Tibbiyot muassasalariga 150 mingta grippga qarshi bepul vaktsina tarqatildi

Oʻzbekiston sogʻliqni saqlash vazirligi mamlakatimizdagi davlat tibbiy muassasalariga 150 ming dona grippga qarshi vaktsina tarqatdi. Gripp kasalligiga qarshi emlash ishlari boshlandi.

Gripp epidemiyasi va oʻtkir respirator kasalliklarni oldini olish boʻyicha kompleks chora-tadbirlarda vaktsinatsiyaga juda muhim eʼtibor qaratiladi.

 Oʻzbekistonda grippga qarshi bepul vaktsinatsiya epidimiologik koʻrsatmalarga asosan amalga oshiriladi. Byudjet hisobidan harid qilingan vaktsinalar asosan ogʻir yurak-qon-tomir kasaliga chalingan va tez-tez kasal boʻladigan bolalarga qilinadi. Epidemiologik vaziyatga qarab bepul vaktsinatsiya koʻp odamlar bilan muloqotda boʻladigan kasb egalariga ham qilinadi.

 Sogʻliqni saqlash vazirligida xabar qilinishicha, agar zarur boʻlsa davlat tomonidan qoʻshimcha vaktsinalar harid qilinishi koʻzda tutilgan.

 Soʻnggi yillarda grippga qarshi vaktsinani asosan yirik korxonalar oʻz xodimlarining salomatligi himoyasi uchun harid qilishadi. Bundan tashqari mamlakatimizda juda koʻp xususiy vaktsina markazlari faoliyat yuritayotgan boʻlib, ularda barcha istaganlar pullik ravishda mazkur vaktsinani qabul qilishlari mumkin.