Amudaryoliklar Oʻzbekiston Respublikasi Prezidenti saylovida faol ishtirok etishdi

9-iyul kuni mamlakatimiz tarixidagi muhim siyosiy jarayon − muddatidan ilgari Oʻzbekiston Respublikasi Prezidenti saylovi boʻlib oʻtdi. Prezidentlikka nomzod sifatida Tadbirkorlar va ishbilarmonlar harakati – Oʻzbekiston Liberal-demokratik partiyasi va Oʻzbekiston “Milliy tiklanish” demokratik partiyasidan Shavkat Mirziyoyev, Oʻzbekiston Ekologik partiyasidan Abdushukur Hamzayev, Xalq demokratik partiyasidan Ulugʻbek Inoyatov, “Adolat” sotsial-demokratik partiyasidan Robaxon Maxmudovalar koʻrsatilgan edi. Yurtdoshlarimiz saylov kuniga qadar nomzodlarning Oʻzbekistonni har tomonlama rivojlantirish maqsadida ishlab chiqilgan saylovoldi dasturi bilan yaqindan tanishib, shu kuni oʻzlari munosib deb bilgan nomzodga ozoz berdilar.

Ovoz berish jarayoni Amudaryo tumanidagi barcha saylov uchastkalarida ham uyushqoqlik bilan boʻlib oʻtdi. Doʻstlik mahallasi hududida joylashgan 91-sonli saylov uchastkasida ham ertalabdan odam gavjum boʻldi. Mahalla faollari, koʻcha boshchilari va nuroniylarning saylov kunigacha joylarda olib borgan targʻibot ishlari natijasida aholi saylov uchastkalariga kelib, ovoz berish jarayonida faol ishtirok etdilar.

Tuman hokimi Sultonboy Yoʻldashev ham mazkur saylov uchastkasiga tashrif buyurib, oʻz konstitutsiyaviy huquqidan foydalangan holda oʻzi munosib deb bilgan nomzodga ovoz berdi.

Ovoz berish jarayoni Olmazor mahallasi hududida joylashgan 95-sonli saylov uchastkasida ham yuqori kayfiyatda uyushqoqlik bilan boʻlib oʻtdi. Saylov kuniga qadar mazkur saylov uchastkasi ham boshqa saylov uchastkalari singari zamonaviy axborot-kommunikatsiya texnologiyalari, zarur adabiyot hamda qoʻllanmalar bilan toʻliq taʼminlanib, ovoz berish kabinalari va qutilari saylovchilar uchun taxt qilib qoʻyildi. Yurtdoshlarimiz oʻzining, farzandlarining, yaqinlarining kelajagiga befarq boʻlmagan holda eng munosib nomzodni tanlab, ovoz berishdi.

Beruniy mahallasi hududida joylashgan 94-sonli saylov uchastkasida ham ovoz berish jarayoni ertalabki 8:00 dan boshlandi. Hamyurtlarimizning koʻpchiligi oʻz oila aʼzolari bilan birgalikda saylov uchastkasiga kelib ovoz berdilar. Oʻz fuqarolik huquqidan foydalangan har bir yurtdoshimiz Vatanimiz taqdiriga befarq emasliklarini, oʻzi tanlagan nomzodga ovoz berish orqali koʻrsatishdi.

Prezident saylovida Xitoy ovul fuqarolar yigʻinida istiqomat qiluvchi saylovchilar 120-sonli saylov uchastkasiga borib ovoz berdilar. Ovoz berish jarayonlarida saylovchilar uchun barcha sharoitlar yaratildi. Siyosiy partiyalar vakillari boʻlgan kuzatuvchilar ham zarur sharoitlar bilan taʼminlandi. Oqsoqollar, koʻcha boshchilari, koʻcha sardorlari va ularning oila aʼzolari ayniqsa oʻz faolligini koʻrsatishdi. Har bir koʻcha boshchisi oʻz koʻchasida istiqomat qiluvchi qoʻshnilari bilan birgalikda kelib, oʻzlari munosib deb bilgan nomzodga ovoz berdilar.

Shu kuni Qilichboy ovulida yashovchi yoshlar – Bunyod Xudoybergenov va Iroda Alimovalar oila qurishdi. Yosh kelin-kuyovlar oʻzlari roʻyxatga olingan 106-sonli saylov uchastkasiga borib, Prezident saylovida ishtirok etishdi va oʻzlari munosib deb bilgan nomzodga ovoz berdilar.

Mahalla faollari yosh oilaning kelajakda eng baxtli oilalardan biri boʻlishlarini, qurayotgan oilasi mustahkam boʻlishlarini tilab duo qildilar va oʻzlarining oq fotihalarini berdilar.

Imkoniyati cheklangan, shifoxonada davolanayotgan, xizmat vazifasini bajarayotgan va boshqa sabablarga koʻra saylovga bora olmagan fuqarolarning ham konstitutsiyaviy huquqi taʼminlandi. Ularning shu paytda boʻlib turgan muassasalariga sayyor qutilar olib borilib, ovoz berish jarayoni tashkil etildi.

Respublikamizdagi barcha joylarda boʻlgani kabi Amudaryo tumanidagi 89-sonli saylov uchastkasida ham soat 20:00da ovoz berish jarayoni yakunlandi.

Shundan keyin uchastka saylov komissiyasi aʼzolari tomonidan koʻchma va statsionar ovoz berish qutilari ochildi. Komissiya aʼzolari saylov byulletenlarini sanab, yakuniy natijalarni okrug saylov komissiyasiga yetkazdilar.

Fotima Eshimbetova.