FVB ogohlantiradi: taqiqlangan joylarda choʻmilish hayot uchun xavfli!

Har faslning oʻz gashti bor: kuzning turfa neʼmatlarga boy tarovati, qish-u bahorning oʻziga xos betakror goʻzal tabiati insonni hamisha tabiat bagʻriga chorlayveradi. Ayniqsa, yoz fasli xalqimiz uchun pishiqchilik, moʻl-koʻlchilik va rizq-nasiba damlari bilan hamisha maftunkor. Shu bois, xalqimiz tabiat bagʻrida maroqli dam olish, oilaviy sayohatlar uyushtirish, harorat koʻtarilgan kezlarda daryo va kanallar boʻylarida sayr qilish, jamoaviy holda choʻmilish kabi tadbirlarni aynan yoz fasliga rejalashtirishadi. Bu kabi hordiq damlari insonni har tomonlama toblaydi, salomatligini mustahkamlash imkonini beradi.

Lekin fuqarolar juda koʻpchilik holatlarda tabiat bagʻrida dam olish jarayonida oʻta ehtiyotkor boʻlish, ayniqsa suv havzalari yaqinida dam olish, sayr qilish, choʻmilish qoidalariga qatʼiy amal qilish zarurligi, salgina ehtiyotsizlik tuzatib boʻlmas xatolarga sabab boʻlishi mumkinligi haqida oʻylab ham koʻrmaydilar. Vaholanki, ana shunday befarqlik oqibatida har yili yoz faslida suv havzalarining taqiqlangan hududlarida choʻmilish bilan bogʻliq fojiali holatlar sodir boʻladi va bunday vaziyatlarda koʻpincha yosh bolalar ota-onalarining eʼtiborsizliklari bois, vafot etishadi.

Yuqoridagi kabi salbiy holatlarning oldini olish maqsadida Amudaryo tumani Favqulodda vaziyatlar boʻlimi tomonidan fuqarolar muhofazasi bilan bogʻliq chora-tadbirlar rejasi ishlab chiqilib, shu asosda aholi oʻrtasida zarur tushuntirish-targʻibot ishlari olib borilmoqda.

Xususan, Amudaryo tumani hokimi – Fuqaro muhofazasi boshligʻining “2025-yil choʻmilish mavsumida aholining suvda choʻkishi bilan bogʻliq baxtsiz hodisalarning oldini olish boʻyicha kompleks chora-tadbirlar toʻgʻrisida”gi joriy yil 2-maydagi buyrugʻining ijrosini taʼminlash maqsadida tuman Favqulodda vaziyatlar boʻlimi xodimlari tomonidan tuman hududidan oqib oʻtuvchi daryo va kanallar boʻylari doimiy nazoratga olinib, profilaktik tadbirlar amalga oshirilayotgani bu borada oʻzining ijobiy samarasini bermoqda.

Kunlarning isib ketishi natijasida fuqarolar bilan choʻmilish mavsumi davomida respublika hududida, shu jumladan Amudaryo tumanida ham choʻmilish taqiqlangan hududlarda choʻmilish qoidalari hamda odamlar hayoti va sogʻligʻini muhofaza qilish yuzasidan oʻtkazilayotgan suhbatlar, Favqulodda vaziyatlar boʻlimi xodimlaridan iborat ishchi guruhlar tomonidan amalga oshirilayotgan tezkor reydlar jarayonida aniqlangan salbiy holatlarning borligi esa juda achinarli.

Tezkor reydlar jarayonida Favqulodda vaziyatlar boʻlimi xodimlari aholini choʻmilish belgilanmagan joylarda suvga choʻkish bilan bogʻliq baxtsiz hodisalarning koʻpchiligi asosan suzishni bilmaydigan fuqarolar bilan roʻy berayotganligini, shu bilan bir qatorda yosh bolalarni qarovsiz qoldirmaslikni va ularning oʻzboshimchalik bilan daryo va kanallarga choʻmilishiga yoʻl qoʻymaslik zarurligi yuzasidan ogohlantirib, daryo va kanallar qirgʻoqlariga oʻrnatilgan “Choʻmilish taqiqlanadi” belgisi ostidagi bannerlarga eʼtiborli boʻlishlari zarurligi xususida tushuntirishlar olib borishmoqda.

Har bir faslning oʻziga yarasha jozibasi boʻlgani singari, yozning issiq tafti ham insonlarni soya-salqinlik sari chorlaydi. Bunda huzurbaxsh suvda maza qilib choʻmilishga nima yetsin.

 Biroq, choʻmilishning huzurbaxshligi bilan bir qatorda, har yili dunyo boʻylab 300 ming nafarga yaqin insonlar mana shu huzur istagida belgilanmagan joylarda choʻmilishlari oqibatida hayotdan bevaqt koʻz yumayotganligi kishini oʻyga toldiradi. Faqat soʻnggi 5-yil davomida suvda choʻkib halok boʻlgan yoshlarning 95 foizi ota-onalar tomonidan nazoratsiz qoldirilganligini inobatga olsak, bu borada ota-onalar yanada ehtiyotkor boʻlishlari zarur.

Chunki yoshlar oʻrtasida yuzaga kelayotgan suvdagi halokatlarning aksariyati ularning nazoratsiz qoldirilishi va oʻzboshimchaliklari oqibatida sodir boʻlmoqda. Katta yoshdagi fuqarolarning suvga choʻkish holatlari asosan ularning spirtli ichimliklar isteʼmol qilib, mast holda choʻmilishlari oqibatida yuz bermoqda. Suvga choʻkish bilan bogʻliq bunday salbiy hodisalar Amudaryo tumanida ham sodir boʻlayotgani hech kimga sir emas.

Xususan, bundan 5-yil oldin Toʻlqin ovulida istiqomat qiluvchi 2007-yilda tugʻilgan 13 yoshli oʻsmir ota-onalarining nazoratsizligi tufayli suvga choʻkish oqibatida bemavrid halok boʻldi. 2023-yil 17-avgust kuni esa Jizzax viloyatida istiqomat qiluvchi fuqaro spirtli ichimlik isteʼmol qilib choʻmilish oqibatida Amudaryo daryosiga choʻkib vafot etdi.

Insonning salomatligi, uning hayoti daxlsizligi juda koʻp jihatdan uning oʻziga bogʻliq. Har qanday vaziyatda salgina ehtiyotsizlik, ayniqsa, ota-onalarning oʻz farzandlarini nazoratsiz qoldirishlari kutilmagan baxtsizliklarga sabab boʻlishi mumkin.

Shunday ekan, yuqoridagi kabi koʻngilsiz holatlarning oldini olish nafaqat Favqulodda vaziyatlar boʻlimi xodimlari, balki har bir fuqaroning zimmasidagi masʼuliyatli vazifasidir. Demak, yoz faslining oromga, huzur-halovatga chorlovchi lahzalarini osoyishta va koʻngilli oʻtkazishda FVB tomonidan taqiqlovchi belgilar qoʻyilgan hududlarda sayr qilmaslik, choʻmilmaslik toʻgʻrisidagi talab va qoidalarga amal qilish hayotimizga mazmun va osoyishtalik olib kelishini aslo unutmaylik.

Amudaryo tuman FVB maʼlumotlari asosida Robiya Yoʻldosheva tayyorladi.