3 mlrd. soʻmlik bank krediti hisobiga ish boshlagan agrofirma samarali faoliyat yuritmoqda

Parrandachilik – daromadli, shu bilan birga anchayin nozik soha. Parrandalar nafaqat goʻshti, tuxumi, balki pati uchun ham boqiladi. Bu soha hozirga kelib chorvachilikdagi asosiy yoʻnalishlardan biriga aylanib ulgurdi. Buning sababi – parranda boqish katta xarajat talab qilmaydi, saqlash inshootlari ham juda oddiy.

Mutaxassislar fikricha, iqtisodiy yetakchi davlatlarda ham parrandachilikka katta eʼtibor qaratiladi. Chunki, aynan parrandachilik aholini goʻsht, umuman, oziq-ovqat mahsulotlariga boʻlgan talabini qondirishda muhim ahamiyat kasb etadi, shuningdek, aholini ish bilan band boʻlishiga hissa qoʻshadi.

Amudaryo tumanining Beshtom mahallasi hududida joylashgan “Oʻrta qalʼa chorvadori” agrofirmasida parrandachilikning goʻsht yoʻnalishi boʻyicha 40 mingta joʻja yetishtirilmoqda.

Firma rahbari Gʻulomjon Rasulovning takidlashicha, Oʻzbekistonda parranda goʻshti va tuxumga boʻlgan talab juda yuqori boʻlib, mazkur soha bilan shugʻullanish uchun tumanning oʻzida barcha sharoitlar mavjud.

– Otam Erkin Rasulovning yoʻl-yoʻriqlari va koʻrsatmalari bilan 2020-yilda 3 mlrd. soʻm miqdorida imtiyozli kredit olib, ushbu agrofirmani ochdim. Dastlab, ish faoliyatimizni 10 ming joʻja boqishdan boshlaganmiz. Oʻsha vaqtda qoʻl ostimda 3 nafar ishchi bor edi. Hozir esa 12 nafar ishchimiz bor, deydi tadbirkor Gʻulomjon Rasulov.

Joʻjalar Toshkent va Guliston shaharlaridan olib kelinadi. Ular 28-30 kun davomida boqilib, sof vazni 1 kg 800 gr va 2 kg boʻlgandan keyin shu yerning oʻzida soʻyilib, tozalanadi va doʻkonlarga tarqatiladi.

Joʻjalarni boqish jarayoni 3 davrga boʻlinadi. Birinchi davr – kunlik tiklanish davri, ikkinchi davr – oʻsish davri va uchinchi davr – yetilish davri. Eng oxirgi 10 kunlikda joʻjalar soʻyish uchun tayyor holatga keladi deydi.

Tadbirkor uy sharoitida parranda yetishtirish va undan foyda olish sirlari, yuqori kaloriyali ozuqa tarkibi, parranda yetishtirishda eʼtibor berish kerak boʻlgan asosiy jihatlar haqida ovuldoshlariga ham kerakli maʼlumotlar berib boradi.

Uning aytishicha, parranda uchun baxor va yoz fasli gʻoyat qulay sharoit hisoblanadi. Jonivorlar ana shu faslda tez voyaga yetib, kuz oylarida tuxum bera boshlaydi. Sogʻlom parranda yetishtirish va undan koʻplab tuxum olish uchun parvarishga faqat sogʻlom, tirik vazni 35-40 gramm boʻlgan, harakatchan, oyogʻida mustahkam turuvchi, yaxshi patli va qanotlari gavdasiga mustahkam qisilgan joʻjalar tanlanadi. Bu bilan esa goʻshti va tuxumi uchun boqiladigan parrandalarni baravariga yetishtirish imkoni boʻladi.

Oʻylaymizki mehnatkash tadbirkorning parrandachilik sohasidagi faoliyati ushbu sohaga qiziqqan insonlar uchun foydali boʻladi.

Tuman hokimligining Axborot xizmati.