Uyshin madaniyat uyida Referendum targʻibotiga bagʻishlangan tadbir oʻtkazildi

Bundan yigirma bir yil avval 2002-yil 27-yanvarda Oʻzbekiston Respublikasida ikki palatalik parlamentni shakllantirishga bagʻishlangan Referendum boʻlib oʻtgan edi. Bu yil oʻtkaziladigan referendumda Konstitutsiyamizga kiritiladigan koʻshimcha va oʻzgartirishlar hech kimni befarq qoldirmayotganligini, jonajon xalkimizning ongida va qalbida ertangi kunga boʻlgan ishonchi, gʻurur-iftixori porlab turganligining har onda guvohi boʻlmoqdamiz.

 Yurtboshimiz taʼbiri bilan aytganda, konstitutsiyaviy islohotni fuqarolarimiz fikri va qoʻllab-quvvatlashi asosida, referendum orqali amalga oshirsak, bu tom maʼnoda xalqimiz xoxish irodasining ifodasi-haqiqiy xalq Konstitutsiyasi boʻladi.

 Xalqimizning bevosita xohish va istaklari ifoda etiladigan kun etib 30-aprel sanasi belgilandi. Ushbu siyosiy jarayonda fuqarolarning faol ishtirokini taʼminlash maqsadida turli targʻibot tadbirlari oʻtkazilib kelinmoqda. Amudaryo tumanining Uyshin madaniyat markazida boʻlib oʻtgan targʻibot tadbiri ham shular jumlasidandir.

Tadbirda Referendum oʻtkazishga koʻmaklashuvchi komissiya aʼzolari, keng jamoatchilik vakillari, faol fuqarolar ishtirok etishdi.

Targʻibot tadbirida soʻzga chiqqanlar Konstitutsiyaviy Qonun loyihasini tayyorlash va maromiga yetkazishda Qonunchilik palatasining 2022-yil 24-iyundagi qarori bilan “Qonun loyihalarining umumxalq muhokamasi toʻgʻrisida”gi Qonun talablariga rioya etilgan holda ikki bosqichda umumxalq muhokamasi oʻtkazilganligi, ushbu jarayonda “Meningkonstitutsiyam.uz” elektron platformasi, qisqa raqamli call-markazi, pochta aloqasi, mahallalar, xalq deputatlari mahalliy Kengashlari va ijtimoiy tarmoqlar orqali Respublikamizning barcha hududlaridan fuqarolarimiz, ayniqsa yoshlarimizdan 220 mingdan ortiq fikr va takliflar qabul qilingan hamda tahlil qilinganligini aytib oʻtishdi.

Shuningdek, yangi tahrirda qabul qilinayotgan Oʻzbekiston Respublikasi Konstitutsiyasi 65 foizga yangilanib, moddalar soni hozirgi 128 tadan 155 taga, undagi normalar esa 275 tadan 434 taga oshirilayapti. 128 ta moddaning 91 tasiga kontseptual oʻzgarishlar kiritilmoqda.

Shu oʻrinda aytish kerakki, jamiyat va davlat hayotining eng muhim masalalari yuzasidan oʻtkaziladigan referendum haqida har bir fuqaro albatta bilimga ega boʻlishi, qonunchilikni yaxshi bilishi, oʻz huquqlaridan toʻla-toʻkis unumli foydalanishi gʻoyat muhim ahamiyat kasb etadi.

Konstitutsiyamizga kiritilayotgan oʻzgartishlar esa, kelgusida hayotimizning har bir jabhasida oʻzining ijobiy ifodasini topishi shubhasiz.

Aziz yurtdoshlar! 2023-yil 30-aprelda oʻtkaziladigan referendum, bu shunchaki muhim siyosiy tadbir boʻlib oʻtadigan kun boʻlibgina qolmay, har birimizning,  farzandlarimizning tinchligini, farovon va osuda hayotini belgilab beruvchi hujjatning qabul qilinishi uchun ovoz beriladigan kun ekanligini unutmaylik!

Shunday ekan, referendumda faol ishtirok etib, oʻz Konstitutsiyaviy burchimizni roʻyobga chiqargan holda ovoz beraylik!

Diana Bazarbayeva QDUning jurnalistika fakulteti talabasi