Yangiobod mahallasida yoshlar tadbirkorligi: yangi imkoniyatlar va yuksak natijalar

Bugungi kunda mamlakatimizda yosh avlod vakillarini qoʻllab-quvvatlash, ularning iqtidor va salohiyatini yuzaga chiqarish, eng muhimi, bandligini taʼminlash davlat siyosatining ustuvor yoʻnalishiga aylandi. Ishbilarmonlik muhitini shakllantirish va yoshlarni tadbirkorlikka keng jalb etish maqsadida berilayotgan imtiyozlar nafaqat shahar markazlarida, balki eng chekka hududlarda ham oʻz mevasini bera boshladi.

Amudaryo tumanidagi Yangiobod mahallasida amalga oshirilayotgan ijobiy oʻzgarishlar va tizimli ishlar zamirida ham inson qadri, yoshlar kelajagiga boʻlgan yuksak eʼtibor mujassam. Mahalladagi hokim yordamchisining saʼy-harakatlari bilan yoshlar tadbirkorligini qoʻllab-quvvatlash borasida koʻplab xayrli loyihalar hayotga tadbiq etilmoqda va bu jarayon yangi bosqichga koʻtarilmoqda.

2026-yilning birinchi choragi sarhisoblariga nazar tashlaydigan boʻlsak, Yangiobod mahallasida yashovchi 7 nafar fuqaro oʻz oilaviy tadbirkorligini yoʻlga qoʻyish istagini bildirdi. Ularning bu intilishi javobsiz qolmadi va hokim yordamchisining tavsiyasi bilan ularning barchasiga imtiyozli kreditlar ajratildi. Bu sarmoyalar chorvachilik, parrandachilik, tikuvchilik, xizmat koʻrsatish hamda ishlab chiqarish kabi muhim yoʻnalishlarni qamrab olgani bilan ahamiyatlidir.

Eng quvonarli jihati shundaki, mazkur yoʻnalishlarda ish boshlagan tashabbuskorlarning aksariyatini yoshlar tashkil etadi. Bu esa mahallada yangi avlod tadbirkorlari shakllanayotganidan dalolat beradi. Yoshlarning mehnat bozorida oʻz oʻrnini topishi nafaqat iqtisodiy koʻrsatkichlarning oʻsishiga, balki ijtimoiy barqarorlikning taʼminlanishiga ham xizmat qiladi.

Mahalla faollaridan biri Ravshanbek Jumaboyev uzoq vaqtdan beri sartaroshlik kasbi bilan shugʻullanib kelardi. Biroq uning faoliyatini kengaytirish, zamon talablariga mos xizmat koʻrsatish uchun qoʻshimcha mablagʻ va amaliy koʻmak zarur edi. Hokim yordamchisining amaliy yordami tufayli Ravshanbek oʻz ishxonasini zamonaviy jihozlashga va tashrif buyuruvchi mijozlar uchun barcha qulayliklarni yaratishga muvaffaq boʻldi. Bugungi kunda uning sartaroshxonasi nafaqat sifatli xizmati, balki yaratilgan shinam sharoitlari bilan ham mijozlar eʼtiborini qozonmoqda. Bu kabi misollar tadbirkorlikka kichik qadamlar bilan kirib kelayotgan yoshlar uchun katta motivatsiya manbai boʻlmoqda.

Shuningdek, Yangiobod mahallasida joriy yilning birinchi choragida uchta yangi tadbirkorlik subʼekti tashkil etildi. Ular oziq-ovqat savdo shaxobchasi, xizmat koʻrsatish va umumiy ovqatlanish yoʻnalishlarida oʻz faoliyatini boshladi. Bu esa mahalla ahli uchun qoʻshimcha qulayliklar va yangi ish oʻrinlari demakdir. Faqatgina kredit berish bilan cheklanib qolmasdan, yoshlarning bilim va koʻnikmalarini oshirishga ham alohida urgʻu berilmoqda. Jumladan, kasb-hunar va tadbirkorlik sirlarini oʻrganish istagida boʻlgan 4 nafar fuqaro maxsus oʻquv kurslariga yoʻnaltirildi. Ulardan uch nafari tadbirkorlik asoslarini, bir nafari esa muayyan kasb-hunarni mukammal egallashga kirishdi.

Chorvachilik yoʻnalishida faoliyat yuritayotgan Alisher Kamolov ham bugungi imkoniyatlardan mamnun. U koʻp yillardan buyon chorva parvarishi bilan shugʻullanib kelgan boʻlsa-da, chorva bosh sonini koʻpaytirishga mablagʻi yetmas edi. Koʻrsatilgan koʻmak natijasida u 32 million soʻm miqdorida imtiyozli kredit olib, 8 bosh qoʻy sotib oldi.

Chorvachilik — qishloq sharoitida eng ishonchli daromad manbalaridan biri hisoblanadi. Qoʻy boqishning iqtisodiy samaradorligi yuqoriligi, goʻsht va jun mahsulotlariga boʻlgan talabning doimiyligi Alisher kabi mehnatsevar yoshlarga oʻz oilasi farovonligini taʼminlash imkonini bermoqda.

Mahallada kambagʻallikni qisqartirish boʻyicha ham tizimli chora-tadbirlar koʻrilmoqda. 2026-yil davomida ijtimoiy reyestrga kiritilgan 44 ta oilaning ahvoli chuqur oʻrganilib, ularni ehtiyojmandlikdan chiqarish boʻyicha individual dastur ishlab chiqildi. Ushbu dastur doirasida ishsiz fuqarolarni ishga joylashtirish, kredit va subsidiyalar ajratish, dehqonchilik qilish uchun yer maydonlari ajratish kabi muhim vazifalar belgilangan.

Abror Allamov ana shunday imkoniyatlardan foydalanib, oʻz tomorqasini doimiy daromad manbaiga aylantirgan yurtdoshlarimizdan biri. U yerning har bir qarichidan unumli foydalanib, yuqori daromad olishga erishmoqda. Qishloq xoʻjaligi texnikalarining subsidiya asosida berilishi esa dehqonlarning ogʻirini yengil qilmoqda. Tomorqa — bu nafaqat rizq-roʻz manbai, balki kichik biznesni boshlash uchun ham tayyor maydondir.

Mahallaning madaniy va ijodiy hayotida ham jonlanish kuzatilmoqda. Akbar Odilov «Hunarmand» uyushmasiga aʼzo boʻlib, rassomchilik va haykaltaroshlik bilan shugʻullanib kelmoqda. U oʻz isteʼdodini namoyish etish barobarida, sanʼat asarlari orqali moddiy manfaat ham topmoqda. Bu esa tadbirkorlikning naqadar rang-barang ekanligini, har qanday qiziqishni daromadga aylantirish mumkinligini koʻrsatadi.

Hokim yordamchisining kelgusi rejalari yanada ulkan. Hozirga qadar kambagʻal oilalarning 4 nafar aʼzosi doimiy ishga joylashtirildi, 8 nafari oʻzini-oʻzi band qilish orqali rasmiy faoliyat boshladi. Yil boshidan buyon jami 9 nafar ishsiz fuqaro mavsumiy va doimiy mehnatga jalb etildi. Norasmiy sektorda ishlayotganlarni rasmiylashtirish, ularni ijtimoiy himoyalash borasidagi ishlar izchil davom ettirilmoqda.

Xulosa oʻrnida aytish mumkinki, Yangiobod mahallasidagi bu ijobiy manzara yurtimizda olib borilayotgan islohotlarning amaldagi ifodasidir. Yoshlarning tadbirkorlikka boʻlgan ishtiyoqi, ularga koʻrsatilayotgan doimiy eʼtibor va berilayotgan imtiyozlar kelajakda yuksak natijalar berishi shubhasiz. Zero, oʻz mehnati bilan baxtini topayotgan, oilasi va jamiyatga nafi tegayotgan har bir yosh — yurtning ertangi tayanchidir. Amudaryolik yoshlarning bugungi shijoati esa farovon hayot sari tashlangan mustahkam qadamdir.