XOTIRALARDA MANGU YaShAYoTGAN FIDOYI USTOZ

Yaqin doʻst-u  birodarlar davralarida bir ibora juda koʻp ishlatiladi: “Hayot – karvon, biz - yoʻlovchi”.

Ha, azizlar, hayot hech qachon toʻxtamaydigan, tin olmaydigan karvon. Inson ana shu karvonda doimiy yoʻlovchi, koʻzlagan manzillari tomon tinimsiz yoʻl bosaveradi. Yoʻllar esa hech qachon tep-tekis emas. Bu yoʻllarda tadbirli, ilmli, xalqparvar, mehr-oqibatni oʻz hayot yoʻlida asosiy  shior qilib olgan insonlar atrofidagilarning ham, yaqinlari va el-u yurtning ham hurmatiga, eʼzoz-eʼtirofiga sazovor boʻladilar. Asli qozoq millatiga mansub Nazarimbat ota Almurodov ana shunday hurmat va eʼzozga munosib inson edilar.

Butun umrini Amudaryo tumanining qishloq xoʻjaligini, taʼlim-tarbiya sohasini rivojlantirishga bagʻishlagan Nazarimbat ota Almurodovning oʻzi hayotligida xalqiga, mahalladoshlariga qilgan yaxshiliklari, yosh avlod taʼlim-tarbiyasiga qoʻshgan ulkan hissasi hamon el-yurt eʼtirofida, goʻzal xotiralarda yashayotgani ham ana shu samimiy  hurmat va eʼzoz tufayli. Zero, elim, yurtim, degan fidoyilar oʻz elining yuragida mangu yashab qoladi.

Nazarimbat Almurodov 1928-yilda hozirgi  Choykoʻl ovulida, dehqon oilasida tugʻildi. U avval qishloqdagi boshlangʻich maktabda, soʻngra 1-sonli umumtaʼlim maktabida tahsil oldi. Dastlabki mehnat faoliyatini 1942-1943-yillarda oʻsha davrdagi Qipchoq tumani prokuraturasida ish yurituvchi vazifasida ishlashdan boshlagan Nazarimbat Almurodov 1943-yilda oʻqituvchilar tayyorlash qisqa kursini tamomlab, 1961-yilgacha oʻz qishlogʻidagi maktablarda avval oʻqituvchi, keyinchalik ilmiy boʻlim mudiri, maktab direktori lavozimlarida ishladi. Ishdan ajralmagan holda oliy maʼlumot oldi. U taʼlim sohasida ishlasa-da, doimiy ravishda ijod bilan shugʻullandi. 1961-1970-yillar oraligʻida Toʻlqin va Doʻstlik jamoa xoʻjaliklarida partiya tashkiloti kotibi sifatida siyosiy faoliyat olib borgan davrlarida ham ijod qilishdan aslo toʻxtamadi. Hatto 1970-1973-yillarda “Amudaryo haqiqati” gazetasida boʻlim mudiri, muharrir oʻrinbosari vazifalarini mahorat bilan ado etdi. 1973-yildan to 1988-yillargacha Choykoʻl ovulidagi umumtaʼlim maktablarida oʻqituvchi boʻlib ishladi va yuzlab yoshlar qalbiga maʼnaviyat nurlarini olib kirdi.

Nazarimbat Almurodov hayot  karvoni aro 76 yillik sermazmun, mohiyatan xalqi, Vataniga payvasta goʻzal umr gulshanini yaratdi. U ustoz sifatida yuzlab yoshlarning orzulariga qanot bagʻishladi, ularni el-u yurtga kamarbasta insonlar qilib tarbiyaladi. Ijodkor sifatida minglab sheʼriyat, maʼnaviyat ixlosmandlarining qalblariga oʻzining ezguliklarga, doʻstlik va tinchlikka chorlaguvchi joʻshqin sheʼriyati bilan koʻtarinki ruh bagʻishladi. Mahalladoshlarining toʻy-marosimlarida aziz xalqiga mehrini sheʼrlarida madh etdi.

Ovulimning ul shetinde turkpenim,

Bu shetinde boshqurd, qazaq, tatarim.

Qoʻylar soʻyar oyogʻimning astina,

Oʻzbek, qaraqalpaq bari qoʻstarim.

Safarboy, Ametxoʻja nagʻz oʻzbegim,

Miyrini toʻseydi keler joʻlima.

Doʻstlarim bar boʻlsin, mening tilegim,

Qoʻllari tiyib tursin, mening qoʻlima.

Shinin aytsam, men oʻzim qazaq,

Doʻgeregim toʻli qaraqalpaq.

Qayda boʻlsaq, tamir bir-gʻoʻy.

Sagʻintirmang doʻstlar, uzaq.

Sagʻinamin, - dep, - koʻrmesem,

Qoʻsiq jazar magʻan Baltaq.

Xapa boʻlar bir barmasam,

Ham Jaylixan, ham Januzaq.

Deb kuylab oʻtgan Nazarimbat otani joriy yilning 10-iyun sanasida el-u xalqi, doʻst-u yoronlari dildan xotirladilar. Mangʻit shahridagi “Istiqlol” toʻyxonasida Nazarimbat Almurodovning farzandlari yozgan xudoyi dasturxon atrofida jam boʻlgan choykoʻllik, toʻlqin ovullik, Amudaryo tumanining deyarli barcha hududidan kelgan shogirdlari, xesh-aqrabolari, doʻstlari otaxon bilan bogʻliq shirin xotiralarini yodga oldilar. Qardosh Qozogʻiston davlatidan tashrif buyurgan mehmonlar Nazarimbat ogʻa oʻz sheʼrlarida yozganlariday, bu aziz insonning oʻzi hayotligida “qoʻllari-qoʻllariga tegib turgan” qadirdonlari mehr-muhabbat bilan qadrdoshlik, qondoshlik muhabbatlarini izhor etdilar.

Ulugʻ Tangri nomini zikr etib yozilgan fayzli dasturxondan totingan marosim ishtirokchilari Nazarimbat ota Almurodovning ezgu xislatlari, ibrat va hikmatlarga toʻla hayot yoʻli, bu insondan olgan hayot darslari xususida toʻlqinlanib soʻz yuritdilar.

Marosimda Qurʼon oyatlaridan tilovatlar aytilib, Nazarimbat ota Almurodovning haqlariga duolar qilindi. Farzandlariga omonlik, Nazrimbat ota shajarasiga bardavomlik, el-yurtga tinchlik, farovonlik tilagan xotira marosimi ishtirokchilari bir-birlariga hayot karvonida Nazarimbat ota kabi ulugʻ manzillarni quchib yashash barchaga yor boʻlishini tiladilar.

Robiya YOʻLDOShEVA.