FAXRIY USTOZGA EHTIROM KOʻRSATILDI

Insonparvarlikning yuksak tamoyillari asosida keksa avlod vakillariga hurmat va ehtirom koʻrsatish davlatimiz siyosatining asosiy  yoʻnalishlaridan biri. Ularni munosib turmush sharoitlari bilan taʼminlash, tizimli asosda sogʻlomlashtirishni tashkil etish, ularning bugungiday farovon, baxtiyor kunlarga erishish yoʻlidagi fidoyi xizmatlarini yoshlarga keng targʻib qilishga ularni ota-bobolar jasoratidan oʻrnak olib ulgʻayishlariga ulkan eʼtibor qaratilmoqda.

1932-yilda Qangli ovulida tugʻilgan Durdiboy bobo Erdoshev hozir 90 yosh ostonasida. U oʻz hududidagi 29-sonli maktabning 8-sinfini tamomlab dastlab, Xoʻjayli shahridagi  Pedagogika bilim yurtida, keyinchalik oʻqituvchilik qilish bilan birga Nukus Davlat Pedagogika institutining sirtqi boʻlimida tahsil olgan. Butan umrini ovul yoshlarini ilmli-maʼrifatli qilishga baxshida qilgan otaxon uzoq yillar 29-sonli, 39-sonli maktablarga rahbarlik ham qilgan.

Ovul yoshlari, shogirdlari shu boisdan ham otaxonni juda hurmat qilishadi, holidan tez-tez xabar olib turishadi.

Yaqinda 29-sonli maktabda oʻqituvchilar jamoasi va ovul fuqarolar yigʻini raisining keksalar va faxriylar masalalari boʻyicha maslahatchisi Jangaboy ota Rajabovlar tashabbusi bilan faxriy pedagog, yoshlarning sevimli ustozi Durdiboy ota Erdoshevning  90 yoshga qadam qoʻyishi munosabati bilan “Ustozga ehtirom” deb nomlangan tadbir oʻtkazildi.

Tadbirga maktab oʻqituvchilari, oʻquvchilaridan tashqari, faxriy oʻqituvchilar, ovul nuroniylari ham taklif etildi.

Tadbirni  maktab direktori Bahrom Safarov ochdi va ustoz muallimni tabarruk 90 yoshga qadam qoʻyayotgani bilan qizgʻin qutladi.

Shuningdek, faxriy pedagogning bosib oʻtgan sharafli hayot yoʻli haqida gapirdi. Shunisi eʼtiborliki, oʻsha davr turmush qiyinchiliklarini yengib oʻtib, iqtisodiy yetishmovchiliklarga qaramasdan Durdiboy Erdoshev ilm olishga, mohir pedagog boʻlib yetishib, ovul yoshlariga ham maʼrifat, maʼnaviyat ulashishdek niyatlar bilan oʻqidi, ishladi. Oliygohda sirtqi boʻlimda tahsil olish bilan birga 1954-yildan 1957-yilgacha Tinch okeani flotida harbiy xizmat burchini bajargan. 40 yillik oʻqituvchilik, rahbarlik faoliyati davomida samarali, benuqson ishlashga erishgan.

Ana shunday tabarruk inson oʻziga bagʻishlab tadbir tashkil etgan shogirdlarining hurmati-eʼtiboridan juda mamnun boʻldi. Shaʼniga aytilgan qutlovlar, tilaklardan koʻngli togʻday koʻtarildi.

Tadbirda namoyish etilgan maktab oʻquvchilari ijrosidagi kontsert dasturi  barchaga manzur boʻldi. Faxriy ustozga “Nuroniy” jamgʻarmasi boshqaruvi raisi, senator, Oʻzbekiston Qahramoni Sodiqjon Turdiyev nomidan tashakkurnoma va esdalik sovgʻalari tantanali suratda topshirildi.

Oʻqituvchi mehnatining bunday eʼtirof etilishi barchaga koʻtarinki kayfiyat bagʻishladi.

Oygul RAJABOVA.