YoZ MAVSUMIDA AHOLINING ChOʻMILISh PAYTIDA SUVGA ChOʻKIShINING OLDINI OLISh BOʻYIChA OʻQUV MAShQI OʻTKAZILDI

Yoz faslining yuqori haroratli, issiq kunlarining ham oʻz gashti bor. Bunday damlarda soya-salqinlarda dam olish, suvda choʻmilishni koʻpchilik orziqib kutadi. Biroq aynan shunday jarayonlarda xavfsizlik qoidalariga amal qilinmasligi – koʻpgina koʻngilsizliklarni keltirib chiqaradi.

Oʻtgan yillarda sodir boʻlgan suvda choʻkish holatlariga nazar tashlasak, sabablari oddiygina: hali suzishni yaxshi oʻrganmagan bolalarning oqim tez va suvi chuqur havzalarda choʻmilishi, yosh bolalarning ehtiyotsizlik oqibatida suvga tushib ketishi va hokazolar. Ayrim hollarda esi-hushi joyida, yoshi katta odamlarning ham belgilanmagan suv havzalarida choʻmilish vaqtida ehtiyotsizligi oqibatida oqib ketishi holatlari sodir boʻlgan.

Joriy yil yoz kelib, kunlar isishi bilan turli kanallarda, suv havzalarida Amudaryoning oqim past hududlarida aholi choʻmilishni boshladilar. Bunday vaqtlarda ularning hayoti xavfsiz, deya olamizmi? Afsuski yoʻq!

Shu yilning 27-may kuni Amudaryoning Qipchoq shaharchasi hududidan oqib oʻtuvchi qismi sohilida joriy yil yoz mavsumida aholining suvda choʻkishi bilan bogʻliq baxtsiz hodisalarning oldini olish yuzasidan oʻquv- mashgʻuloti oʻtkazildi.

Tadbirda tuman hokimligi, Favqulodda vaziyatlar boʻlimi, milliy gvardiya xodimlari, hududdagi ovul, mahalla, shaharcha fuqarolar yigʻinlari raislari, profilaktika inspektorlari, tibbiyot xodimlari va aholi ishtirok etdilar.

Oʻquv mashgʻulotida yigʻilganlarga tuman Favqulodda vaziyatlar boʻlimi xodimi Bekzod Tajiboyev yoz mavsumida aholining suvda choʻkishi bilan bogʻliq baxtsiz hodisalarning oldini olish borasida ovul, mahalla fuqarolar yigʻinlari masʼullari, Maktabgacha va umumiy oʻrta taʼlim muassasalari rahbarlari, ota-onalar zimmasidagi amalga oshirilishi lozim boʻlgan vazifalar xususida maʼruza qildi. Shuningdek, choʻmilishga ruxsat etilmagan akvatoriyalarda choʻmilish, spirtli ichimlik isteʼmol qilgan holda choʻmilish, yosh bolalarning katta yoshli oila aʼzolari ishtirokisiz choʻmilishi oqibatida sodir boʻlishi mumkin boʻlgan baxtsiz hodisalarning oldini olishga har bir fuqaro masʼul ekanligini taʼkidladi. Aholining choʻmilish mavsumida suv havzalarida xavfsizlikni taʼminlagan holda kichik hajmli kemalardan toʻgʻri foydalanish qoidalarini keng tushuntirdi.

Shundan soʻng ota-ona qarovisiz belgilanmagan hududda suvga choʻmilib, oqib ketayotgan oʻsmirni qutqarish amaliyoti koʻrsatib berildi. Oʻsmirni favqulodda vaziyatlar boʻlimi xodimlari suvdan olib chiqishib,zambilda sohil ichkarisiga yetkazishdi va gavdasini zarur holatga keltirib, choʻkish paytida yutgan suvlarini qayd qildirishdi. Shoshilinch yetib kelgan “Tez tibbiy yordam” boʻlimi xodimlari oʻsmirga birinchi tibbiy yordam koʻrsatishdi. Aslida bu tayyorlangan oʻquv mashgʻuloti boʻlsa-da, taʼqiqlangan joyda choʻmilishning oqibatini toʻla ifodalab bera oldi.

Yoshi ulugʻlar “oʻt balosidan, suv balosidan oʻzing asragaysan”, deya duo qilishlari bejiz emas.

Buningdek koʻngilsizliklarning oldini olishda keng jamoatchilik, ota-ona nazorati va turli usullar bilan targʻibot olib borish lozimligi yuzasidan Toʻlqin ovul fuqarolar yigʻini raisi Rashid Abdugʻaliyev, Choykoʻl ovul fuqarolar yigʻini raisi Bekzod Aytekov, Uyshin mahalla fuqarolar yigʻini raisi Rustam Rajabovlar oʻz fikr-mulohazalarini bildirdilar. Shuningdek, tumanimizning turli hududlarida mavjud suv havzalarining choʻmilish taʼqiqlangan joylariga maxsus belgilar qoʻyilishi lozimligini taʼkidladilar.

Inson hayoti – bebaho. Uni beʼmani orzu-havaslar yoʻlida xatarga qoʻyish, taʼqiqlangan joylarda choʻmilib, oʻzini koʻz-koʻz qilish mumkin emas. Chunki inson hayotga bir martagina kelishini unutmaylik.

Oygul RAJABOVA.