Xotira va qadrlash kuni arafasida Afgʻon urushi faxriylari ishtirokida maʼnaviy-maʼrifiy tadbirlar oʻtkazilmoqda

Mamlakatimizda maʼnaviy-maʼrifiy sohalarda amalga oshirilayotgan islohotlar negizida yoshi ulugʻ keksalarni eʼzozlash, nuroniylarga hurmat-eʼtibor qaratish kabi ezgu gʻoyalar mujassamlashgan.

Har yili butun mamlakatimiz boʻylab 9-may sanasi Xotira va qadrlash kuni sifatida munosib nishonlanib, sana munosabati bilan katta tadbirlar tashkil etiladi. Bayram arafasida yoshi ulugʻ nuroniylar, urush qatnashchilari holidan xabar olish, ularni yoʻqlash, bayram bilan tabriklash maqsadida uchrashuvlar, maʼnaviy-maʼrifiy tadbirlar, davra suhbatlari tashkil etiladi.

Urushlar insoniyat tarixida doimo katta yoʻqotishlar va uzoq muddatli salbiy oqibatlarga olib kelgan. Birgina Ikkinchi jahon urushi millionlab odamlar oʻlimiga sabab boʻlib, bir necha oʻn yillar davomida insoniyatga katta iqtisodiy va ijtimoiy taʼsirini koʻrsatib keldi. Oʻtgan asrning 79-89-yillarida Afgʻoniston zaminida boʻlgan ayovsiz urush ham minglab vatandoshlarimiz umriga zomin boʻldi.

Shu sababli ham har yili 9-may – Xotira va qadrlash kuni arafasida Oʻzbekiston veteran jangchi faxriylar va nogironlar birlashmasi aʼzolari quroldosh doʻstlari, keng jamoatchilik bilan uchrashuvlar uyushtirib, oʻsha mashʼum kunlarni yodga oladi, yurtdoshlarimizni tinchlikning qadriga yetishga chorlaydi.

Bu yil ham birlashma Qoraqalpogʻiston Respublikasi boʻlimining Amudaryo tumanidagi vakili Bahodir Jumaniyozov boshchiligida bir guruh afgʻon urushi ishtirokchilari tumandagi ovul va mahallarda uchrashuvlar, maʼnaviy-maʼrifiy tadbirlar tashkil qildilar.

Xolimbeg ovulidagi 35-sonli umumtaʼlim maktabida oʻqituvchi va oʻquvchilar ishtirokida oʻtkazilgan uchrashuv mobaynida sobiq quroldoshlar urush va uning salbiy oqibatlari, tinchlikning ulugʻ neʼmat ekanligi borasida fikr-mulohazalar yuritdilar. Shuningdek, tadbir mobaynida maktabning maʼnaviy-maʼrifiy ishlar boʻyicha oʻrinbosari Komiljon Oʻrazimbetovga sobiq Sovet qoʻshinlari Afgʻonistondan olib chiqilganiga 35-yil toʻlishi munosabati bilan medal topshirildi.

Maʼnaviy-maʼrifiy tadbir Xolimbeg ovulidagi 73-sonli maktabda ham oʻtkazilib, tadbirda maktab direktori Zarifboy Xoʻjaniyozovga ham shunday medal topshirildi.

Afgʻon urushi faxriylari Mangʻit shahridagi 30-sonli maktabda ham boʻlib, mazkur maktabning sobiq oʻquvchilari, Afgʻon urushi qatnashchilari Shavkat Shomuratov, Farhod Avezov, Shavkat Saidboyevlar bilan uchrashdilar va ushbu quroloshlariga ham medallarni tantanali tarzda topshirdilar.

Shu kabi uchrashuv Arna boʻyi mahallasidagi 57-sonli maktabda ham boʻlib oʻtdi. Uchrashuvda soʻzga chiqqanlar 1941-1945-yillar urush va mehnat frontida tinchlik uchun kurashib halok boʻlgan jasur va matonatli oʻgʻlonlar xotirasini yod etdilar hamda urush va mehnat frontida jasorat koʻrsatgan nuroniylarimizning eʼzozlanishi xalqimizga xos qadriyatlar koʻzgusi ekanligini taʼkidladilar.

Harbiy xizmatga chaqirilishdan avval tumanning Bogʻ mahallasida joylashgan 13-sonli maktabda tahsil olgan, keyinchalik Afgʻonistondagi urushda ishtirok etgan Qadamboy Erimbetov, Hamro Sobirov, Ozod Xoʻjaniyozovlar ham Afgʻon zaminidan sobiq ittifoq qoʻshinlarini olib chiqilganiga 35-yil toʻlishi munosabati bilan taʼsis etilgan medallar bilan taqdirlandi. Jangchi faxriylar afgʻon urushida xizmat paytida halok boʻlgan askarlarning oilalari holidan ham xabar olib, ularni bayram bilan qutladilar hamda sovgʻalar berdilar.

Ajdodlarni xotirlash va keksalarni eʼzozlash xalqimizga xos ulugʻ qadriyat hisoblanib, bu borada mamlakatimizda har yili qabul qilinayotgan dasturlarda yoshi ulugʻ, nuroniylarga boʻlgan hurmat, eʼtibor diqqat markazidadir. Urush va mehnat fronti faxriylari, nuroniylar, afgʻon urushi qatnashchilari xolidan xabar olish, yurtimizning bugungi tinch-osoyishta hayoti uchun jasorat koʻrsatib, jonini fido qilgan vatandoshlarimiz xotirasini yot etish esa har birimizning eng oliy burchimizdir. Zero, inson aziz, xotira – muqaddasdir.

Kirib kelayotgan qutlugʻ sana – Xotira va qadrlash kuni bilan barcha urush faxriylarini, front ortida mehnat qilgan nuroniylarimizni, barcha yurtdoshlarimizni tabriklaymiz!

Charos Arslonova, tuman hokiligining Axborot xizmati rahbari.