Qipchoq ovul va shaharcha fuqarolar yigʻinlarida hokim va yoshlar uchrashuvi oʻtkazildi

Yoshlar – kelajagimiz. Ular ertamiz, millatimiz egalaridir. Shu boisdan ham yosh avlod kamoloti yoʻlida tashlangan har bir qadam farzandlarimizning porloq istiqboli va jonajon Oʻzbekistonimizning nurli ertasi yoʻlida qoʻyilgan odimlar hisoblanadi.

Shu oʻrinda eʼtirof etish joizki, Amudaryo tumanida ham yoshlarning toʻlaqonli ilm olishlariga sharoit yaratish, ularning turmushidagi muammolarini aniqlash va bartaraf etish, ishsiz yoshlarning bandligini taʼminlash, orzu-intilishlarini qoʻllab-quvvatlash maqsadida koʻpgina saʼy-harakatlar olib borilmoqda. Shu maqsadda tuman hokimining, sektorlar rahbarlarining, huquqni muhofaza qilish organlari,tumandagi barcha korxona-tashkilotlar rahbarlarining yoshlar bilan uchrashuvlari muntazam tashkil etilayapti.

2-dekabr kuni tumanning Qipchoq ovul fuqarolar yigʻini maʼmuriy binosida tuman hokimining yoshlar bilan uchrashuvi boʻlib oʻtdi. Tadbirda tuman hokimi Sobir Xoʻjametov, Yoshlar ishlari agentligi tuman boʻlimi boshligʻi Sardor Ismoilov, yigʻin masʼullari, ovul faollari, yoshlar ishtirok etdilar.

Uchrashuvni ovul fuqarolar yigʻini raisi Soatboy Nametov ochdi. U oʻz soʻzida davlatimiz rahbari tomonidan yoshlar kelajagiga katta eʼtibor qaratilayotgani hamda yoshlar masalasi davlat siyosatida asosiy oʻringa koʻtarilgani, bu qipchoqlik yoshlar hayotida ham yaqqol oʻz ifodasini topayotganini taʼkidladi.

Uchrashuv davomida tuman hokimi Sobir Xoʻjametov soʻzga chiqib bugungi kunda hurmatli Prezidentimiz tomonidan yoshlarga yaratib berilayotgan shart-sharoitlar, imkoniyatlar va tumanda yoshlar boʻyicha olib borilayotgan ishlarga keng toʻxtalib oʻtdi.

Ochiq muloqot tarzida oʻtgan uchrashuvda yoshlarning oʻzligini namoyon etishlari, tadbirkorlik faoliyatini yoʻlga qoʻyishlari, ishlab chiqarishni yoʻlga qoʻyish uchun yer maydoni ajratish kabi masalalardagi, shuningdek bandlik masalalaridagi murojaatlari ham tinglandi hamda amaliy yordam berish uchun nazoratga olindi.

Shuningdek, ovul yoshlarining sport bilan shugʻullanishlari uchun sharoit yaratish, sport musobaqalarini tez-tez oʻtkazib turish yuzasidan qilingan murojaat qizgʻin qoʻllab-quvvatlandi hamda amaliy yordam berish choralari koʻrilishi maʼlum qilindi.

Tadbirda yoshlar tomonidan bildirilgan 10dan ziyod murojaatlarning asosiy qismi shu yerning oʻzida ijobiy hal etildi. Oʻrganilishi vaqt talab qiladigan murojaatlarni hal etish mutasaddi tashkilot rahbarlari, ushbu masalalarning ijrosini nazorat qilish boʻyicha tegishli masʼullar zimmasiga yuklatildi.

Shu kuni Qipchoq shaharcha fuqarolar yigʻini maʼmuriy binosida ham tuman hokimining yoshlar bilan uchrashuvi boʻlib oʻtdi. Unda tuman hokimi Sobir Xoʻjametov, Yoshlar ishlari agentligi tuman boʻlimi boshligʻi Sardor Ismoilov, shaharcha fuqarolar yigʻini masʼullari, faollar va yoshlar ishtirok ishtirok etdilar.

Tadbirda tuman hokimi hudud yoshlari bilan dildan muloqot qildi va muammolarini ham tingladi. Yoshlarning bandlik, dehqonchilik qilish uchun ijaraga yer maydoni ajratish va ijtimoiy masalalardagi murojaatlari tinglandi va ijobiy hal qilish yuzasidan nazoratga olindi.

Shunisi eʼtiborliki, mamlakatimizda yoshlarning huquq va manfaatlarini himoya qilish, ularga zarur shart-sharoitlar va imkoniyatlarni yaratib berish borasida mustahkam huquqiy baza yaratilgan va bu tizim zamon talablariga hamohang tarzda takomillashtirilib borilmoqda.

Oygul Rajabova