Tadbirkorlar va soliq mutasaddilari oʻrtasida ochiq muloqot boʻlib oʻtdi

Mamlakatimizda xususiy sektorni qoʻllab-quvvatlash, ishbilarmonlik muhitini yanada rivojlantirish va tadbirkorlarning erkin faoliyat yuritishi uchun keng imkoniyatlar yaratish davlat iqtisodiy siyosatining eng ustuvor yoʻnalishlaridan biriga aylangan. Bugungi kunda joylarda davlat idoralari mutasaddilari va biznes subʼektlari oʻrtasida oʻtkazilayotgan yuzma-yuz uchrashuvlar hamda ochiq muloqotlar aynan mana shu ezgu maqsadga xizmat qilmoqda. Amudaryo tumanida ham bu borada tizimli va samarali ishlar amalga oshirib kelinmoqda. Hududlardagi rivojlanish surʼatlarini bevosita belgilab beruvchi bunday amaliy tadbirlar ishbilarmon qatlam bilan muloqotning eng shaffof usuli sifatida oʻzini toʻla oqlamoqda.

Yaqinda Amudaryo tumanida mahalliy ishbilarmonlar, xususiy sektor vakillari hamda masʼul rahbarlar ishtirokida ana shunday muhim va konstruktiv ruhdagi ochiq muloqot tashkil etildi. Mazkur tadbirda Qoraqalpogʻiston Respublikasi soliq boshqarmasi boshligʻining birinchi oʻrinbosari Imamatdin Orazbayev hamda Amudaryo tumani hokimining oʻrinbosari Hamza Haytimbetovlar ishtirok etib, hududdagi tadbirkorlik subʼektlari vakillari bilan bevosita va samimiy suhbat qurdilar. Ushbu uchrashuvning asosiy maqsadi faqatgina qonunchilikdagi yangiliklarni yetkazish emas, balki tadbirkorlarni qiynayotgan dolzarb masalalarni joyida oʻrganish va ularga tezkor amaliy koʻmak berishdan iborat boʻldi.

Uchrashuv davomida Qoraqalpogʻiston Respublikasi soliq boshqarmasi boshligʻining birinchi oʻrinbosari amudaryolik tadbirkorlarga soliq sohasida amalga oshirilayotgan soʻnggi oʻzgarishlar, xususan, Oʻzbekiston Respublikasi Prezidentining 2026-yil 26-maydagi “Kichik biznes subʼektlarining oʻsishi uchun yanada qulay iqtisodiy va maʼmuriy shart-sharoitlar yaratish toʻgʻrisida”gi Farmoni mazmun-mohiyati haqida atroflicha maʼlumot berdi.

Mazkur hujjat asosida hududlarda ishbilarmonlik muhitini tubdan yaxshilash, soliq maʼmuriyatchiligini soddalashtirish boʻyicha qator yangiliklar joriy qilinib, tadbirkorlik subʼektlariga berilayotgan yangi imkoniyatlar koʻlami tobora kengayib borayotgani alohida taʼkidlandi. Muloqot jarayonida tadbirkorlar safini yanada kengaytirish, ularni har tomonlama qoʻllab-quvvatlash, yaratilayotgan shart-sharoitlardan samarali hamda maqsadli foydalanishni taʼminlash yuzasidan oʻzaro fikr almashildi. Shuningdek, soliq qonunchiligiga kiritilgan soʻnggi yangiliklar haqida batafsil soʻz yuritilib, xususiy sektor vakillarining bu boradagi huquqiy savodxonligini oshirishga jiddiy eʼtibor qaratildi.

Ochiq muloqot formatida, qizgʻin bahs-munozaralarga boy tarzda oʻtgan tadbirda ishbilarmonlar oʻzlarini oʻylantirayotgan mavjud muammolar, faoliyatdagi toʻsiqlar va sohani yanada rivojlantirishga oid takliflarini erkin bayon etish imkoniga ega boʻldilar. Xususan, tadbirkorlarning soliq imtiyozlarini amaliyotda toʻgʻri qoʻllash, noturar joy obʼektlariga mol-mulk soligʻini hisoblashning oʻziga xos jihatlari, qoʻshilgan qiymat soligʻini qaytarish jarayonlarini tezlashtirish hamda soliq hisobotlarini oʻz vaqtida, xatosiz topshirish bilan bogʻliq koʻplab murojaatlari diqqat bilan tinglandi. Eng muhimi, mutasaddilar tomonidan koʻtarilgan har bir murojaat alohida nazoratga olinib, ularni joyida va ijobiy hal etish boʻyicha tezkor chora-tadbirlar belgilandi.

Soliq idoralari masʼullari va xususiy sektor vakillari oʻrtasidagi bu kabi shaffof hamda amaliy muloqotlar tadbirkorlarning ertangi kunga boʻlgan ishonchini yanada mustahkamlashga xizmat qiladi. Davlat va biznes oʻrtasidagi oʻzaro ishonch va manfaatli hamkorlik asosida qurilgan bunday munosabatlar nafaqat Amudaryo tumanining, balki butun Qoraqalpogʻiston Respublikasining iqtisodiy salohiyatini yuksaltirishga, yangi ish oʻrinlarini yaratishga va pirovard natijada xalqimiz farovonligini oshirishga ulkan hissa qoʻshadi. Bu yoʻlda davlat tomonidan yaratilayotgan har bir imkoniyat oʻzining yuksak samarasini berishi shubhasizdir.