HAR KUNINGIZ NAVROʻZ BOʻLSIN!
Assalomu alaykum, aziz yurtdoshlar! Moʻʼtabar otaxonlar, onaxonlar,
aka-ukalar, opa-singillar, kelajagimizning ishonchli vorislari boʻlmish jajji
bolajonlar!
Mana qahri qattiq qish orqamizda qolib, barcha bayramlarning sarvari
Navroʻzi olamni qarshi olishga chogʻlanmoqdamiz.
Yurtimizning bayramlari, tantanalari koʻp. Yaqindagina aziz onajonlarimiz, opa-singillarimiz bayrami – Xalqaro
xotin-qizlar kunini nishonlagan boʻlsak, mana endi Navroʻzga peshvoz chiqayapmiz.
Hammangizga maʼlum, Navroʻz yil boshi, Yangi kun sifatida belgilanadi. Bahor
kirib kelganiga yigirma kuncha vaqt oʻtsada haqiqiy koʻklam, maysalarning yerdan
bosh koʻtarishi, daraxtlarning jonlanishi bizning hududimizda Navroʻzga toʻgʻri
keladi. Bu sana bilan bogʻliq xalqimizning necha yuz yillik milliy anʼanalari,
urf-odatlari bisyorki, ular bayram mazmuniga mazmun, tarovatiga tarovat qoʻshadi.
Shu maʼnoda Navroʻz – haqiqiy milliy bayramimiz, qadriyatlarimiz boqiyligini oʻzida ifoda etuvchi, yerga nur,
dilga surur bagʻishlaydigan, mehnatkash, rizqini halol mehnati bilan undiradigan,
mehr-muruvvatli xalqimizning butun boʻy-bastini oʻzida yaqqol koʻrsata oladigan
bayram sifatida qadrlidir. Shu kuni ota-bobolarimiz ekin maydonlariga chiqib, yer
haydab urugʻ sochishgan. El katxudolari dehqonlarga ekkan urugʻlaringning biri ming
boʻlsin, elning rizqi moʻl boʻlsin, deya tilak tilab fotiha berishgan, ulkan
qozonlarda palov pishirilib, sumalak qaynatilgan. Yangi kun rizq-roʻz, fayz-baraka
ramzi ham hisoblangan.
Asrlar osha bizgacha yetib kelgan, koʻngillarimizga bahoriy joʻshqinlik,
yaratish, yashnatish zavqini baxshida etuvchi ulugʻ bayram Navroʻzi olam tantanalari yil
sayin mazmunan boyib, tobora jozibador boʻlib bormoqda.
Tumanimizning barcha hududlaridagi mahallalarda, mehnat jamoalarida,
umumtaʼlim va kasb-hunar taʼlimi muassasalarida Navroʻzga bagʻishlangan koʻngilochar
tadbirlar, sayllar allaqachon boshlanib ketdi.
Qutlugʻ kunlarni, muhim sanalarni alohida tadorik bilan qarshilamoq ham
azaliy odatlarimizdandir. Joriy yil Navroʻz bayramiga ham puxta taraddud
koʻrildi. Bayram oldi umumxalq hashari oʻtkazilib, chor-atrofimiz, koʻchalar,
hovlilar yanada saranjom-sarishta boʻldi, obodonlashtirildi, ezgu niyatlar bilan
koʻchatlar ekildi, atrofni bezab turgan daraxtlarga shakl berildi.
Azizlar! Men ishonch bilan ayta olamanki, tumanimizning har bir fuqarosi,
yurt ravnaqiga ravnaq qoʻshaman, turmushimni obod, farovon, goʻzal qilaman, degan
oliy maqsad bilan yashamoqda, mehnat qilmoqda. Tumanimizning turli jabhalarida
bularning isbotini yaqqol koʻrishimiz mumkin. Koʻpni koʻrgan moʻʼtabar
otaxonlarimizning, onaxonlarimizning yoʻl-yoʻriqlari, duolari bizga madadkor
boʻlmoqda.
Yurtimizning, xonadonlarimizning fayzi boʻlgan otaxonlar, onaxonlar!
Mamlakatimizni, tumanimizni gullab-yashnagan, obod goʻshaga aylantirishdek ezgu
maqsad yoʻlida birlashib, turli sohalarda mehnat qilayotgan aka-ukalar,
opa-singillar! Kelajagimiz boʻlgan jajji bolajonlar!
Sizlarni asl milliy bayramimiz – Navroʻzi olam bilan qizgʻin tabriklayman.
Har biringizga tani sogʻlik, xotirjamlik tilayman. Oilalaringiz doimo obodlik
nuridan charogʻon boʻlsin! Har bir kuningiz Navroʻzdek suyumli, shukuhli oʻtsin.
Rajabboy
YOʻLDOShEV,
tuman
hokimi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
