Ijtimoiy obʼektlarning qurilish jarayoni prokuror nazoratida
Mamlakatimizda aholi farovonligini oshirish, fuqarolar uchun munosib turmush sharoitlarini yaratish hamda hududlarning meʼmoriy qiyofasini tubdan yangilash borasida keng koʻlamli islohotlar amalga oshirilmoqda. Ayniqsa, taʼlim va sogʻliqni saqlash tizimlarini zamon talablari darajasida rivojlantirish, ijtimoiy soha obʼektlarini qurish va rekonstruktsiya qilish davlatimiz siyosatining ustuvor yoʻnalishlaridan biriga aylangan. Bu borada Oʻzbekiston Respublikasi Prezidentining 2025-yil 27-dekabrdagi “2026-2028-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi 393-sonli qarori dasturilamal boʻlib xizmat qilmoqda.
Mazkur muhim hujjat ijrosini toʻlaqonli taʼminlash, davlat dasturlari doirasida belgilangan vazifalarning oʻz vaqtida va yuqori sifat bilan bajarilishini nazorat qilish maqsadida joylarda huquqni muhofaza qiluvchi organlar tomonidan tizimli oʻrganishlar olib borilmoqda. Xususan, Amudaryo tumani prokurori Bahrom Masharipov yuqoridagi qaror asosida tumanda amalga oshirilayotgan qurilish-taʼmirlash ishlarining borishi bilan bevosita joyiga chiqqan holda tanishdi.
Maʼlumki, har qanday jamiyatning ertangi kuni va taraqqiyoti bevosita yosh avlodga berilayotgan taʼlim-tarbiya sifatiga bogʻliq. Shu boisdan ham, maktablarning infratuzilmasini yaxshilash, oʻquvchilar uchun qoʻshimcha oʻrinlar yaratish va ilm olish uchun munosib muhitni shakllantirish muhim ahamiyat kasb etadi. Prokuratura organlarining navbatdagi oʻrganishlari davomida tumanning Daryo boʻyi mahallasi hududida joylashgan 65-sonli umumtaʼlim maktabida olib borilayotgan rekonstruktsiya ishlariga alohida eʼtibor qaratildi.
Loyihaga asosan, mazkur bilim maskani hududida qoʻshimcha 300-oʻrinli yangi va zamonaviy oʻquv binosi qad rostlamoqda. Tuman prokurori ushbu obʼektdagi qurilish jarayonlarini koʻzdan kechirar ekan, binoning poydevoridan tortib, tomigacha boʻlgan har bir bosqichda qurilish meʼyorlariga qatʼiy amal qilinishi lozimligini taʼkidladi. Yangi binoning foydalanishga topshirilishi mahalla yoshlarining yanada keng va yorugʻ xonalarda, ilgʻor shart-sharoitlarda bilim olishlariga xizmat qilishi alohida qayd etildi.
Shuningdek, inson salomatligini asrash, hududlardagi barqarorlikni taʼminlash ham eng dolzarb vazifalardan biri hisoblanadi. Shu maqsadda, Amudaryo tumani sanitariya-epidemiologik osoyishtalik va jamoat salomatligi boʻlimi binosini rekonstruktsiya qilish ishlari ham jadal surʼatlarda olib borilmoqda. Mazkur tibbiyot va nazorat maskanining yangilanishi tuman aholisiga koʻrsatilayotgan xizmatlar sifatini oshirishga, turli kasalliklarning oldini olishga va jamoat salomatligini mustahkamlashga zamin yaratadi. Prokuror mazkur obʼektda ham boʻlib, pudratchi tashkilotlar vakillari hamda masʼul xodimlar bilan ish jarayonini muhokama qildi. Loyiha doirasida bajarilayotgan ishlarning holati, ishlatilayotgan qurilish materiallarining sifati batafsil tahlil qilindi.
Oʻrganishlar yakunida tuman prokurori Bahrom Masharipov tomonidan masʼul rahbarlar va quruvchi tashkilotlar vakillariga tegishli koʻrsatma va topshiriqlar berildi. Xususan, har ikki obʼektda ham qurilish-taʼmirlash ishlarini yanada jadallashtirish, buning uchun ishchi kuchi va maxsus texnikalarni yanada koʻproq jalb qilish zarurligi taʼkidlandi. Ish surʼatini oshirish qurilish sifatiga aslo salbiy taʼsir koʻrsatmasligi, har bir jarayon davlat standarti talablariga toʻla javob berishi va obʼektlar belgilangan muddatlarda foydalanishga topshirilishi shartligi alohida taʼkidlandi.
Davlat byudjeti mablagʻlari hisobidan bunyod etilayotgan bu kabi inshootlar xalqimizning uzogʻini yaqin, ogʻirini yengil qilishga qaratilgan boʻlib, ularning sifatli va mustahkam barpo etilishi ustidan prokuror nazorati bundan buyon ham qatʼiy davom ettiriladi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
