Tomorqa xonadon xazinasiga aylanyapti

Azaldan mehnatkash, tinib-tinchimas, ishning koʻzini biladigan xalqimiz har bir qarich yerdan unumli foydalanishni oʻrgangan. Bekorchidan hamma bezor boʻlganidek, hamisha biror ishning payida, harakatda boʻlib kelgan. Shu bois yurtimizda dasturxonlar toʻkin, xonadonlar fayzli, mehmondoʻstlik esa xalqimizga xos fazilatga aylangan.

Soʻnggi yillarda mamlakatimizda tomorqadan samarali foydalanishga alohida eʼtibor qaratilmoqda. Hukumat tashabbuslari asosida issiqxonalar qurish, tokzorlar barpo etish, iqlimga mos ekinlar yetishtirish kabi yoʻnalishlarda amalga oshirilayotgan ishlar oʻz samarasini bermoqda. Bu jarayonda koʻplab oilalar oʻz tomorqasidan yuqori hosil olib, yerni oilaviy daromad manbaiga aylantirmoqda.

Ayniqsa, bugungi kunda tomorqaga boʻlgan munosabat tubdan oʻzgardi. Xonadon egalari har qarich yerdan unumli foydalanishga harakat qilmoqda. Tomorqadan samarali foydalanish orqali doimiy bandlik taʼminlanayotgani esa ijtimoiy barqarorlik va iqtisodiy farovonlikka xizmat qilmoqda. Bu nafaqat oilaviy daromadning ortishiga, balki mahallaning, qolaversa, mamlakatimiz ijtimoiy-iqtisodiy taraqqiyotiga ham munosib hissa qoʻshmoqda.

Amudaryo tumanining Oʻzbekiston mahallasini bu jihatdan namuna sifatida tilga olish mumkin. Mahalla ahli tomorqani shunchaki yer emas, balki daromad va farovonlik manbai sifatida qadrlashadi. Mirishkor dehqonlar oila aʼzolari bilan hamjihatlikda mehnat qilib, har qarich yerni xazinaga aylantirmoqda.

Mahallada yashovchi Charshamboy ota Qurbonboyev mehnatni hayot mazmuniga aylantirgan nuroniylardan. Charshamboy ota turmush oʻrtogʻi Oʻgʻiljon momo, farzandlari va nevaralari bilan birgalikda tomorqada mehnat qilib, oʻzgacha huzur topadi.

Peshona teri ortidan xazinaga aylangan 30 sotixlik tomorqada tarvuz, qovun, bodring, pomidor va boshqa ekinlar yetishtiriladi. Xonadon bogʻida hosilga kirgan oʻrik, olma, shaftoli, anjir, anor va boshqa mevali daraxtlar har mavsumda oila dasturxoniga fayz bagʻishlaydi.

Erta, oʻrta va kechpishar mevalar bogʻni xush manzaraga aylantirgan. Ayniqsa, uzum navlarining xilma-xilligi havasingizni keltiradi. “Rizamat ota”, “Kelinbarmoq”, “Mersedes”, “Husayni”, “Toifi” kabi sara navlardan olingan shirin hosil bogʻbon mehrini anglatadi goʻyo.

Charshamboy ota xonadoni faqat dehqonchilik bilan cheklanib qolmagan, chorvachilik ham yoʻlga qoʻyilgan. Bu esa oilani sut mahsulotlari bilan doimiy taʼminlaydi va ehtiyojdan ortgani xalqimiz bilan baham koʻriladi.

Xonadon turmush tarzi va madaniyatining koʻzgusiga aylangan tomorqada yetishtirilgan mahsulotlar nafaqat oila dasturxoni, balki mahalliy bozor rastalarini ham toʻldirib turibdi. Xonadondagi bunday fayzli muhit, albatta, halol mehnat samarasidir. Xonadon sohib va sohibalari hovlidagi xazinadan unumli foydalanish, boʻsh qoldirmaslik, har qarich yerni yashnatishni insoniy burchi deb bilishadi.

Oʻzbekiston mahallasidagi dehqonlar yerdan toʻgʻri va samarali foydalanishning yorqin namunasi, desak adashmaymiz. Mirishkorlar iqlim sharoitini hisobga olgan holda turli ekinlar ekib, yiliga ikki-uch marta hosil olishga erishmoqda. Dehqonchilik, bogʻdorchilik va chorvachilik sohalarida toʻplangan tajriba bugungi kunda samara berayotgani quvonarli holdir.

Afsuski, baʼzan tomorqasi boʻlsa-da, undan foydalanmaydigan odamlar ham uchrab turadi. Yer bor joyda ish bor, mehnat bor joyda fayz va baraka boʻladi. Shuning uchun har bir xonadon tomorqasini qadrlashi, undan oqilona foydalanishi va har bir qarich yerni obod qilishga intilishi zarur. Bu nafaqat oila farovonligi, balki yurt taraqqiyotining ham asosidir.

Agar Oʻzbekiston mahallasiga yoʻlingiz tushsa, Charshamboy ota xonadoniga albatta kirib oʻting. Bir piyola choy ustida dehqonchilik, bogʻdorchilik va tomorqachilikka oid amaliy bilimlardan bahramand boʻlasiz, xonadon tomorqasida yetishtirilgan sarxil neʼmatlardan tatib koʻrasiz. Erta bahor yoki kech kuzda borsangiz, albatta, sara navli koʻchatlar va qalamchalardan bebahra qolmaysiz.

Yoʻlga tushar ekanmiz, dildan shunday niyat oʻtdi: nuroniylarimiz koʻpaysin, bogʻlarimiz serhosil, bozorlarimiz toʻla, dasturxonlarimiz esa hamisha toʻkin-sochin boʻlsin!

Shohzod Qurbonboyev.