Qoramon mahallasi: olis hududdagi ishonchli ijtimoiy himoya

Bugungi kunda Yangi Oʻzbekistonda olib borilayotgan islohotlarning bosh gʻoyasi "Inson qadri uchun" tamoyiliga asoslanadi. Bu shunchaki balandparvoz shior emas, balki chekka qishloqlardan tortib yirik shaharlargacha har bir fuqaroning hayotida sezilishi lozim boʻlgan real jarayondir. Amudaryo tumanining eng chekka, markazdan salkam 40 chaqirim olisda joylashgan Qoramon mahallasidagi bugungi oʻzgarishlar va aholiga koʻrsatilayotgan gʻamxoʻrlik fikrimizning yaqqol dalilidir. Mahalla infratuzilmasini rivojlantirish, aholi farovonligini taʼminlash va ehtiyojmand qatlamni qoʻllab-quvvatlash borasidagi ishlar tizimli ravishda yoʻlga qoʻyilgani natijasida bu hudud kundan-kunga soʻlim va obod goʻshaga aylanib bormoqda.

Bugungi kunda Qoramon mahallasida salkam 4,5 ming nafar aholi istiqomat qiladi. Davlatimiz rahbari tashabbusi bilan joriy etilgan va bugungi kunda oʻzining yuqori samaradorligini koʻrsatayotgan “mahalla yettiligi” tizimi ushbu hududda ham faol ish olib bormoqda. Mahalla raisi, hokim yordamchisi, xotin-qizlar faoli, yoshlar yetakchisi va boshqa masʼullardan iborat jamoa hamkorlikda uyma-uy yurib, har bir xonadonning real holatini oʻrganmoqda.

Xususan, 12 xil toifa boʻyicha oʻtkazilgan xatlov natijasida aholining ijtimoiy holatiga toʻliq aniqlik kiritildi. Oʻrganishlar natijasiga koʻra, 59 ta oila kam taʼminlangan oilalar roʻyxatiga kiritilgan boʻlsa, 144 nafar nogironligi boʻlgan fuqarolarning roʻyxati shakllantirilib, ular bilan manzilli ishlash tizimi yoʻlga qoʻyildi. Bu raqamlar ortida har bir insonning taqdiri, umidi va kelajakka boʻlgan ishonchi yotibdi.

Xalqimizga xos boʻlgan azaliy qadriyatlar – mehr-oqibat, saxovat va muruvvat Qoramon mahallasidagi ijtimoiy ishlarda ham oʻz aksini topmoqda. Ehtiyojmand kishilarni, nogironligi boʻlgan shaxslarni hamda turli sabablar bilan ogʻir hayotiy vaziyatga tushib qolgan oilalarni har tomonlama qoʻllab-quvvatlash mahalla faollarining, ayniqsa ijtimoiy xodimning kundalik vazifasiga aylangan. Oddiy insonlar bilan yuzma-yuz turib, ularning turmushida uchrayotgan chigal masalalarni hal etib berish, dardu tashvishlariga yelkadosh boʻlish ijtimoiy xodimining eng oliy burchi hisoblanadi. Aholi bilan doimiy muloqot qilish, ish xonasida oʻtirib emas, balki bevosita xonadonlarga kirib borish orqali muammolarga yechim qidirish mexanizmi mazkur mahallada ham samarali ishlamoqda.

Joriy yilning oʻtgan davri mobaynida mahallada amalga oshirilgan aniq ishlarga toʻxtaladigan boʻlsak, eʼtiborga molik natijalarni koʻrishimiz mumkin. Xususan, “Inson” ijtimoiy xizmatlar markazi va mahalladagi ijtimoiy xodim saʼy-harakatlari bilan oʻzgalar parvarishiga muhtoj boʻlgan shaxslarning huquqlarini taʼminlash boʻyicha muhim qadamlar tashlandi.

Ijtimoiy himoyaga muhtoj, 80 yoshga toʻlgan keksalar hamda I guruh nogironligi boʻlgan shaxslarga qarab turish uchun 12 nafar fuqaroga haqiqiy holatni oʻrganish dalolatnomalari rasmiylashtirib berildi. Bu nafaqat keksa va bemor insonga doimiy gʻamxoʻrlikni taʼminlaydi, balki unga qarovchi shaxsning, yaʼni farzandi yoki boshqa yaqinining mehnat staji yuritilishiga va bandligi taʼminlanishiga qonuniy asos yaratadi. Bu davlatimizning ham keksalarga, ham ishsiz aholi qatlamiga boʻlgan gʻamxoʻrligining yorqin namunasidir.

Bundan tashqari, jismoniy imkoniyati cheklangan fuqarolarni reabilitatsiya qilish masalasi ham doimiy eʼtiborda. Xususan, mahallada istiqomat qiluvchi 3 nafar nogironligi boʻlgan fuqaroga zamonaviy protez-ortopediya moslamalari olib berildi. Bu vositalar ularning hayot sifatini yaxshilash, jamiyatga faol integratsiyalashuvi va harakatlanish erkinligini taʼminlashda muhim ahamiyat kasb etadi.

Shuningdek, aholining iqtisodiy holatini barqarorlashtirish, qish mavsumini betalofat oʻtkazishlariga koʻmaklashish maqsadida davlat tomonidan berilayotgan imtiyozlardan samarali foydalanishga koʻmaklashilmoqda. Joriy yilgi kuz-qish mavsumida kommunal toʻlovlar xarajatlarini qoplash uchun 298 ta ehtiyojmand oilaga bir martalik kompensatsiya pullari berilishiga koʻmaklashildi. Bu yordam koʻplab xonadonlarga iliqlik va baraka olib kirdi desak, mubolagʻa boʻlmaydi.

Taʼkidlash joizki, Qoramon mahallasi kompleks ijtimoiy xizmat koʻrsatuvchi xodimi va “Mahalla yettiligi” aʼzolarining hamkorlikdagi tizimli ishlari natijasida hududda ijtimoiy muhit sogʻlomlashmoqda. Davlat tomonidan yaratilgan imkoniyatlar har bir muhtoj oilaga manzilli yetib bormoqda. Ijtimoiy himoyaga, oʻzgalar parvarishiga muhtoj insonlar oʻzlarini yolgʻiz his qilmayaptilar, ularning hayoti ijobiy tomonga oʻzgarib, turmushi tobora farovonlashib bormoqda. Zero, inson qadri ulugʻlangan yurtda hech kim mehr va eʼtibordan chetda qolmaydi.

Amudaryoning chekka ovulidagi bu xayrli ishlar mamlakatimizda olib borilayotgan kuchli ijtimoiy siyosatning amaldagi ifodasidir.

Sevara Ismoilova, Qoramon mahallasi kompleks ijtimoiy xizmat koʻrsatuvchi xodimi