Jayxun ilhomlari

Tarixiy daqiqa

Jayhun sokin, biroq, biladi barcha,

Junbushda barsdek yovvoyi, asov.

Daryoning u yoni, bu yonigacha

Oʻzi yoʻl bermasa, ming yillik masof.

Dunyolar ichida oʻzi dunyo bu,

Vohaga hayotbaxsh ona Daryo bu!

 

Anglab har umrning chin mohiyatin,

Yurtim, Yurtboshimni tanir dunyolar.

Iroda, shijoat, salohiyatin

Olqishlab, har qadam, aylab duolar.

YaNGI Oʻzbekiston ahli oʻtajak,

Bu koʻprik ming yillar xizmat etajak!

 

Xalqimning ming yillik orzusi bitdi,

Koʻprikdan mahobat, daryoda dolgʻa.

Yurtboshim «oyoqbov» kesib, lutf etdi:

«Qani, Lokomotiv, Avtolar,olgʻa!»

Afsona, ertakmas, chin haqiqat bu!

Ming yilga tatirlik bir daqiqa bu!

Tursunboy Abdullayev.

 

Ushalgan orzu

Ravon yoʻl hamisha buyuk orzudir,

Bugun oʻsha orzu ushalgan ayyom.

Toshkentdan taralgan temir yoʻl bugun,

Tumanimiz uzra etmoqda davom.

 

Porloq istiqboldan berib bir darak,

Koʻprik tutashtirdi ikki qirgʻoqni.

Oldin ham Xorazm edi mushtarak,

Yana yaqin qildi Qoraqalpoqni.

 

Haqiqiy bahosin ushbu koʻprikning,

Oʻtish azobini koʻrganlar bilar.

Necha avlod oʻtdi bu kunga yetmay,

Biz ham kutdik buni koʻp uzoq yillar.

 

Xislat koʻpdir asli hamjihatlikda,

Yakdil boʻlsak, koʻp-koʻp dovon osharmiz.

Shukur, deb farovon hayotimizga,

Hayot neʼmatlarin totib yasharmiz.

 

Haqiqiy egasi boʻlar yosh avlod,

Biz yaratgan ushbu bogʻ-u boʻstonning.

Yaratuvchisimiz axir hammamiz,

Yashnayotgan Yangi Oʻzbekistonning.

A.Nafasov.

 

Bahorni sogʻinib

Bahorni sogʻinib yashaydi kim?

Bormikan yo ajib mehrigiyosi.

Yasharish, uygʻonish, yangilanish bu,

Barcha fasllarning yoʻqdir qiyosi.

 

Boychechak uygʻonar, qir-adirlarda,

Lola-yu, chuchmoma koʻtaradi bosh.

Osmonda bulutlar galasi bir yon,

Pisanda qilmayin charaqlar quyosh.

 

Jajji bolajonlar xandon kulgusi,

Titratar zaminni, osuda osmon.

Gullardan-gullarga qoʻnib bulbullar

Basma-bas sayrashar, kuylashar shodon.

 

Oshiqlar fasli bu, asli navbahor,

Muhabbat uygʻonar, bahorda azal.

Shoir ilhom  olib goʻzal fasldan

Joʻsh urib yozadi, yangi sheʼr-gʻazal.

 

Bahorni sogʻinib yashamaydi kim,

Hammaga suyukli bu fasli bahor.

Intizor qilmayin qishni kuzatib,

Har gal kelaverar, takror va takror.

Sh.Xoʻjanov, Doʻrman qishlogʻi.

 

Koʻnglim bahori

Hijron qiynogʻidan xayolim mahzun,

Seni sogʻinganda umrim bahori.

Qalbimga bahorday gurkirab kelgin,

Vujudim yondirdi koʻnglim izhori.

 

Sogʻinchim azoblar har kuni tinmay,

Axir, seni sevsam, aytgin, ne qilay?

Yuragimdan qochib qaylarga boray,

Kelaqol, azizam, koʻnglim bahori.

 

Holingni bilolmay koʻngil qiynaydi,

Nomingni takrorlab yurak toʻymaydi,

Til-u dil birlashib seni oʻylaydi,

Kelsang-chi, bir bora, qalbim bahori.

 

Sen kelsang, ochilar yoʻlimda gullar,

Seni deb sochilar falakdan nurlar.

Xayolda faqat sen to tongga qadar,

Kulgularing goʻzal, umrim bahori.

Asadbek Otajonov, QDU talabasi.

 

ONAJONIM

Bagʻri keng onajonim,

Sizga ming bora taʼzim.

Mehr berib mehribonim,

Qadringga qilgum taʼzim.

Onasi bor insonlarga,

Ӽavas bilan qarayman.

Ming shukur, taqdirimga,

Sizdek ona boʻldim men.

Ӽayol sursam, kun-tunimda,

Menga hamroh boʻlasiz.

Koʻzlarimni yumganimda,

Quchogʻimga toʻlasiz.

Oʻzim ona boʻlsam ham,

Erkalangim keladi.

Iloji yoʻq, imkoni yoʻq,

Koʻzimga yosh toʻladi.

 

Farzandlarin kamolini,

Koʻrolmagan onamga.

Chin dunyoda Allohim,

Jannatni etgin ato.

Dilfuza Sultonova.

 

Onamga

Kasal boʻlsam shifokor,

Bilmasam oʻqituvchi.

Dilimga bermay ozor,

Muloyim soʻzlaguvchi.

 

Tushunmasam fanlarni,

Ustozlik ham qiladi.

Matematik amalni

Yechishni oʻrgatadi.

 

Bir qarasam pazanda,

Ovqat qilar bir zumda.

Tozalikda birinchi,

Ozoda-yu sarishta..

Akmal IbrOhimov.

 

8-mart

Qutlugʻ boʻlsin bayramingiz,

Mehri ummon onalar!

Mudom yayrab, kulingiz,

Sizgadir chaman gullar.

 

Qalbingizni bahorning

Iliq nuri silasin.

Yurtning tongi, nahori,

Poyingizga toʻshalsin.

Bonu Rahmatullayeva.