Обод турмуш йили янгиликлари

Байналмилал тўй

Шу йилнинг 26 август куни "Чойкўл” ОФЙнинг 2 маҳалласида яшовчи қозоқ миллатига мансуб Қуролбой Қурбонбоевнинг оиласида бўлиб ўтган кенжа ўғил Сардорбек ва ўзбек қизи Роҳатжонларнинг никоҳ тўйлари бир-бирлари билан аҳил-иноқ қозоқ, қорақалпоқ ва ўзбек миллатларининг шодиёнасига айланиб кетди. Дўмбира чалиб айтилган ҳазил-мутойибага бой қозоқча, бахшиёна усулдаги ўзбекча ва қорақалпоқча келин саломлари барчани хушнуд этди. Айниқса, Сардорбекнинг чечаси – Ўзбекистон ҳамда Қорақалпоғистон халқ артисти Гулнармин Сиримбетова қайнисига табрик сифатида куйлаган қозоқ, ўзбек, қорақалпоқ халқ қўшиқлари тўйхона меҳмонларининг қалбларини тўлқинлантириб юборди.

Маҳаллада байрам

Манғит шаҳрининг Дурунки маҳалласида мамлакатимиз Мустақиллигининг 22 йиллиги муносабати билан "Қадр-қимматим, таянчим ва ифтихоримсан, мустақил Ватан!” шиори остида ўтказилган тадбирда маҳаллада истиқомат қилувчи барча миллат вакиллари иштирок этдилар.

- Ўзаро аҳил-иноқ яшаётган маҳалламиз аҳли қозоқча, русча, қорақалпоқча ва ўзбекча куйларга рақс тушиб, хурсандчилик қилишди, - дейди диний маърифат ва маънавий-ахлоқий тарбия масалалари бўйича маслаҳатчи Гавҳар Мингбоева.

Йиғим-теримга тараддуд

Жорий йилда 115 гектар ерга чигит эккан «Юсуфхўжа» фермер хўжалиги деҳқонлари айни кунларда пахта йиғим-теримига тайёргарлик ишларини бошлаб юборишди. Хўжалик ижарачи-деҳқонлари Дилором Раҳимова ва Раъно Раматовлар ўзларининг қармоғидаги пахта далаларида ғўза чеканкасини муваффақиятли тамомлаб, ғўза қатор ораларини бегона ўтлардан тозалаш ишларини охирига етказдилар.

1-синф ўқувчилари учун

Янги 2013-2014 ўқув йилида туманимиз мактабларининг 1-синфида 3400 нафардан зиёд бола илк сабоқ олишни бошлайдилар. Айни кунда туман ХТМФМТТЭБга қарашли барча бошланғич ва умумтаълим мактабларда 148 та синф хонаси 1-синф ўқувчиларини қабул қилишга шай қилиб қўйилди. 1-синфларга қабул қилинган болаларга бепул дарсликлар, папкалар тарқатилди.

Инновацион технологиялар-таълимга

Туманимиз мактабларида 174 нафар чет тиллари фан ўқитувчилари бўлиб, уларнинг барчаси янги ўқув йилини муваффақиятли бошлаш мақсадида чет тили фан хоналарини янги инновацион технологиялар билан жиҳозладилар. 149 нафар чет тиллари фан ўқитувчилари эса К.Убайдуллаев номидаги Республика педагог ходимларни қайта тайёрлаш ва малакасини ошириш институтида таҳсил олиб, малака ошириб қайтишди.