ELIGA TAYaNCh BOʻLAYoTGAN HOKIM YoRDAMChISI

Yurtimizning barcha hududlarida Prezidentimiz tashabbusi bilan joriy etilib, faoliyat koʻrsatayotgan hokim yordamchilari uyma-uy yurgan holda har bir xonadonning holatini oʻrganmoqda va fuqarolarning iqtisodiy ahvoli yaxshilanishiga koʻmak bermoqda. Buning natijasida haqiqiy ehtiyojmand va boquvchisini yoʻqotgan oilalar, ishsizlarga tadbirkorlikni yoʻlga qoʻyishlariga koʻmaklashilib, bandligini taʼminlashga erishilmoqda. Amudaryo tumanida ham hokim yordamchilari tomonidan aholining ijtimoiy-iqtisodiy muammolarini hal etish, tadbirkorlikni rivojlantirish, ishsiz fuqarolar bandligini taʼminlash, kambagʻallikni qisqartirish borasida amalga oshirilayotgan ishlar oʻz samarasini bermoqda.

Tumandagi Doʻstlik mahallasi hokim yordamchisi Rashid Oʻrozimbetovning mutaxassisligi iqtisodchi. U tumandagi tijorat banki “Mikrokreditbank” tuman filiali boshqaruvchisi oʻrinbosari lavozimida ishlab kelayotgan boʻlib, mehnat faoliyatiga 13-yil toʻlgan edi.

U Doʻstlik mahallasiga hokim yordamchisi qilib tayinlanganidan keyin dastlab ishni aholini oʻrganish va mahallaning “oʻsish nuqtalari” va “drayver” loyihalarni aniqlashdan boshladi. Aholi bandligini taʼminlash va tadbirkorlikka jalb etish, mahalla hududida davlat-xususiy sheriklik asosida tadbirkorlikni rivojlantirish, mahallabay ishlash tizimini yangi bosqichga olib chiqish orqali kambagʻallikni qisqartirish kabilar borasida tegishli chora-tadbirlar belgilab olib, shunga koʻra ishlarni tashkil etishga harakat qildi.

Doʻstlik mahallasida 3 ming 804 nafar aholi yashaydi. Hududdagi 590 ta xonadon xatlovdan oʻtkazilganida 917 ta oila yashashi aniqlandi. Mahallada 22 ta xizmat koʻrsatish obʼektlari, 1 ta MTT, 1 ta maktab mavjud. Hokim yordamchisi tomonidan xatlov oʻtkazilganidan soʻng, xonadonlar 4 toifaga ajratildi.

Oʻtgan yil davomida hokim yordamchisining koʻmagi bilan mahallada yashovchi 175 nafar fuqaro doimiy ishga joylashtirilib, 25 nafari mavsumiy va jamoat ishlariga jalb etildi. Shuningdek, oʻzini-oʻzi band qilgan aholi soni 101 nafar, ijara asosida yer ajratish hisobiga bandligi taʼminlanganlar 5 nafarga yetkazildi.

Mahalla hududida hokim yordamchisining tavsiyanomasi asosida tumandagi tijorat banki tomonidan 33 mln. soʻm imtiyozli kredit ajratilib, “Jasur Dilrabo gilam yuvish” oilaviy korxonasi tashkil etildi. Hozirgi kunda ushbu oilaviy korxona aholiga avtomobillarni yuvish va gilam yuvish xizmatlarini koʻrsatib kelmoqda. Korxonada mahalla fuqarolaridan 2 nafarining bandligi taʼminlanib, 25 nafari mavsumiy va jamoat ishlariga jalb etildi.

Undan tashqari, yakka tadbirkor Shahnoza Yoqubovaga hokim yordamchisi tomonidan 33 mln. soʻm miqdorida imtiyozli kredit olishiga tavsiyanoma berildi. Tadbirkor ushbu mablagʻlar evaziga yoshlarning boʻsh vaqtlarini mazmunli oʻtkazishlarini taʼminlash maqsadida kompyuter oʻyinlari, internet kafe va kibersport yoʻnalishlarida faoliyat tashkil etdi.

Shuningdek, yana bir tadbirkor Jonibek Yoʻldoshev ham hokim yordamchisi koʻmagi bilan 33 mln. soʻm kredit mablagʻlarini oldi va oilaviy maktabgacha taʼlim tashkiloti faoliyatini yoʻlga qoʻydi. Buning natijasida 2 nafar fuqaroning bandligi taʼminlandi. Shu bilan birga kasb-hunar va tadbirkorlikka 31 nafar fuqaro oʻqitilib, 65 ta loyihaga koʻra kredit mablagʻlari, 9 nafar ishsiz fuqaroga subsidiya ajartilishiga ham yordam berdi.

Mahallada aholiga qiyinchilik tugʻdirib kelayotgan mavjud muammolardan biri boʻlgan 1 ta eski transformator yangisiga almashtirildi. Hududdagi Shoʻrchi koʻchasining 1,8 km. qismiga tosh yotqizildi. Ayni paytda piyodalar yoʻlakchasi va bolalar maydonchasini qurish ishlari amalga oshirilmoqda.

Hokim yordamchisi Rashid Oʻrozimbetovning bu yilgi niyatlari, rejalari ham katta. U fuqarolar yigʻini masʼullari bilan bamaslahat holda yana 190 nafar aholining bandligini taʼminlashga, 126 nafar fuqaroning oʻzini oʻzi band qilishiga koʻmaklashishni maqsad qilgan. Undan tashqari, mahalla ixtisoslashuvidan kelib chiqqan holda “drayver” loyihalarni hamda investitsiya dasturlariga kiritilmagan “mikroloyiha”lar amalga oshirilishida koʻmaklashish, aholini tadbirkorlikka jalb etish orqali daromadga ega boʻlishini taʼminlash boʻyicha ham saʼy-harakatlar olib bormoqda.

Mahallaning suyanchi va elning tayanchiga aylangan hokim yordamchisi Rashidjon Oʻrozimbetov hudud aholisining haqiqiy koʻmakchisiga aylanmoqda. Davlat rahbariga va yurtdoshlariga kamarbasta boʻlayotgan Doʻstlik mahallasi hokim yordamchisiga biz ham kuch-quvvat tilaymiz.

O.Xudoyberganova.