Qoraqalpogʻiston Respublikasi Madaniyat vazirligining matbuot anjumani oʻtkazildi

Joriy yilning 17-sentyabr kuni Berdaq nomidagi Qoraqalpoq davlat akademik musiqa teatrida Qoraqalpogʻiston Respublikasi Madaniyat vaziri Begis Temirbayev rahbarligida madaniyat va sanʼat sohasida amalga oshirilgan ishlar yuzasidan matbuot anjumani oʻtkazildi.

Tadbirda ommaviy axborot vositalari, jurnalistlar, blogerlar va vazirlikning mutasaddi vakillari ishtirok etdi. Ushbu uchrashuv sohadagi rivojlanish surʼatlarini yaqqol koʻrsatib berdi. Jumladan, vazirlik maʼlumotlariga koʻra, yil boshidan buyon respublikada 2977 ta madaniy-maʼrifiy va koʻngilochar tadbirlar muvaffaqiyatli oʻtkazildi. Vazirlikka qarashli 3 ta davlat teatrida 915 dan ortiq spektakl namoyish etilib, ularga 186 mingdan ziyod tomoshabin tashrif buyurdi. Shahar va tumanlardagi madaniyat markazlarida esa 3650 ta tadbir tashkil etildi. Hozirda faoliyat yuritayotgan 60 ta madaniyat markazida 210 ta toʻgarak mavjud boʻlib, ularga 2287 nafar ishtirokchi doimiy qatnashmoqda. Bu koʻrsatkichlar aholining madaniy hayotga boʻlgan qiziqishi ortib borayotganidan dalolat beradi.

Matbuot anjumanida taʼkidlanganidek, sohaga boʻlgan eʼtibor taʼlim tizimida ham oʻz aksini topgan. Vazirlik tasarrufidagi 2 ta oliy oʻquv yurti filiali, 3 ta ixtisoslashtirilgan sanʼat va madaniyat maktabi, shuningdek, 24 ta bolalar musiqa va sanʼat maktablarida jami 9677 nafar oʻquvchi va talaba tahsil olmoqda. Ularga 1722 nafar oʻqituvchi va professorlar sanʼat sirlarini oʻrgatmoqda.

Bundan tashqari, Qoraqalpogʻiston ijodiy jamoalari Malayziya, Yaponiya, Italiya, Turkiya, Gruziya, Ozarbayjon, Qirgʻiziston va Qozogʻiston kabi davlatlarda oʻtkazilgan 7 ta xalqaro madaniy tadbirda muvaffaqiyatli ishtirok etdi. Vazirlik TURKSOY, YuNESKO, Tatariston va Boshqirdiston Respublikalari Madaniyat vazirliklari kabi nufuzli tashkilotlar bilan hamkorlikni yoʻlga qoʻygan. Janubiy Koreyaning "HY Education" kompaniyasi bilan imzolangan shartnoma qoraqalpogʻistonlik yoshlarning xalqaro darajada taʼlim olishiga keng imkoniyatlar yaratmoqda. Bu kabi xalqaro aloqalar Qoraqalpogʻiston madaniyati va sanʼatini dunyo miqyosida targʻib qilishga xizmat qilmoqda.

Hisobot davrida sohaga 609,5 ming AQSh dollari miqdorida grant va 2 mlrd 50 mln soʻm miqdorida investitsiya mablagʻlari jalb qilindi. Vazirlik huzurida tashkil etilgan "ART KARAKALPAKSTAN" nodavlat notijorat tashkiloti "Ustaxona – milliy meros" loyihasi bilan 1 milliard soʻmlik davlat ijtimoiy buyurtmasini qoʻlga kiritdi. Loyiha doirasida Nukus tumanida Markaziy Osiyo xalqlarining milliy musiqa cholgʻu asboblarini ishlab chiqarish ustaxonasi quriladi. Bu tashabbus milliy hunarmandchilikni rivojlantirish va madaniy merosni saqlashga xizmat qiladi.

Shuningdek, Oʻzbekiston Qahramoni, Oʻzbekiston va Qoraqalpogʻiston xalq yozuvchisi Toʻlepbergen Qayipbergenovning muzeyini tashkil etish uchun 251 million 250 ming soʻm ajratildi va bu boradagi ishlar boshlab yuborildi.

Iqtidorli yoshlarni qoʻllab-quvvatlashga qaratilgan "Yosh" estrada loyihasining ikkinchi mavsumi muvaffaqiyatli oʻtkazilmoqda. Loyihada 400 dan ortiq yoshlar ishtirok etgan boʻlib, kelgusi yildan uni Oʻzbekiston miqyosida oʻtkazish rejalashtirilgan. Bu tashabbus yosh isteʼdodlarni kashf etish va ularga keng imkoniyatlar yaratishda muhim ahamiyat kasb etadi.

Tadbir yakunida Madaniyat vaziri Begis Temirbayev OAV vakillarining savollariga javob berib, sohadagi muammolar va ularning yechimi yuzasidan fikr almashdi. Muloqotdan soʻng ishtirokchilar rejissyor Muxtor Reymov sahnalashtirgan Oʻzbekiston va Qoraqalpogʻiston xalq yozuvchisi Toʻlepbergen Qayipbergenov qalamiga mansub "Qoraqalpoq qizi" spektaklini tomosha qilishdi. 

Qoraqalpogʻiston Respublikasi Madaniyat vazirligi tomonidan tashkil qilingan ushbu matbuot anjumani Respublikada madaniyat va sanʼat jadal rivojlanayotgani hamda sohaga katta eʼtibor qaratilayotganining yorqin ifodasi boʻldi.