiz, eng avvalo feʼlingizni keng qiling, hayot insonga faqat bir marta berilishini unutmang, oilada va jamiyatda chiroyli, orasta, fikran sogʻlom insonlar safida boʻlishga intiling.

Hamida RAJABOVA, stol tennisi boʻyicha 1-sonli BOʻSM murabbiysi:

- Jamiyatimizda sogʻlom turmush tarzini qaror toptirishda shaxs eng avvalo faol boʻlishi kerak. Jismonan va aqlan faol inson hech qachon yomon odatlarga berilmaydi, kundalik hayotida vaqtni toʻgʻri rejalashtiradi. Yaʼni, mehnatga ijodiy yondashish – berilib ishlashga odatlanish, vaqtida, toʻgʻri ovqatlanish, tozalikka rioya etish, oʻzini yomon odatlardan tiyish, nos va tamaki chekish, spirtli ichimlikdan oʻzini saqlash, kuchli jismoniy va ruhiy holatga erishish, tanani haddan tashqari zoʻriqtirishdan saqlash, xushfeʼl boʻlish oʻta muhim. Tirnoq ostidan kir qidiradigan, boʻlar-boʻlmasga asabiylashib, suhbatdoshining jigʻiga tegadigan odam – bilib qoʻyingki, juda tez qariydi va kasallikka chalinuvchan boʻladi.

Shahodat RAJABOVA:

- Eng muhimi, inson oʻzini boshqalarga xush kelmaydigan odatlardan tiymogʻi kerak. Oilada tozalik, yaxshi taʼminlangan shart-sharoit boʻlsa-yu, insoniy mehr-oqibat, oʻzaro hurmat, shirin muomala boʻlmasa, bunday oilaga sogʻlom turmush tarzi tamoman yot. Shu bois, men yurtdoshlarimizga shunday der edim:

- Azizlar, sogʻlom turmush tarzi – sogʻligimiz garovigina emas, balki, oilalarimizning fayz-u tarovati, tinch-osoyishtaligi, farovonligi, ham jismonan, ham aqlan kamolotga yetishmoqlikdir. Va demakki, jismonan va maʼnan barkamol avlod kelajagi sari ezgu qadamdir. Buni unutish – Vatanning va millatning kelajagiga loqaydlikning bir koʻrinishidir. Shunday emasmi, azizlar!